Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 67

“Ise pe Lenga Pernah Ngerana Bagi Ia”

“Ise pe Lenga Pernah Ngerana Bagi Ia”

JOHANES 7:32-52

  • PETUGAS-PETUGAS ISURUH NANGKAP JESUS

  • NIKODEMUS MBELA JESUS

Jesus i Jerusalem denga ngerayaken Wari Raya Sapo-Sapo. Meriah ukurna perban “nterem kalak si erkiniteken man bana.” Tapi, isuruh imam-imam kepala ras kalak Parisi me piga-piga petugas guna nangkap Jesus. (Johanes 7:​31, 32) Aminna pe bage, Jesus la cebuni.

Terus iajari Jesus jelma si nterem i Jerusalem, nina Jesus, “Kentisik nari ngenca aku ras kena, kenca bage mulih aku ndahi Si nuruh aku. Idarami kena pagi aku, tapi la idat kena, sebap la banci kena reh ku ingan si kudahi e.” (Johanes 7:​33, 34) Si sangana icakapken Jesus eme kerna kematenna bage pe kekekenna ku surga. Tapi musuh-musuhna la banci ngikutken ia ku surga. Tapi la iangkai kalak Jahudi kai maksud Jesus e, emaka sisungkun-sungkunen kalak e, “Ku ja kin ate dilaki enda lawes, maka la banci sijumpai? Entah, lawes kin atena ku kalak Jahudi si lit i tengah-tengah kalak Junani janah ngajari kalak Junani? Kai nge maksudna maka nina, ‘Idarami kena pagi aku, tapi la idat kena, sebap la banci kena reh ku ingan si kudahi e’?”​—Johanes 7:​35, 36.

Seh me waktuna wari si pepituken i bas perayan e. Tiap pepagi i bas perayan e, ibuat sekalak imam lau arah Kolam Siloam janah iamburkenna ku baskom si erlubang, emaka maler lau e ku teruh batar-batar persembahen. Eme sebapna ikataken Jesus, “Ise si muas, rehlah ku aku gelah ia minem. Ise pe si erkiniteken man bangku, ia bali bagi si itulisken i bas ayat enda, ‘I bas pusuhna nari, maler me lau si mereken kegeluhen.’”​—Johanes 7:​37, 38.

Si imaksud Jesus eme kerna kai si terjadi paksa murid-muridna ipilih alu kesah si badia janah ialoken kalak e arapen nggeluh i surga. Kalak enda ipilih kenca kematen Jesus, eme i bas wari Pentakosta tahun 33 M. Paksa si e, mulai iberitaken kalak e kebenaren man jelma si nterem. Emaka, mulai me maler lau kegeluhen.

Megi si e, piga-piga ngataken, “Tuhu-tuhu kap ia Nabi.” Banci saja inget kalak e nubuat kerna nabi si belinen asangken Musa. Deba ngataken, “Ia kap Kristus.” Si debanna ka ngataken, “Kristus me labo reh arah Galilea nari? La kin lit ayat si ngataken maka Kristus e reh arah kesusuren Daud janah asalna arah Betlehem, kuta kemulihen Daud?”​—Johanes 7:​40-​42.

La seri pendapat kalak e. Aminna pe lit si atena nangkap Jesus, tapi la lit si ngelakokenca. Sanga petugas-petugas e mulih la maba Jesus, nungkun imam-imam kepala bage pe kalak Parisi, “Engkai maka la ibaba kena ia ku jenda?” Ngaloi petugas-petugas e, “Ise pe lenga pernah ngerana bagi ia.” Minter merawa kalak e janah nina, “La kin lah kena pe nggo itipuna? Me labo lit penguasa-penguasa ntah pe kalak Parisi si nggo erkiniteken man bana? Jelma si nterem enda, si la meteh Undang-Undang Musa, labo kap merga i lebe-lebe Dibata.”​—Johanes 7:​45-​49.

I je lit Nikodemus eme kalak Parisi si jadi anggota Pengadilen Agama Jahudi. Dua setengah tahun si lewat, idahina Jesus i bas berngi wari guna ngataken kinitekenna. Tapi, gundari kenca megi ranan kalak e ndai, alu pang ibelana Jesus, nina, “Menurut undang-undangta, me labo banci sihakimi kalak adi lenga sibegi ras siteh kai si ilakokenna?” Ngaloi kalak e, “La kin lah asalndu pe arah Galilea nari nge? Pelajarilah Kitap si Badia janah itehndu me maka labo lit nabi si reh arah Galilea nari.”​—Johanes 7:​51, 52.

Memang labo lit ikataken Kitab si Badia maka reh pagi sekalak nabi arah Galilea. Tapi lit nubuat si ngataken maka teridah pagi terang si ersinar i “Galilea si iingani bangsa-bangsa si deban.” (Jesaya 9:​1, 2; Matius 4:​13-​17) Selain si e, nggo inubuatken maka Jesus lahir i Betlehem janah ia kesusuren Daud. Banci saja, iteh kalak Parisi kerna si e, tapi ikataken kalak e ku japa pe kai si la tuhu kerna Jesus.