Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 62

Pelajaren si Penting kerna Meteruk Ukur

Pelajaren si Penting kerna Meteruk Ukur

MATIUS 17:22–18:5 MARKUS 9:30-37 LUKAS 9:43-48

  • IULIHI JESUS MPEBETEHKEN KERNA KEMATENNA

  • IGALARI JESUS PAJAK ALU SEN LOGAM ARAH BABAH IKAN

  • ISE SI JADI SI BELINNA PAGI I BAS KERAJAN SURGA?

Kenca kejadin i das deleng, bage pe mpepalem sekalak anak si irasuki malekat jahat i Kesarea Pilipi, lawes Jesus ku Kapernaum. Lawes ia ras murid-muridna saja, jadi la lit “ise pe metehsa kerna si e.” (Markus 9:30) Alu bage banci isikapken Jesus murid-muridna guna ngadapi kematenna janah ngelakoken dahin si nandangi ialoken kalak e. Nina Jesus, “Anak manusia ihianati pagi bas tan musuhna, janah ibunuh kalak e me ia. I bas wari si peteluken, ipekeke me ia.”​—Matius 17:​22, 23.

Aturna la sengget murid-murid megi si e sebap nggo pernah ikataken Jesus maka ia nandangi ibunuh, aminna pe paksa si e Petrus la tek. (Matius 16:​21, 22) Selain si e, nggo idah telu rasulna salih rupa Jesus janah nggo ibegi kalak e kerna “uga Jesus lawes.” (Lukas 9:​31) Gundari nggo ‘ceda kel ate murid-murid’ megi ranan Jesus e, aminna pe la iangkaina kel kai maksud Jesus. (Matius 17:23) Tapi, la pang kalak e nungkun man Jesus.

Seh me kalak e i Kapernaum, i je me Jesus rusur tading sedekah ia ngelayani i Galilea. Enterem arah rasul-rasul i je kuta kemulihenna. I je, reh piga-piga pengalo cuke i bas rumah pertoton nari ndahi Petrus. Banci saja ituduh kalak e atena Jesus la pernah nggalari pajak, emaka isungkun kalak e, “Igalari guru kena nge pajak dua drakhma?”​—Matius 17:​24.

Ijawap Petrus, “Igalarina.” Sanga mulih Petrus ku rumah, nggo iteh Jesus kai si nggo terjadi. Emaka ope lenga iceritaken Petrus, leben Jesus nungkun, “Uga menurutndu, Simon? I bas ise nari nge raja-raja doni ngaloken iuren ntah pe pajak kepala? I bas anak-anakna nari ntah kalak si deban?” Ijawap Petrus, “I bas kalak si deban nari.” Nina Jesus ka, “Situhuna anak-anak kalak e bebas pajak.”​—Matius 17:25, 26.

Bapak Jesus eme Raja i bas kerina si nasa lit. Ia me si isembah kalak i bas rumah pertoton. Erkiteken Jesus e Anak Dibata, labo arus igalarina pajak i bas rumah pertoton. Nina Jesus, “Tapi, perban la ateta erban kalak e tertuktuk, laweslah ngkawil ku lawit janah buat ikan si pertama si idatndu. Paksa ibukandu babahna, datndu kari i je sada logam pirak. Buatndulah e janah bereken man kalak e guna pajakta duana.”​—Matius 17:27.

Sange, paksa i bas perdalanen ku Kapernaum, sijawapen murid-murid kerna ise si belinna pagi i bas Kerajan surga. Gundari, isungkun kalak e atena Jesus kerna si e. La pang kalak e nungkun kerna kematen Jesus tapi nungkun kerna masa depanna sendiri pang kalak e. Enggo ieteh Jesus kai si iukuri kalak e. Emaka ope lenga isungkun murid-murid, leben Jesus nungkun, “Kai nge ndai si ipersoalken kena bas dalan?” (Markus 9:​33) Erkiteken mela, la ijawap murid-murid. Tapi dungna isungkun kalak e, nina, “Ise situhuna si mbelinna i bas Kerajan surga?”​—Matius 18:1.

Aminna pe nggo menam telu tahun dekahna murid-murid ngikutken Jesus ras megi ajarenna, terus denga ipersoalken kalak e kerna si e. Tapi kalak enda la sempurna. Kalak enda pe nggeluh i tengah-tengah peminpin-peminpin agama si ngukuri keduduken ras jabaten saja. Selain si e, mbaru-baru e ikataken Jesus man Petrus maka ibereken me man bana “kunci-kunci” Kerajan. Banci jadi si e erban Petrus erpengakap maka ia lebih penting. Jakup ras Johanes pe banci saja erpengakap maka ia kalak si penting perban nggo idah kalak e salih rupa Jesus.

La soal kai pe si erbanca bage, inasehati Jesus kerina kalak e gelah robah. Ilebuhna sekalak anak si kitik denga janah isuruhna tedis i tengah-tengah kalak e, jenari nina, “Adi la kena robah janah la bagi anak-anak e, la banci kena masuk ku bas Kerajan surga. Emaka, ise pe si mpeteruk bana bagi anak enda, ia me si mbelinna i bas Kerajan surga. Janah ise pe si ngaloken anak-anak si bagenda i bas gelarku, ialokenna ka nge aku.”​—Matius 18:​3-5.

Mejile kel cara Jesus ngajari kalak e! La irawaina murid-muridna e janah labo ituduhna mentingken bana. Tapi ilebuhna sekalak anak si kitik denga gelah banci mis iangkai kalak e maksud Jesus. Labo lit sitik pe keduduken anak si kitik denga. Bagi anak si kitik e min ate Jesus pengakap murid-muridna. Nina Jesus, “Ise si perbahanenna selaku kalak si kitikna i bas kena kerina, ia me si mbelinna.”​—Lukas 9:48.