Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 44

Ipengadi Jesus Angin si Meter i Lawit

Ipengadi Jesus Angin si Meter i Lawit

MATIUS 8:18, 23-27 MARKUS 4:35-41 LUKAS 8:22-25

  • IPENGADI JESUS ANGIN SI METER I LAWIT

Enggo latih akap Jesus sada warin. Kenca ben, nina man murid-muridna, “Ota kita nyebrang ku pantai si deban,” maksudna ku sebrang kota Kapernaum.​—Markus 4:​35.

I sebelah timur Lawit Galilea lit daerah Gerasa. Daerah e pe igelari ka Dekapolis. Kota-kota Dekapolis me pusat budaya Junani, nterem ka kalak Jahudi tading i je.

Iteh kalak Kapernaum maka Jesus nandangi lawes. Lit piga-piga perahu si deban si ikut nyebrangi lawit e. (Markus 4:​36) Situhuna labo ndauh kalak e nyebrang. Lawit Galilea eme dano si mbelang, kira-kira 21 kilometer gedangna janah belangna kira-kira 12 kilometer. Tapi dano enda mbages nge.

Aminna pe Jesus manusia si sempurna, latih ka nge akapna perban sibuk ia erberita. Emaka kenca berkat perahu kalak e, medem Jesus make bantal i bas pudi perahu e.

Piga-piga rasul Jesus situhuna beluh maba perahu, tapi enda perdalanen si mesera. I sekeliling Lawit Galilea e melala deleng, emaka daerah lawit e rusur melas. Mon-mon, angin si mbergeh rembus bas deleng e nari ku daerah lawit si melas e, dungna terjadi me angin si meter i lawit. E me si terjadi gundari. Rempet ientam galumbang perahu e. “Mulai me masuk lau ku perahu e.” (Lukas 8:​23) Tapi tetap denga Jesus medem!

Minter iusahaken rasul-rasul e gelah ula gedap perahu e. Situhuna nggo biasa kalak e ngadapi angin si meter i lawit, tapi sekalenda angin e seh kel terna. Perban mbiar kalak e mate, imedakina Jesus janah nina, “O Tuan, sampati min! Enggo mate atena kita!” (Matius 8:​25) Akap rasul-rasul e gedap me kalak e!

Sanga medak Jesus, nina man kalak e, “Engkai maka mbiar kel kena, o kena si kitik kinitekenna?” (Matius 8:​26) Jenari iperentahken Jesus man angin ras lawit e, “Sinikken! Tenanglah!” (Markus 4:​39) Ngadi me angin e janah tenang me lawit e. (Markus ras Lukas pe iceritakenna kejadin si luar biasa enda. Tapi si pertama iceritaken kalak e mukjizat Jesus si erban angin si meter jadi tenang, jenari iceritaken kalak e kerna rasul-rasul si kurang kinitekenna.)

Cuba bayangkenndu uga perasan rasul-rasul e! Edenga idahna lawit si ergalumbang perban angin si meter janah gundari nggo seh kel tenangna. Emaka mbiar kalak e, ning kalak e sapih-sapih ia, “Ise kin situhuna ia? Angin ras lawit pe patuh man bana.” Selamat me kalak e seh i sebrang. (Markus 4:⁠41–5:⁠1) Banci saja perahu si deban si ikut ndai la surung nyebrang.

Pasti meriah ukurta meteh maka lit kuasa Anak Dibata nandangi angin si meter ras lawit! Sanga nggo merentah pagi Kerajanna ku doni enda, kerina kalak si nggeluh aman akapna erkiteken la lit bencana alam!