Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 28

Engkai Murid-Murid Jesus La Erpuasa?

Engkai Murid-Murid Jesus La Erpuasa?

MATIUS 9:14-17 MARKUS 2:18-22 LUKAS 5:33-39

  • MURID-MURID JOHANES NUNGKUN JESUS KERNA PUASA

La ndekah kenca irayaken Jesus Paskah tahun 30 M, Johanes Peridiken ipenjaraken. Ate Johanes gelah murid-muridna jadi pengikut Jesus, tapi labo kerina muridna e nggit jadi pengikut Jesus kenca piga-piga bulan Johanes ipenjaraken.

Gundari, nandangi Paskah tahun 31 M. Piga-piga murid Johanes nungkun Jesus, nina, “Engkai maka kami ras kalak Parisi erpuasa, tapi murid-muridndu la erpuasa?” (Matius 9:​14) Kalak Parisi erpuasa perban e peraturen agama. Dungna, iceritaken Jesus perumpaman kerna toto kalak Parisi si sombong, nina, “O Dibata, bujur ningku perban aku la bagi kalak si deban . . . Dua kali seminggu aku erpuasa.” (Lukas 18:​11, 12) Banci saja murid-murid Johanes pe erpuasa perban peraturen agama saja. Ntah pe guna ncidahken maka kalak e sedih perban Johanes ipenjaraken. Murid-murid Johanes pe kemamangen ngkai murid-murid Jesus la erpuasa, ngidah kai si terjadi man Johanes.

Ijawap Jesus kalak e alu perumpaman, “Me labo lit alasen teman-teman penganten si dilaki erceda ate adi kalak e paksana ras penganten e? Tapi reh me paksana penganten e ibuat i bas kalak e nari janah i je me kalak e erpuasa.”​—Matius 9:​15.

Johanes pe pernah ngataken maka Jesus e penganten si dilaki. (Johanes 3:​28, 29) Jadi sanga Jesus lit denga, murid-muridna la erpuasa. Kenca mate Jesus, rate mesui pagi murid-muridna e janah lanai pagi kalak e pet man. Tapi meriah kel pagi ukur kalak e sanga Jesus ipekeke! I je pagi lanai kalak e perlu puasa guna ncidahken kalak e erceda ate.

Kenca si e, iceritaken Jesus dua perumpaman, “Labo ise pe nambal uis si nggo male alu uis si mbaru. Sebap adi bage, reh belangna me rigatna iban penambalna e. Bage ka pe, labo itamaken kalak lau anggur si mbaru ku bas kantong kulit si male. Sebap adi bage, pecah me kantong e, janah anggur e pe mambur ras kantong e pe ceda. Tapi lau anggur si mbaru itamaken kalak ku bas kantong kulit si mbaru.” (Matius 9:​16, 17) Kai maksud Jesus?

Isampati Jesus atena murid-murid Johanes Peridiken, gelah iangkai kalak e ngkai maka murid-muridna la ndalanken peraturen agama Jahudi si nggo ndekah e, eme erpuasa. Jesus reh labo guna nambal cara kalak ngelakoken ibadat, si nandangi ikernepken, tempa-tempa nambal uis si nggo male alu uis si mbaru ntah pe namaken anggur si mbaru ku kantong kulit si male.