Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 26

”Dosandu Nggo Iampuni”

”Dosandu Nggo Iampuni”

MATIUS 9:1-8 MARKUS 2:1-12 LUKAS 5:17-26

  • IAMPUNI JESUS DOSA SEKALAK DILAKI SI LUMPUH JANAH IPEPALEMNA

Gundari Jesus nggo terkenal. Enterem kalak si lawes ku daerah-daerah pelosok guna megiken Jesus ngajar ras ngenen mukjizat si ibanna. Tapi kenca piga-piga wari, mulih ia ku Kapernaum, i je biasana inganna adi ia ngelayani. Berita kerna kemulihenna minter seh ku kota-kota i sekeliling Lawit Galilea. Emaka nterem kalak reh ku rumah inganna tading. Piga-piga si reh e eme kalak Parisi ras guru-guru Undang-Undang Musa si rehna arah Galilea, Judea, bage pe Jerusalem.

“Emaka nterem kalak pulung i rumah e dungna lanai siat, i bas deher pintu pe lanai siat. Jenari mulai ia ngerana kerna kata Dibata man kalak e.” (Markus 2:2) Kentisik nari terjadi me kejadin si seh kel luar biasana. Kejadin e nampati kita banci ngergai kuasa Jesus si banci nasapken kiniseran manusia janah erban kesehaten kerina kalak si ipilihna jadi sempurna.

Sanga Jesus ngajar i tengah-tengah jelma si nterem, empat dilaki maba sekalak dilaki si lumpuh tare ingan medemna. Ate kalak e gelah temanna e ipepalem. Perban teremna jelma, la banci “ibaba kalak e ia pas ku lebe-lebe Jesus.” (Markus 2:4) Pasti kecewa kel kalak e. Inangkihi kalak e atap rumah e janah ilubangi kalak e. Jenari ipenusur kalak e si lumpuh ndai tare ingan medemna ku bas rumah e.

Merawa nge Jesus ngidah si e? Lang. Malahen, tertarik ia ngidah kiniteken kalak e janah nina man dilaki si lumpuh e, “Dosandu nggo iampuni.” (Matius 9:2) Banci kin Jesus ngampuni dosa? Si enda ipermasalahken ahli Undang-Undang Musa ras kalak Parisi, nina, “Engkai maka bage nina ngerana? Ihinana kap Dibata. Ise kin si banci ngampuni dosa selain Dibata?”​—Markus 2:7.

Perban iteh Jesus perukuren kalak e, nina, “Engkai maka bage perukuren kena? Apai kin nukahen ngatakenca man si lumpuh e, ‘Dosandu nggo iampuni,’ asangken, ‘Cinderken, angkat ingan medemndu jenari erdalanlah’?” (Markus 2:​8, 9) Jelas me, Jesus banci ngampuni dosa adi nggo pagi ikorbankenna dirina. E me dasarna dosa banci iampuni.

Kenca si e, icidahken Jesus man jelma si nterem e termasuk man kalak si la senang man bana, maka lit kuasana ngampuni dosa. Jenari nina man kalak si lumpuh e, “Cinderken, angkat ingan medemndu, janah mulihlah ku rumahndu.” Minter erdalan dilaki e, ibabana ingan medemna ndai i lebe-lebe jelma si nterem. Imuliaken kalak e Dibata janah nina, “Lenga pernah siidah si bagenda rupana.”​—Markus 2:​11, 12.

Banci siperdiateken maka dosa ihubungken Jesus ras pinakit. Emaka adi dosa iampuni e banci erban kalak jadi sehat. Pustaka si Badia ngajarken maka orang tuata si pertama eme Adam nggo erdosa janah kerina kesusurenna ndatken akibat dosa eme pinakit ras kematen. Tapi i bas pemerentahen Kerajan Dibata, iampuni Jesus pagi kerina dosa kalak si ngkelengi ras si ngelayani Dibata. Emaka kerina pinakit imasapken pagi seh rasa lalap.​—Roma 5:​12, 18, 19.