Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 45

Kuasa nandangi Malekat-Malekat Jahat

Kuasa nandangi Malekat-Malekat Jahat

MATIUS 8:28-34 MARKUS 5:1-20 LUKAS 8:26-39

  • ISURUH JESUS MALEKAT JAHAT MASUK KU RARASEN BABI

Seh me rasul-rasul i tepi lawit. Edenga iadapi kalak e kejadin si bahaya. Reh dua kalak dilaki si seram si irasuki malekat jahat. Kalak e reh arah kuburen nari. Kiam kalak e ngayaki Jesus! Buen iceritaken injil Lukas ras Matius kerna sekalak dilaki si irasuki malekat jahat e, banci saja perban ia lebih kejam janah nggo ndekah irasuki malekat jahat.

Dilaki e erdalan-dalan janah la ia ruis. Suari ras berngi “serko ia i bas kuburen-kuburen bage pe i bas deleng-deleng janah ilukaina bana alu batu.” (Markus 5:5) Perban seramna dilaki e mbiar kalak lewat arah dalan e. La lit si ngasup nangkap ia.

Sanga ideheri dilaki e Jesus, erjimpuh ia janah iban malekat jahat dilaki e serko, nina, “O Jesus, Anak Dibata Si Meganjangna, kai kin atendu? Ersumpahlah i bas gelar Dibata gelah ula isiksandu aku.” Ibuktiken Jesus maka lit kuasana nandangi malekat jahat, nina, “O malekat jahat, ndaratlah i bas dilaki e nari.”​—Markus 5:​7, 8.

Situhuna melala malekat jahat si ngerasuki dilaki e. Sanga isungkun Jesus, “Ise gelarndu?” Nina ngaloi, “Gelarku Legiun, sebap nterem kami.” (Markus 5:9) I bas pasuken Roma, legiun biasana lit ribun tentera. Jadi melala malekat jahat si ngerasuki dilaki e janah meriah akap malekat e niksa dilaki e. Mindo malekat-malekat jahat e man Jesus “gelah ula ia isuruh masuk ku lubang si seh kel bagesna.” Iteh malekat jahat e kai pagi si terjadi man bana bage pe man peminpinna eme Setan.​—Lukas 8:​31.

Lit ndeher i je kira-kira 2.000 ekor babi si sangana man. Binatang enda najis menurut Undang-Undang Musa janah la banci iasuhi kalak Jahudi. Nina malekat-malekat jahat e, “Suruhlah kami masuk ku babi-babi ah.” (Markus 5:​12) Isuruh Jesus malekat-malekat jahat e masuk ku babi-babi e. Emaka kerina babi e kiamen ku tebing jenari ndabuhen ku lawit.

 Ngidah si e, kiam me permakan-permakan babi e guna ngelaporken kejadin e ku kota bage pe daerah i sekelilingna. Rehen me kalak ngenen kai si terjadi. Seh kenca kalak e i je, idah kalak e dilaki si irasuki malekat jahat ndai nggo sehat janah nggo jore ukurna. Enggo ruis ia janah kundul i deher nahe Jesus.

Kalak si megi ras si ngidah dilaki e jadi mbiar. Mbiar kalak e ntah kai ka kari si ilakoken Jesus man kalak e. Ipindoken kalak e gelah lawes Jesus arah daerah kalak e nari. Sanga berkat Jesus nangkih perahu, dilaki si irasuki malekat jahat ndai mindo gelah ikut ia ras Jesus. Tapi nina Jesus bana, “Mulihlah ku keluargandu, janah turiken man kalak e kerina si nggo ilakoken Jahwe bandu ras perkuah ate si nggo icidahkenNa bandu.”Markus 5:​19.

Biasana la ipediat Jesus kalak si ipepalemna cerita man kalak si deban kerna kai si ilakokenna. Tapi sekalenda, dilaki si nggo ndekah irasuki malekat jahat e jadi bukti kuasa Jesus, janah banci iceritaken dilaki e kerna si e man kalak si la banci ijumpai Jesus. Banci ka iceritakenna uga situhuna kerna kejadin babi-babi si mate ndai. Emaka lawes dilaki e ku kerina daerah Dekapolis, iceritakenna kai si nggo ilakoken Jesus man bana.