Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 53

Penguasa si Ngkuasai Angin ras Lawit

Penguasa si Ngkuasai Angin ras Lawit

MATIUS 14:22-36 MARKUS 6:45-56 JOHANES 6:14-25

  • IJADIKEN JELMA SI NTEREM ATENA JESUS JADI RAJA

  • ERDALAN JESUS I DATAS LAU JANAH IPENGADINA ANGIN SI METER

Sanga ibere Jesus ribun kalak man, pasti luar biasa kel iakap jelma si nterem si lit i je. Sadar kalak e maka Jesus “tuhu-tuhu Nabi si ijanjiken guna reh ku doni enda.” Tek kalak e maka Jesus banci jadi penguasa si mehuli. (Johanes 6:14; Ulangen 18:18) Emaka irencanaken kalak e guna maksa Jesus gelah jadi raja.

Tapi perban iteh Jesus rencana e, isuruhna jelma si nterem e lawes janah isuruhna murid-muridna mulih ku perahu. Murid-murid nandangi lawes ku Betsaida, jenari ku Kapernaum. Tapi, Jesus lawes ku deleng guna ertoto sisada i bas berngi e.

Alu iterangi sinar bulan, idah Jesus perahu murid-murid arah ndauh nari. Galang kel galumbang lawit e, janah ‘mesera iakap murid-murid ngkayuh perahu perban ientam angin.’ (Markus 6:48) Ngidah si e, nusur Jesus arah deleng nari janah erdalan ia i datas lau guna ndahi kalak e. Paksa si e, nggo ikayuh murid-murid perahuna “kira-kira lima ntah enem kilometer dauhna.” (Johanes 6:​19) Arah ndauh nari idah kalak enda lit si tempa-tempa erdalan guna ngelewati kalak e, mbiar kalak e janah serko, “Begu!”​—Markus 6:​49.

Kenca si e, mis ikataken Jesus, “Petetap ukurndu! Aku nge enda, ula mbiar.” Ngaloi Petrus, “O Tuan, adi kam kin e, suruh min aku erdalan i datas lau ndahi kam.” Nina Jesus, “Mari!” Emaka nusur Petrus i bas perahu nari janah erdalan ia i datas lau ndahi Jesus. Tapi sanga inenna angin si meter, mbiar ia. Paksa mulai ia gedap, serko ia, “O Tuan, sampati aku!” Minter idudurken Jesus tanna, itangkapna ia janah nina, “Kam si kitik kinitekenndu, ngkai maka la tetap ukurndu?”​—Matius 14:​27-​31.

Nangkih Petrus ras Jesus ku datas perahu janah ngadi angin si meter e. Mamang kel ate murid-murid. Padahal piga-piga jam si lewat nggo idah kalak e Jesus mere man ribun kalak alu mukjizat. Adi nggo iangkai kalak e “erti mukjizat roti ndai,” aturna la ate kalak e mamang ngenen Jesus banci erdalan i datas lau janah mpengadi angin si meter. Erjimpuh kalak e man Jesus janah, nina, “Tuhu-tuhu me kam Anak Dibata.” ​—Markus 6:52; Matius 14:33.

La ndekah kenca si e, seh kalak enda i daerah si seh kel jilena janah mehumur tanehna, eme i Genesaret, sebelah selatan Kapernaum. Ngadi me perahu e, emaka nusur kalak e. I je, nterem kalak si nandai Jesus. Arah daerah e bage pe i sekelilingna, rehen jelma si nterem maba kalak si sakit ku Jesus. Sanga idadap kalak e ujung uis Jesus si arah darat, malem kalak e.

Jelma si nterem si ngenen Jesus mere man ribun kalak e sadar maka Jesus nggo lawes. Emaka paksa reh perahu-perahu si kitik arah Tiberias, inangkihi kalak e perahu-perahu e janah lawes ku Kapernaum guna ndarami Jesus. Kenca jumpa ras Jesus, nungkun kalak e, “O Guru, ndiganai kam seh i jenda?” (Johanes 6:​25) Emaka inasehati Jesus kalak enda. Engkai? Si e sibahas i bas pelajaren seterusna.