Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PASAL SEPULU EMPAT

Keluargandu Banci Ermeriah Ukur

Keluargandu Banci Ermeriah Ukur

1, 2. Kai sura-sura Jahwe nandangi keluarga?

DIBATA Jahwe si njadiken perjabun si pemena. Nina Pustaka si Badia, itepaNa diberu si pemena janah ”itaruhkenNa man manusia ndai”. Meriah kal ukur Adam janah nina, ”Tulanna i bas tulanku nari, janah jukutna i bas jukutku nari.” (Kejadin 2:22, 23) Enda ngajarken maka sura-sura Jahwe gelah kerina keluarga ermeriah ukur.

2 Sayangna, melala kalak la pernah ngenanami keriahen ukur i bas keluarga. Tapi, mbue prinsip i bas Pustaka si Badia si banci nampati anggota keluarga gelah keluargana berhasil janah ngenanami kemalemen ate.​—Lukas 11:28.

KAI SI NIARAPKEN DIBATA I BAS PERBULANGEN NARI

3, 4. (a) Uga arusna perbahanen perbulangen man ndeharana? (b) Engkai maka perbulangen ras ndehara arus nggit sialem-alemen?

3 Pustaka si Badia ngatakenca maka sekalak perbulangen si mehuli arus perkeleng dingen mehamat man ndeharana. Banci ogendu Epesus 5:25-29. Sekalak perbulangen arus terus ngkelengi ndeharana. Ia pe arus ngelindungi, njagai, janah la pernah ncilakai ndeharana.

4 Tapi kai si arus ilakoken perbulangen adi ndeharana erban kesalahen? Ipebetehken man perbulangen,  ’Teruslah kelengi ndeharandu janah ola kasar man bana.’ (Kolose 3:19) Perbulangen, ingetlah maka kam pe pernah erban salah. Janah adi ialemi Dibata atendu, kam pe arus ngalemi ndeharandu. (Matius 6:2, 14, 15) Adi perbulangen ras ndehara nggit sialem-alemen, perjabun kalak e ermeriah ukur.

5. Engkai maka arus iergai perbulangen ndeharana?

5 Jahwe ngarapken perbulangen ngergai ndeharana. Sekalak perbulangen arus ngukuri alu megermet kerna keperlun ndeharana. Enda sada hal si serius kal. Adi la mehuli perbahanen sekalak perbulangen man ndeharana, Jahwe la nggit megiken pertotonna. (1 Petrus 3:7) Si erbanca kita meherga i lebe-lebe Jahwe eme adi sikelengi Ia. Labo ergan iakapNa dilaki asangken diberu.

6. Kai nge ertina ndehara ras perbulangen nggo jadi ”sada”?

6 Ijelasken Jesus maka perbulangen ras ndehara ”lanai bo ia dua, tapi sada”. (Matius 19:6) Kalak enda arus setia sada ras si debanna janah ula pernah la siteken. (Kuan-kuanen 5:15-21; Heber 13:4) Perbulangen ras ndehara la banci mentingken bana i bas hubungen seks. (1 Korinti 7:3-5) Arus iinget perbulangen maka ’labo pernah lit kalak segat atena kulana. Tapi ipekena-kenana dingen ikawalina kulana e’. Emaka perbulangen arus ngkelengi ras ngergai ndeharana. Lebih asangken kai pe, ate ndehara gelah perbulangenna mehuli dingen ngkelengi ia.​—Epesus 5:29.

KAI SI NIARAPKEN DIBATA I BAS NDEHARA NARI

7. Engkai maka perlu lit kepala keluarga?

7 Tiap keluarga perlu sada kepala, si ngaturken gelah kerina anggota keluarga banci ras-ras ndahiken tugasna alu mehuli. Nina Pustaka si Badia i bas 1 Korinti  11:3, ”Kerina dilaki, Kristus takalna; diberu, dilaki takalna; Kristus, Dibata kepalana.”

8. Uga cara ndehara ncidahken maka ia mehamat man perbulangenna?

8 Kerina perbulangen pernah erban salah. Tapi, adi rela ndehara ndukung ras ndalanken keputusen perbulangen, enda erguna man keluarga. (1 Petrus 3:1-6) Nina Pustaka si Badia, ”Ndehara arus mehamat man perbulangenna.” (Epesus 5:33) Uga adi perbulangen la sada kiniteken ras ndeharana? Ia pe arus tetap nghamati perbulangenna. Nina Pustaka si Badia, ”Kam o ndehara, patuhlah man perbulangenndu, gelah adi perbulangen la tek nandangi Kata Dibata, banci ia tek erkiteken lagu langkahndu aminna gia la kam ngerana sengkebabah pe, sabap idahna maka mehuli dingen mehamat lagu langkahndu.” (1 Petrus 3:1, 2) Perbahanen ndehara si mehuli nampati perbulangenna ngangkai janah ngergai kinitekenna.

9. (a) Kai si banci ilakoken ndehara adi la sependapat ras perbulangenna? (b) Kai pedah-pedah man ndehara si lit i bas Titus 2:4, 5?

9 Kai si banci ilakoken ndehara adi la sependapat  ras perbulangenna? Banci iturikenna pendapatna alu mehamat. Contohna, paksa ikataken Sara kai si la bagi ukur Abraham, nina Jahwe, ”Bahanlah bagi si ikataken Sara.” (Kejadin 21:9-12) Biasana, keputusen perbulangen Kristen sentudu ras Pustaka si Badia, emaka ndehara arus ndukung perbulangenna. (Perbahanen Rasul-Rasul 5:29; Epesus 5:24) Ndehara si mehuli mperdiateken keluargana. (Oge Titus 2:4, 5.) Adi sekalak ndehara mejingkat, kekelengen bage pe pengergan perbulangen ras anak-anakna erbagesna man bana.​—Kuan-kuanen 31:10, 28.

Uga Sara jadi usihen man kerina ndehara?

10. Kai nina Pustaka si Badia kerna sirang ras simulihen?

10 Maun-maun lit pasangen si mis erban keputusen guna sirang ntah pe simulihen. Tapi, nina Pustaka si Badia ”sekalak ndehara la banci nadingken perbulangenna” janah ”sekalak perbulangen la banci ngulih-ken ndeharana”. (1 Korinti 7:10, 11) Ndehara banci nadingken perbulangenna adi ia ipekpeki ntah pe la ibelanjai, tapi kalak e labo simulihen. Enda keputusen si serius. Adi bage, kai dasar si sah maka banci simulihen? Nina Pustaka si Badia, perbulangen ntah pe ndehara banci simulihen adi teman geluhna erlua-lua.​—Matius 19:9.

KAI SI NIARAPKEN DIBATA I BAS ORANG TUA NARI

Jesus usihen man kerina anggota keluarga

11. Kai nge si perluna kal ibereken orang tua man anak-anakna?

11 Orang tua, berekenlah melala waktundu man anak-anakndu. Anakndu merluken kam, lebih asang-ken kai pe, kalak e merluken kam guna ngajari ia kerna Jahwe.​—Ulangen 6:4-9.

12. Kai nge si arus ilakoken orang tua guna njagai anak-anakna?

12 Doni Setan erdekahna reh jahatna, janah lit piga-piga  jelma si atena ncilakai anak-anakta, banci saja alu pelecehan seksual. Piga-piga orang tua mehangke ncakapken kerna si e. Tapi orang tua perlu mpersingeti anak-anakna kerna jelma si bage janah ngajari ia gelah ula ndeheri kalak e. Orang tua, jagailah anak-anakndu. *1 Petrus 5:8.

13. Uga arusna cara orang tua ngajari anak-anakna?

13 Orang tua ertanggung jabap ngajari anakna gelah mehuli perbahanenna. Uga carana ngajarisa?  Anakndu perlu ipersingeti, tapi ula kejam ntah pe kasar. (Jeremia 30:11) Emaka ula pernah disiplin anakndu paksa kam merawa. Pasti la kam nggit rananndu ”ngelukai ukur kalak desken pedang”. (Kuan-kuanen 12:18) Ajari anakndu gelah angkana ngkai maka arus ia patuh.​—Epesus 6:4; Heber 12:9-11; nehen Penjelasen tambahen 30.

KAI SI NIARAPKEN DIBATA I BAS ANAK-ANAK NARI

14, 15. Engkai maka anak-anak arus patuh man orang tuana?

14 I bas keadan si sulit pe, Jesus lalap patuh man Bapana. (Lukas 22:42; Johanes 8:28, 29) Jahwe pe ngarapken anak-anak gelah patuh man orang tua.​—Epesus 6:1-3.

15 Anak-anak, amin gia mesera akapndu patuh man orang tua, tapi adi kam tetap patuh, isenangkenndu ukur Jahwe ras orang tuandu. *Kuan-kuanen 1:8; 6:20; 23:22-25.

Kai si banci nampati anak muda gelah setia man Dibata paksa igoda ngelakoken kai si salah?

16. (a) Uga cara Setan nggoda anak-anak muda gelah ngelakoken kai si salah? (b) Engkai maka penting erteman ras kalak si ngkelengi Jahwe?

16 Iblis banci nggunaken temanndu ntah pe anak muda si deban guna nggoda kam ngelakoken si salah. Ietehna maka mesera kal ngelawan godan. Contohna, Dina, anak Jakup, erteman ras kalak si la ngkelengi Jahwe. Akibatna, terjadi melala masalah man bana ras man keluargana. (Kejadin 34:1, 2) Adi temanndu la ngkelengi Jahwe, banci igodana kam ngelakoken kai si la ngena ate Jahwe. Enda banci nakiti kam, keluargandu, bage pe Dibata. (Kuan-kuanen 17:21, 25) Emaka  penting kal erteman ras kalak si ngkelengi Jahwe.​—1 Korinti 15:33.

KELUARGANDU BANCI ERMERIAH UKUR

17. Kai tanggung jabap tiap anggota keluarga?

17 Adi kerina anggota keluarga ndalanken perentah Dibata, kalak enda ndauh i bas melala masalah. Emaka kam perbulangen, kelengilah ndeharandu ras mehuli min perbahanenndu man bana. Kam ndehara, mehamatlah dingen patuh man perbulangenndu janah usihlah perbahanen ndehara i bas Kuan-kuanen 31:10-31. Kam orang tua, ajarilah anakndu ngkelengi Dibata. (Kuan-kuanen 22:6) Adi kam sekalak bapa, pinpin keluargandu ”alu mehuli”. (1 Timotius 3:4, 5; 5:8) Janah anak-anak, patuhi orang tuandu. (Kolose 3:20) Ingetlah, kerina anggota keluarga pernah erban salah, emaka peteruklah ukurndu janah nggit sialem-alemen. Jelas me, i bas Pustaka si Badia lit pedah-pedah Jahwe man kerina anggota keluarga.

^ par. 12 Kam banci ndatken keterangen terbuen kerna uga cara ngelindungi anak-anakndu i bas pasal 32 buku Belajarlah dari sang Guru Agung, iterbitken Saksi-Saksi Jahwe. Buku enda lenga lit i bas cakap Karo.

^ par. 15 Anak-anak la perlu patuh man orang tuana adi ia isuruh ngelakoken kai si ertentangen ras hukum Dibata.​—Perbahanen Rasul-Rasul 5:29.