Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PASAL SEPULU DUA

Uga Kam Banci Jadi Teman Dibata?

Uga Kam Banci Jadi Teman Dibata?

1, 2. Ise saja teman Jahwe?

KALAK si uga atendu jadi temanndu? Pastilah kalak si meriah akapndu ras. Cocok kam ras ia, ia pe cocok ras kam. Kalak si mehuli lagu langkahna bage pe perbahanenna.

2 Jahwe milih piga-piga manusia jadi temanNa. Salah sada contohna Abraham. (Jesaya 41:8; Jakup 2:23) Jahwe pe keleng ateNa Daud. IkatakenNa kerna Daud ”ia me si ngena ateKu”. (Perbahanen Rasul-Rasul 13:22) Janah nabi Daniel pe ’keleng kal’ ate Jahwe.​—Daniel 9:23.

3. Engkai maka Abraham, Daud, ras Daniel banci jadi teman Jahwe?

3 Engkai maka Abraham, Daud, ras Daniel banci jadi teman Jahwe? Nina Jahwe man Abraham, ’Kam patuh man perentahKu.’ (Kejadin 22:18) Jahwe erteman ras kalak si alu meteruk rukur patuh man baNa. Sada bangsa pe banci jadi temanNa. Nina Jahwe man bangsa Israel, ”Perentah si Kubereken e me maka erkemalangen man bangKu, gelah Aku jadi Dibatana dingen ia jadi bangsangKu.” (Jeremia 7:23) Emaka, arus kam patuh man Jahwe adi tuhu-tuhu nggit kam jadi temanNa.

JAHWE NGELINDUNGI TEMAN-TEMANNA

4, 5. Uga cara Jahwe ngelindungi teman-temanNa?

4 Pustaka si Badia ngatakenca, ’Iperdiateken Jahwe  kerina doni enda, gelah iberekenNa gegeh man kalak si setia man baNa.’ (2 Kronika 16:9) I bas Masmur 32:8, Jahwe erjanji man teman-temanNa, ”Aku nuduhken dalan si man dalanenndu, Kuajarken kam dingen matangKu tetap mperdiateken kam.”

5 Lit sada musuh si megegeh, si atena mpengadi kita jadi teman Dibata. Tapi Jahwe pasti ngelindungi kita. (Oge Masmur 55:23.) Selaku teman Jahwe, kita ngelayani Ia alu bulat ukur. Kita setia man baNa amin gia ngadapi situasi si sulit. Janah kinitekenta seri bagi salah sada si nulis buku Masmur. Isuratkenna kerna Jahwe, ”Tetap kugejap maka Dibata ndeher kap ras aku, gelah aku tetap paguh.” (Masmur 16:8; 63:8) Kai si ilakoken Setan gelah kita la jadi teman Dibata?

TUDUHEN SETAN

6. Kai si ikataken Setan kerna manusia?

6 I bas Pasal 11 nggo sipelajari maka Setan nentang Jahwe janah ituduhna Jahwe perbual bage pe la adil erkiteken la niijinkenNa Adam ras Hawa mutusken man dirina sendiri kerna kai si benar ras si salah. Buku Jop mpebetehken man banta maka Setan pe nuduh manusia si nggit jadi teman Dibata. Ikatakenna kalak e ngelayani Dibata erkiteken lit si iarapkenna i bas Dibata nari, labo erkiteken keleng atena Ia. Ikatakenna ka maka banci ibanna kerina kalak nentang Dibata. Mari sinehen kai si banci sipelajari i bas Jop nari janah uga Jahwe ngelindungi ia.

7, 8. (a) Jelma si uga kin Jop e? (b) Kai nina Setan kerna Jop?

7 Ise kin Jop e? Ia sekalak dilaki si nggeluh kira-kira 3.600 tahun si nggo lewat. Nina Jahwe, i bas paksa si e la lit si bagi ia i doni. Patuh kal Jop man Dibata, janah  nembeh kal atena nandangi kai si la mehuli. (Jop 1:8) Jelas me, Jop tuhu-tuhu teman Jahwe.

8 Ikataken Setan maka Jop ngelayani Dibata gelah ndatken keuntungen saja. Nina Setan man Jahwe, ”Gelgel nari ikawaliNdu ia ras isi jabuna bage pe sikerajangenna kerina. Ipasu-pasuNdu kai si ilakokenna, janah iberekenNdu man baNa mbue lembu seh dem negeri e. Tapi genduari, bicara ibuatNdu kerina si lit i bas ia, ugapa pe isumpahina Kam i adep-adepenNdu.”​—Jop 1:10, 11.

9. Jahwe ngijinken Setan ngelakoken kai?

9 Setan nuduh Jop ngelayani Dibata erkiteken ngarapken pasu-pasu saja ngenca atena. Ikataken Setan ka maka banci ipengadina Jop ngelayani Jahwe. Jahwe la setuju nandangi kai si ikataken Setan, tapi gelah terbukti maka Jop nggit jadi teman Jahwe erkiteken keleng atena Jahwe ntah lang, niijinkenNa Setan ncubai Jop.

JOP IUJI SETAN

10. Uga cara Setan nguji Jop, ras kai tanggapenna?

10 Si pemena, ikernepken Setan kerina rubia-rubia Jop. Kenca si e, mbue suruh-suruhen Jop ibunuh. Bene me kerina ertana. Dungna, ibunuhna ka sepuluh anak-anak Jop alu angin si meter. Tapi Jop tetap setia man Jahwe. ”I bas kerina kejadin enda ndai Jop la erdosa, sabap la ia nggit nalahken Dibata.”​—Jop 1:12-19, 22.

Jahwe masu-masu Jop erkiteken ia teman si setia

11. (a) Kai ka si ilakoken Setan man Jop? (b) Kai tanggapenna?

11 Setan la nggit talu. Itentangna Dibata, nina, ”Bicara isakitiNdu badanna, ugapa pe isumpahina nge Kam i adep-adepenNdu.” Emaka Setan erban Jop ngenanami penakit si mekelek. (Jop 2:5, 7) Amin gia bage, Jop tetap setia man Jahwe. Nina, ”Ngayak mate tetap aku ertahan maka aku bujur.”​—Jop 27:5.

12. Uga Jop mbuktiken maka Setan e perbual?

 12 Sitik pe la ieteh Jop kerna tuduhen Setan, ntah pe ngkai maka melala kal kiniseranna. Iakapna Jahwe si erban kiniseranna. (Jop 6:4; 16:11-14) Amin gia bage, Jop tetap setia man Jahwe. Gundari nggo terbukti. Jop labo mentingken dirina saja. Ia jadi teman Dibata erkiteken keleng atena Jahwe. Kerina tuduhen Setan terbukti salah!

13. Kai hasil kesetian Jop?

13 Amin gia la ieteh Jop kai si terjadi i surga, ia tetap setia man Dibata janah ibuktikenna maka Setan e jahat. Jahwe masu-masu Jop erkiteken ia teman si setia.​—Jop 42:12-17.

UGA CARA SETAN NUDUH KITA

14, 15. Kai tuduhen Setan man kerina manusia?

14 Banci sidatken pelajaren si penting i bas situasi Jop. Gundari pe, Setan nuduh kita ngelayani Jahwe erkiteken ngarapken pasu-pasu saja. I bas Jop 2:4 ikataken Setan, ”Keri gia kai pe labo akap kalak dalih guna ngkelengi kesahna.” Alu bage labo Jop ngenca ituduh Setan tapi kerina manusia ituduhna mentingken bana. Ratusen tahun kenca Jop mate, Jahwe ras juak-juakNa tetap ituduh Setan. Emaka Kuan-kuanen 27:11 ngatakenca, ”O anakku jadilah pentar dingen bahanlah meriah ateku, gelah lit jabapenku nandangi kalak si mandang aku.”

15 Banci ipilihndu patuh man Jahwe ras jadi temanNa si setia, janah mbuktiken Setan e perbual. Amin gia arus kam erban perubahen si mbelin i bas kegeluhenndu gelah banci jadi teman Dibata, enda keputusen si mehulina kal si banci ibahanndu! Keputusen enda  serius kal. Nina Setan, adi kam ngenanami kiniseran lanai bo kam setia man Dibata. Icubakenna rusur nipu kita gelah lanai setia man Dibata. Uga carana?

16. (a) Kai saja cara si igunaken Setan gelah manusia ngadi ngelayani Jahwe? (b) Kai cara si banci saja igunaken Setan gelah kam ngadi ngelayani Jahwe?

16 Melala cara si igunaken Setan gelah kita ngadi jadi teman Dibata. Iserangna kita ”bagi sada singa si erngaung ndarami si man jerngemenna”. (1 Petrus 5:8) Ula kam sengget paksa lit temanndu, kade-kade, ntah pe jelma si deban merawa adi kam erlajar Pustaka si Badia janah ngelakoken kai si mehuli. Banci saja iakapndu kam iserang. * (Johanes 15:19, 20) Selain si e, Setan pe iubahna dirina ”bali ras malekat terang”. Emaka banci saja itipuna kita gelah la patuh man Jahwe. (2 Korinti 11:14) Cara si deban si igunaken Setan eme erban kita erpengakap maka kita la pernah metunggung ngelayani Dibata.​—Kuan-kuanen 24:10.

PATUH MAN PERENTAH-PERENTAH JAHWE

17. Engkai maka kita patuh man Jahwe?

17 Paksa kita patuh man Jahwe, sibuktiken maka Setan e perbual. Kai si banci nampati kita gelah patuh? Pustaka si Badia ngatakenca, ”Kelengilah [JAHWE] Dibatandu asa ukurndu, asa tendindu, asa gegehndu lit.” (Ulangen 6:5) Kita patuh man Jahwe erkiteken keleng ateta Ia. Reh belinna kekelengenta man Jahwe, reh  belinna sura-suranta ngelakoken kerina si ipindoNa. Isuratken rasul Johanes, ”Ngkelengi Dibata ertina patuh man perentah-perentahNa. Perentah-perentahNa labo mberat.”​—1 Johanes 5:3.

18, 19. (a) Kai saja si ciga ate Jahwe? (b) Janari banci sieteh maka la pernah isuruh Jahwe kita ngelakoken kai si la banci silakoken?

18 Kai saja si ciga ate Jahwe? Lit piga-piga contoh i bas kotak ” Cigalah Atendu Nandangi Kai si Ciga Ate Jahwe”. Tangtangna, mungkin iakapndu piga-piga hal enda labo salah kal. Tapi paksa ogendu ayat-ayat Pustaka si Badia janah iukurindu alu megermet, banci iangkaindu maka erguna kepeken patuh man hukum Jahwe. Dungna igejapkenndu maka perlu erbahan perubahen i bas geluhndu. Amin gia maun-maun mesera ngelakokenca, tapi adi ilakokenndu e, banci gejapkenndu kedamen ras keriahen ukur erkiteken nggo jadi teman Dibata si setia.  (Jesaya 48:17, 18) Janari banci sieteh maka kita ngasup erban perubahen e?

19 La pernah isuruh Jahwe kita ngelakoken kai pe si la banci silakoken. (Ulangen 30:11-14) Selaku temanta situhu-tuhu, itandaiNa uga kita lebihen asangken kita nandai banta. ItehNa kiningasupenta ras kelemahenta. (Masmur 103:14) Nina Rasul Paulus, ”Dibata setia nge i bas padanNa. Labo ipelepasNa kam icubai lebih asa gegehndu. Asum kam ngenanami percuban, iberekenNa nge gegeh man bandu gelah ngasup kam nggengkenca, janah radu ras si e iberekenNa pe dalan pulah.” (1 Korinti 10:13) Kita banci tek maka ibereken Jahwe lalap gegeh man banta guna ngelakoken kai si benar. Banci iberekenNa man bandu ”gegeh si mbelin” guna nampati kam gelah megenggeng i bas ngadapi keadan si mesera. (2 Korinti 4:7) Kenca igejapken Paulus penampat Jahwe, banci ikatakenna, ”Ngasup aku ngalaken kerina keadan  erkiteken kuasa si ibereken Kristus man bangku.”​—Pilipi 4:13.

ERLAJAR NGKELENGI KAI SI IKELENGI JAHWE

20. Sifat-sifat kai si arus iusihndu, janah ngkai?

20 Adi ateta jadi teman Jahwe, ulanai silakoken kai si salah iakap Jahwe, tapi lit ka si arus silakoken. (Roma 12:9) Teman Dibata ngkelengi kai si ikelengi Dibata. Enda ituriken i bas Masmur 15:1-5. (Oge.) Teman Jahwe ngusih sifat-sifatNa janah ncidahken ”kekelengen, keriahen, kemalemen ate, kesabaren, perbahanen si mehuli, mehuli, setia, meteruk ukur, dingen ngasup ngkuasai diri”.​—Galati 5:22, 23.

21. Uga kam banci erlajar ncidahken sifat-sifat si mehuli e?

21 Uga kam banci erlajar ncidahken sifat-sifat si mehuli e? Oge ras pelajarilah Pustaka si Badia gelah ietehndu kai si ngena ate Jahwe. (Jesaya 30:20, 21) Adi terus ilakokenndu e, kekelengenndu man Jahwe reh bagesna, janah adi kekelengenndu man Ia reh bagesna, kam ersura-sura patuh man baNa.

22. Kai upahna adi kam patuh man Jahwe?

22 Perubahen si ibahanndu i bas geluhndu banci iandingken bagi nangtangi uis si male janah makeken uis si mbaru. Nina Pustaka si Badia perlu ”itangtangindu manusia si male” janah pakekenlah ”manusia si mbaru”. (Kolose 3:9, 10) Amin gia enda la menukah, tapi paksa kam erban perubahen janah patuh man Jahwe, Ia erjanji mereken kam ’upah si mbelin’. (Masmur 19:12) Emaka pilihlah patuh man Jahwe, janah buktiken Setan perbual. Layani Jahwe labo erkiteken pasu-pasu i bas wari si pepagi, tapi erkiteken keleng ate si la mentingken bana. Emaka, kam banci jadi teman Dibata situhu-tuhu!

^ par. 16 Enda labo ertina Setan si ngendaliken kalak si erusaha erban kita ngadi erlajar Pustaka si Badia. Tapi, erkiteken Setan penguasa doni enda janah banci mpepentang ukur kalak, emaka la kita sengget adi lit piga-piga kalak erusaha erban kita ngadi ngelayani Jahwe.​—2 Korinti 4:4;1 Johanes 5:19.