Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 20

Mukjizat si Peduaken i Kana

Mukjizat si Peduaken i Kana

MARKUS 1:14, 15 LUKAS 4:14, 15 JOHANES 4:43-54

  • IBERITAKEN JESUS MAKA “KERAJAN DIBATA NGGO NDEHER”

  • IPEPALEM JESUS SEKALAK ANAK DILAKI DAUH-DAUH NARI

Kenca dua wari Jesus i Samaria, mulih ia ku kutana. Nggo latih kel akapna erberita i Judea, tapi mulih ia ku Galilea labo guna istirahat. I bas kutana e pe, reh sibukna ia erberita. Labo iarapken Jesus gelah ialo-alo ia i je, sebap nggo ikatakenna, “sekalak nabi labo ihamati i bas kutana.” (Johanes 4:​44) La bagi murid-muridna, kalak e mulih ku rumahna ndahi keluargana bage pe dahinna si gelgel e.

Kai si mulai iberitaken Jesus? Beritana eme, “Kerajan Dibata nggo ndeher. Ertobatlah, erkinitekenlah man berita si meriah.” (Markus 1:​15) Uga nge tanggapen kalak? Enterem kalak Galilea ngalo-ngalo Jesus alu mehuli janah ia pe iergai kalak e. Enda labo perban berita si ipesehna saja. Piga-piga bulan si lewat, sanga kalak e ngerayaken Paskah i Jerusalem nggo idah kalak e mukjizat-mukjizat si iban Jesus.​—Johanes 2:​23.

I ja Jesus mulai erberita i Galilea? Mungkin i Kana, i je me iubahna lau jadi anggur i bas pesta perjabun. Tapi gundari, ibegi Jesus lit sekalak anak dilaki si sangana sakit, janah nandangi mate. Ia anak pejabat si erdahin ras Herodes Antipas. Herodes eme raja si pagin motong kerahung Johanes Peridiken. Ibegi pejabat e maka Jesus nggo mulih arah Judea nari, gundari ia ku Kana. Emaka lawes ia arah rumahna nari i Kapernaum ku Kana njumpai Jesus. Pejabat si erceda ate e mindo man Jesus, “O Tuan, rehlah kam ope lenga anakku mate.”​—Johanes 4:​49.

Sengget pejabat e megi jawapen Jesus. Nina Jesus, “To mulihlah kam, nggo malem anakndu e.” (Johanes 4:​50) Tek pejabat e janah mis ia mulih ku rumahna. I bas perdalanen, jumpa ia ras budak-budakna si merudu ngataken maka anakna e nggo malem. Nungkun pejabat e, ‘Ndiganai ia malem?’ Merhat ia metehsa tuhu kin Jesus si erban anakna e malem.

Ijawap kalak e, “Nderbih kira-kira jam sada ciger nggo malem penakitna.”​—Johanes 4:​52.

Sadar pejabat e maka anakna malem paksa ikataken Jesus, “Nggo malem anakndu e.” Kenca si e, pejabat e ras kerina si lit i bas rumahna bage pe budak-budakna jadi murid-murid Kristus.

I Kana, dua kali iban Jesus mukjizat eme iubahna lau jadi anggur janah ipepalemna anak dilaki dauh-dauh nari, kira-kira 26 kilometer dauhna. Pastilah labo e saja mukjizat si ibanna. Tapi mukjizat enda jadi tanda maka nggo imulai Jesus pelayanenna sanga ia mulih ku Galilea. Jelas me ia nabi si isuruh Dibata, tapi terus nge ‘nabi e ihamati i bas kutana’?

Si enda teridah pagi paksa Jesus mulih ku kutana Nasaret. Kai si nimai ia i je?