Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 31

Mutikken Gandum i bas Wari Sabat

Mutikken Gandum i bas Wari Sabat

MATIUS 12:1-8 MARKUS 2:23-28 LUKAS 6:1-5

  • IPUTIKKEN MURID-MURID GANDUM SANGA WARI SABAT

  • JESUS KAP “TUAN NANDANGI WARI SABAT”

Lawes Jesus ras murid-muridna ku Galilea i sebelah utara. Paksa si e, sangana melala gandum i juma-juma. Perban melihe, iputikken murid-murid gandum e jenari ipan kalak e. Paksa si e wari Sabat janah idah kalak Parisi kai si ilakoken kalak e.

Lenga ndekahsa, ibunuh kalak Jahudi i Jerusalem atena Jesus perban ituduh ia ngelanggar peraturen wari Sabat. Gundari igunaken kalak Parisi si ilakoken murid-murid e guna nuduh Jesus. “Nenlah! Ajar-ajarndu ngelakoken kai si ilarang i bas wari Sabat.”​—Matius 12:2.

Ikataken kalak Parisi e maka mutikken ras muyu gandum guna ipan seri saja ras mperani gandum. (Keluaren 34:21) Pendapat kalak e kerna wari Sabat erban kalak jadi susah, padahal arusna wari e guna mpegegehi hubungen kalak ras Dibata janah wari ermeriah ukur. Guna mpekena cara rukur kalak e, igunaken Jesus contoh si mbuktiken maka labo pernah bage sura-sura Dibata Jahwe kerna wari Sabat.

Contoh si pertama si ipake Jesus eme Daud ras teman-temanna. Sanga kalak e melihe, ngadi kalak e i bas kemah kesaksin janah ipanna roti si badia. Roti-roti e nggo ibuat arah lebe-lebe Jahwe janah iganti alu roti si mbaru. Imam-imam ngenca si banci man roti e. Tapi perban keadan, Daud ras teman-temanna e la isalahken aminna pe ipan kalak e roti e.​—Imamat 24:​5-9; 1 Samuel 21:​1-6.

Contoh si peduaken, nina Jesus, “Lenga kin ibaca kena i bas Undang-Undang Musa maka sanga wari Sabat, imam-imam i bas Rumah Pertoton erdahin, tapi la ia ersalah?” Maksud Jesus, aminna pe wari Sabat, imam-imam terus erdahin eme motong binatang guna ipersembahken ras ndahiken dahin si deban bas rumah pertoton. “Tapi kukataken man kena maka i jenda lit si pentingen asangken rumah pertoton.”​—Matius 12:​5, 6; Bilangen 28:9.

Ikataken Jesus kai si lit i bas Kitap si Badia, nina, “Bicara iangkai kena ertina kata-kata enda, ‘Si kuarapken perkuah ate labo korban,’ labo min ndai ihakimi kena kalak si la ersalah.” Jenari nina ka, “Sebap Anak manusia kap Tuan nandangi wari Sabat.” Si icakapken Jesus eme kerna Kerajanna si seribu tahun si dem alu kedamen.​—Matius 12:​7, 8; Hosea 6:6.

Mbarenda nari, melala kel kiniseran si inanami manusia perban Setan, lit kekerasen bage pe peperangen. Tapi i bas Sabat si mbelin pagi eme pemerentahen Jesus, pasti beda kel keadanna. Kerina kiniseran si gundari lanai pagi lit!