Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 22

Empat Murid-Murid Jadi si Njala Manusia

Empat Murid-Murid Jadi si Njala Manusia

MATIUS 4:13-22 MARKUS 1:16-20 LUKAS 5:1-11

  • IAHKEN JESUS MURID-MURID GELAH TERUS NGIKUTKEN IA

  • SI NJALA IKAN, JADI SI NJALA MANUSIA

Kenca ibunuh kalak Nasaret atena Jesus, lawes ia ku kota Kapernaum, deher Lawit Galilea, si igelari ka “Dano Genesaret.” (Lukas 5:1) Si enda erban kai si ikataken i bas buku Jesaya terjadi eme kalak Galilea si lit i deher lawit idahna pagi terang si ersinar.​—Jesaya 9:​1, 2.

I bas Galilea, terus iberitaken Jesus kerna “Kerajan surga nggo ndeher.” (Matius 4:​17) Idarami Jesus empat muridna. Tangtangna radu ras kalak e ras Jesus, tapi sanga Jesus mulih ku Judea, murid-muridna e mulih ku dahinna si gelgel e eme njala ikan. (Johanes 1:​35-​42) Ate Jesus gelah iterusken kalak e erberita aminna pe Jesus lanai pagi lit, emaka kalak e arus terus ras Jesus gelah banci kalak e iajarina.

Sanga Jesus erdalan i tepi dano, idahna Simon Petrus ras seninana Andreas bage pe piga-piga temanna si sangana mbersihken jala. Inangkihi Jesus perahu Petrus, isuruhna gelah idorongna perahuna terdauhen ku dano. Kenca si e kundul Jesus janah mulai iajarina jelma si nterem si nggo pulung i pantai kerna Kerajan Dibata.

Kenca si e, ikataken Jesus man Petrus, “Sorong perahu ku ingan si mbages, janah dabuhken jala kena ku lau.” Ngaloi Petrus, “O guru, sada berngi enda nggo latih kel akap kami janah la lit dat kami, tapi adi bage nindu kudabuhken dage jala e.”​—Lukas 5:​4, 5.

Idabuhken kalak e jalana janah melala kel ikan si idatna janah jala kalak e mulai merigat! Emaka ilebuhna teman-temanna i bas perahu si deban nari gelah reh nampati. Isina duana perahu e seh menam gedap. Ngidah si e, erjimpuh Petrus man Jesus janah nina, “Laweslah i bas aku nari Tuan, sebap aku kalak perdosa.” Nina Jesus, “Ula nari kam mbiar. Mulai gundari nari kam jadi penjala manusia.”​—Lukas 5:​8, 10.

Nina Jesus man Petrus ras Andreas, “Mari ikutken aku, kuban kena kari jadi si njala manusia.” (Matius 4:19) Idilo Jesus ka dua nelayan nari eme Jakup ras Johanes, kalak enda anak Sebedeus. Mis kalak e nggit. Emaka empatna kalak e nadingken dahinna eme njala ikan janah kalak e si tangtangna terus ngikutken Jesus.