Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 58

Roti si Reh Buena Janah Persinget Kerna Ragi

Roti si Reh Buena Janah Persinget Kerna Ragi

MATIUS 15:32–16:12 MARKUS 8:1-21

  • IBERE JESUS 4.000 DILAKI MAN

  • IPESINGETI JESUS KERNA BAHAYA RAGI KALAK PARISI

I bas Dekapolis i sebelah timur Lawit Galilea, reh jelma si nterem njumpai Jesus. Merhat kalak enda megiken Jesus janah ipepalemna. Ibaba kalak e pangan i bas keranjang-keranjang si galang.

Kenca si e, ikataken Jesus man murid-muridna, “Mekuah ateku jelma si nterem e, erkiteken nggo telu wari kalak e ras aku janah kai pe la lit si man panganenna. Adi kusuruh kalak e mulih sangana melihe, banci kari kalak e lumben bas perdalanen, janah piga-piga rehna arah ingan si ndauh nari.” Tapi ngaloi murid-murid e, “I bas ingan si melungen enda, ja nari banci sidat roti gelah kalak e besur?”​—Markus 8:​2-4.

Nina Jesus, “Piga lit roti bas kena?” Nina murid-muridna, “Pitu, ras piga-piga ikan si kitik.” (Matius 15:34) Jenari isuruh Jesus jelma si nterem e kundul. Ibuat Jesus roti ras ikan e, ertoto ia man Dibata janah iberekenna man murid-murid gelah ibagiken kalak e. Kerina kalak man seh asa besur! Aminna pe si man lit 4.000 dilaki, lenga termasuk diberu ras anak-anak, lit denga sisana pitu keranjang si galang!

Kenca ipindoken Jesus gelah lawes jelma si nterem e, ia ras murid-muridna nangkih perahu ku Magadan si lit i tepi Lawit Galilea i sebelah barat. I je, iuji kalak Parisi ras Saduki atena Jesus. Ipindo kalak e gelah icidahken Jesus tanda arah surga.

Iangkai Jesus kai maksud kalak e, emaka nina Jesus, “Paksa karaben, ning kena, ‘Adi megara langit mejile nge pagi wari,’ janah paksa erpagi-pagi, ‘Sendah ugapa pe udan ras mbergeh, perban langit megara tapi embun mekapal.’ Iteh kena uga ngertiken rupa langit, tapi kerna tanda-tanda jaman la banci iertiken kena.” (Matius 16:​2, 3) Kenca si e, ikataken Jesus maka labo lit tanda si ibereken man kalak e selain tanda Juna.

Jenari, inangkihi Jesus ras murid-muridna perahu, lawes kalak e ku Betsaida si lit i Lawit Galilea i sebelah timur-laut. I bas perdalanen, isadari murid-murid maka la bias pangan si ibaba kalak e. Sada ngenca roti kalak e. Erkiteken baru denga kalak e jumpa ras kalak Parisi eme kalak si ndukung Herodes, emaka ipersingeti Jesus murid-murid, “Teruslah buka mata kena. Hati-hatilah nandangi ragi kalak Parisi ras ragi Herodes.” Akap murid-murid isingetken Jesus kerna ragi perban la bias roti si ibaba kalak e. Emaka nina Jesus, “Engkai maka kena sijawapen kerna la lit roti?”​—Markus 8:​15-​17.

Edenga ibere Jesus man ribun kalak. Aturna min la kuatir murid-murid kerna pangan. Nungkun Jesus, “La kin inget kena, sanga kucepik-cepikken lima roti man 5.000 dilaki, piga keranjang buena sisana si ipepulung kena?” Ngaloi kalak e, “Sepulu dua.” Nina Jesus ka, “Sanga kucepik-cepikken pitu roti man 4.000 dilaki, piga keranjang si galang sisana si ipepulung kena?” Ngaloi kalak e, “Pitu.”​—Markus 8:​18-​20.

Nungkun ka Jesus, “Uga maka lenga iangkai kena adi si kukataken enda labo kerna roti?” Nina Jesus ka, “Erjaga-jagalah nandangi ragi kalak Parisi ras kalak Saduki.”​—Matius 16:11.

Dungna iangkai murid-murid kerna si e. Ipake Jesus istilah ragi si ngertiken kai si la mehuli. Bali bagi ragi si mereken pengaruh man kerinana janah erban kembang, bage ka pe “ajaren kalak Parisi ras kalak Saduki” si mereken pengaruh si la mehuli. Emaka, ipersingeti Jesus murid-muridna kerna bahaya e.​—Matius 16:12.