Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PASAL SEPULU ENEM

Sembahlah Dibata

Sembahlah Dibata

1, 2. Penungkunen kai nge si arus isungkunndu man dirindu, janah ngkai maka e penting?

KENCA erlajar Pustaka si Badia, nggo ietehndu maka melala jelma si ngaku nembah Dibata tapi situhuna ngajarken ntah pe ngelakoken kai si nembeh ate Dibata (2 Korinti 6:17) Eme sabapna Jahwe merentahken kita gelah ndarat i bas agama palsu nari, ”Babilon si Mbelin”. (Ketangkasen 18:2, 4) Kai si arus ilakokenndu? Kita kerina arus erban pilihen, janah arus sisungkuni banta, ’Kusembah nge Dibata alu cara si ngena ateNa, ntah kusembah Ia alu carangku sendiri?’

2 Adi nggo ndarat kam bas agama palsu nari, mehuli. Tapi mungkin lit piga-piga kebiasan ras adat i bas agama palsu nari si meriah denga akapndu. Mari sibahas piga-piga kebiasan ras adat enda, janah sinehen ngkai maka penting perukurenta arus bali bagi perukuren Jahwe.

PENEMBAHEN PATUNG RAS NINI-NINI SI NGGO MATE

3. (a) Engkai maka mesera iakap piga-piga kalak nembah Dibata adi la nggunaken patung? (b) Kai si ikataken Pustaka si Badia kerna nggunaken patung i bas nembah Dibata?

3 Piga-piga kalak make patung ntah pe erban ingan ersembah i rumahna guna nembah Dibata ertahun-tahun dekahna. Adi lakokenndu e, mungkin lit akapndu si kurang ntah pe salah adi lanai igunakenndu e. Tapi ingetlah, Jahwe si ngajarken man banta uga cara nembah Ia. Pustaka si Badia ngataken alu tangkas maka  Jahwe la senang adi sigunaken patung i bas nembah Dibata.​—Oge Keluaren 20:4, 5; Masmur 115:4-8; Jesaya 42:8; 1 Johanes 5:21.

4. (a) Engkai maka la banci si sembah nini-nininta si nggo mate? (b) Engkai maka ilarang Jahwe umatna ngerana ras kalak mate?

4 Piga-piga kalak mereken melala waktu ras gegehna gelah meriah ukur nini-ninina si nggo mate. Mungkin isembahna ka kalak si nggo mate ndai. Tapi nggo sipelajari maka kalak si nggo mate lanai banci nampati ntah pe ncilakai kita. Kalak e la nggeluh i bas ingan si deban. Janah bahaya adi sicubaken ngerana ras kalak mate, erkiteken kata-kata kalak enda situhuna i bas begu-begu nari. Eme sabapna Jahwe ngelarang kalak Israel ngerana ras kalak mate ntah pe erban hubungen ras begu-begu.​—Ulangen 18:10-12; nehen Penjelasen tambahen 26 ras 31.

5. Kai si banci nampati kam gelah lanai nggunaken patung ntah pe nembah nini-ninindu si nggo mate?

5 Kai si banci nampati kam gelah lanai nggunaken patung ntah pe nembah nini-ninindu si nggo mate? Perlu iogendu Pustaka si Badia janah ukuri alu mbages uga perukuren Jahwe kerna si e. ”Nembeh” ntah pe ciga ate Jahwe nandangi berhala. (Ulangen 27:15) Ertotolah mindo penampat Jahwe tiap wari gelah perukurenndu seri bagi perukurenNa janah banci nampati kam nembah Ia alu cara si ngena ateNa. (Jesaya 55:9) Kam banci tek maka Jahwe pasti mereken gegeh gelah banci itadingkenndu kerina si lit hubungenna ras agama palsu.

BANCI NGE SIRAYAKEN NATAL?

6. Engkai maka tanggal 25 Desember ipilih jadi wari ketubuhen Jesus?

6 I belang-belang doni, Natal salah sada wari raya  si seh kal terkenalna, janah nterem jelma erpengakap enda wari perayan ketubuhen Jesus. Tapi situhuna, Natal lit hubungenna ras agama palsu. Sada kamus si lengkap njelasken maka kalak si nembah berhala i Roma ngerayaken wari ketubuhen matawari bas tanggal 25 Desember. Peminpin Gereja ersura-sura gelah kalak si nembah berhala e jadi kalak Kristen, emaka amin gia Jesus la tubuh i bas tanggal 25 Desember, kalak e erban keputusen guna ngerayaken ketubuhen Jesus i bas tanggal e. (Lukas 2:8-12) Ajar-ajar Jesus la ngerayaken Natal. Lit sada buku si njelasken maka dua ratus tahun kenca ketubuhen Jesus, ”la lit si metehsa, janah sitik kal jelma si ermediate, ndigan tepatna ia tubuh”. (Sacred Origins of Profound Things) Natal mulai irayaken piga-piga ratus tahun kenca Jesus mate.

7. Engkai maka kalak Kristen si tuhu-tuhu la ngerayaken Natal?

7 Enterem jelma meteh maka Natal ras tradisina, bagi pesta ras mereken hadiah rehna i bas agama palsu nari. Contohna, mbarenda i Inggris ras negara bagin Amerika, Natal pernah ilarang. Ise si ngerayakenca iukum. Tapi dungna nterem jelma ngerayaken Natal mulihi. Engkai kalak Kristen si tuhu-tuhu la ngerayaken Natal? Erkiteken ate kalak e erban meriah ukur Dibata.

BANCI NGE SIRAYAKEN ULANG TAHUN?

8, 9. Engkai maka kalak Kristen si mbarenda la ngerayaken ulang tahun?

8 Perayan terkenal si debanna eme ulang tahun. Banci kin kalak Kristen ngerayakenca? I bas Pustaka si Badia icatat kalak si la nembah Jahwe ngenca si ngerayaken ulang tahun. (Kejadin 40:20; Markus 6:21) Perayan ulang tahun ilakoken guna nghamati dewa-dewa palsu. Eme sabapna ikataken kalak Kristen si mbarenda  ”perayan ulang tahun sada kebiasan agama palsu”.​—The World Book Encyclopedia.

9 Kalak Roma ras kalak Junani si nai, tek maka lit sada roh si reh paksa sekalak jelma tubuh janah roh enda me si ngkawali kalak e segedang geluhna. ”Roh enda lit hubungenna ras dewa-dewa si wari ketubuhenna seri ras kalak ndai,” nina buku The Lore of Birthdays.

10. Engkai maka kalak Kristen si gundari la ngerayaken ulang tahun?

10 Adi menurutndu ngena nge ate Jahwe perayan si lit hubungenna ras agama palsu? (Jesaya 65:11, 12) Lang. Eme sabapna ngkai maka kita la ngerayaken ulang tahun ntah pe wari raya si lit hubungenna ras agama palsu.

MASALAH SI PENTING KIN ENDA?

11. Engkai piga-piga kalak ngerayaken perayan-perayan e? Kai si arusna lebih penting i bas geluhndu?

11 Piga-piga kalak meteh maka Natal ras wari raya si debanna rehna i bas agama palsu nari, tapi tetap denga irayakenna. Iakap kalak enda perayan e sada kesempaten si mehuli guna pulung ras keluargana. Bage nge menurutndu? Labo salah pulung ras keluarga. Jahwe si nepa keluarga, ateNa gelah kita rembak ras keluarga. (Epesus 3:14, 15) Tapi, hubungen si mehuli ras Jahwe ndauh pentingen asangken erban meriah ukur kade-kadenta alu ngerayaken perayan agama palsu. Eme sabapna nina rasul Paulus, ”Daramilah kai si ngena ate [Jahwe].”​—Epesus 5:10.

12. Kai nge si erbanca maka perayan e la ngena ate Jahwe?

12 Enterem jelma erpengakap la jadi masalah janari asalna perayan e, tapi Jahwe la erpengakap bage. La  ngena ateNa perayan si asalna i bas agama palsu nari ntah pe si lit hubungenna ras penembahen man manusia bage pe lambang-lambang negara. Contohna, melala perayan kalak Mesir itujuken man dewa-dewa palsu. Kenca kalak Israel ndarat i bas Mesir nari, ibuatna sada perayan kalak Mesir janah ikatakenna ’pesta guna [JAHWE]’. Tapi iukum Jahwe kalak e erkiteken kai si ilakokenna. Bagi si ikataken nabi Jesaya, ”Ola jemak barang si pantang!”​—Oge Jesaya 52:11

MEHULILAH PAKSA ERURUSEN RAS JELMA SI DEBAN

13. Penungkunen kai si mungkin lit i bas sekalak jelma paksa lanai ngerayaken perayan e?

13 Paksa lanai irayakenndu perayan e, banci saja melala penungkunenndu. Contohna: Kai si arus kukataken adi teman sada dahinku nungkun ngkai aku la ngerayaken Natal? Kai si arus kulakoken adi lit sekalak jelma mereken hadiah Natal? Kai si arus kulakoken adi teman geluhku ngarapken aku ikut ngerayakenca? Uga carana banci kusampati anakku gelah ula kitik ukurna erkiteken la ngerayaken wari ulang tahunna ntah pe perayan si deban?

14, 15. Kai si banci ilakokenndu adi lit sekalak jelma ngataken selamat ntah pe mereken hadiah?

14 Gunakenlah pertimbangen si mehuli gelah meteh kai si man katanken ras kai si perlu ilakoken i bas tiap keadan. Contohna, adi lit jelma ngataken selamat i bas perayan e, la perlu silahindu ia. Banci katakenndu, ”Bujur”. Tapi adi lit sekalak jelma si merhat meteh terbuen ngkai maka la irayakenndu perayan e, banci jelaskenndu bana. Tapi, arus kam mehuli, bijaksana, janah mehamat. Nina Pustaka si Badia, ”Mehuli  dingen ngena min ate kalak cakapndu. Janah arus ietehndu mereken jabap si tepat man ise pe.” (Kolose 4:6) Banci turikenndu maka meriah nge ukurndu pulung ras teman-teman ras mereken hadiah tapi adi la lit hubungenna ras perayan-perayan ndai.

15 Kai si arus ilakokenndu adi lit si mereken hadiah? Pustaka si Badia la mereken daftar peraturen, tapi ikatakenna arus sijaga pusuh peratenta. (1 Timotius 1:18, 19) Mungkin si mereken hadiah e la ietehna maka kam la ngerayaken perayan e. Ntah pe banci saja ikatakenna, ”Kueteh nge kam la ngerayaken perayan e, tapi kubereken ateku enda bandu.” I bas keadan si e, banci putuskenndu alokenndu ntah lang hadiah e. Tapi, kai pe keputusenndu, jagalah pusuh peratenndu gelah tetap bersih. La kita nggit ngelakoken kai pe si banci ncedai hubungenta ras Jahwe.

KAM RAS KELUARGANDU

Kalak si nembah Jahwe pasti ermeriah ukur

16. Kai si arus ilakokenndu adi ate keluargandu ngerayaken perayan e?

16 Kai si arus ilakokenndu adi ate keluargandu ngerayaken perayan e? Kam la perlu rubat ras ia. Ingetlah, lit hakna mutusken kai si arus ilakokenna. Tetaplah mehuli ras mehamat nandangi keputusenna bagi kam pe senang adi keputusenndu ihamati. (Oge Matius 7:12.) Tapi adi ate keluargandu kam ikut ras ia ngerayaken perayan e, kai si arus ilakokenndu? Sope lenga erban keputusen ertotolah man Jahwe mindo penampatNa gelah kam banci erban keputusen si mehuli. Ukuri uga situasina janah pelajari bahan-bahan si banci nampati kam. Ingetlah, sura-surandu erban meriah ukur Jahwe.

17. Kai si banci ilakokenndu guna nampati anakndu gelah ula kitik ukurna paksa kalak si deban ngerayaken perayan e?

 17 Kai si banci ilakokenndu guna nampati anakndu paksa idahna kalak si deban ngerayaken perayan e? Banci iaturndu i bas waktu-waktu tertentu mereken kai si khusus isikapkenndu man bana, misalna hadiah. Tapi pemere si mehulina kal si banci iberekenndu eme waktu ras kekelengenndu.

DALANKEN AGAMA SI BENAR

18. Engkai maka penting reh ku perpulungen alu ratur?

18 Gelah meriah ukur Jahwe, arus sitadingken agama palsu bage pe kebiasan ras perayan si lit hubungenna ras si e. Tapi arus ka sidalanken agama si benar. Uga carana? Salah sada eme reh ku perpulungen alu ratur. (Oge Heber 10:24, 25.) Perpulengen sada bagin si penting i bas agama si benar. (Masmur 22:22; 122:1) Sanga kita pulung banci sipegegehi sada ras si debanna.​—Roma 1:12.

19. Engkai maka penting kal nuriken man jelma si deban kerna kebenaren si nggo ipelajarindu i bas Pustaka si Badia?

19 Bagin penting si debanna i bas agama si benar eme nuriken man jelma si deban kerna kai si nggo ipelajarindu. Enterem jelma latih ukurna ngidah kejahaten. Mungkin tandaindu piga-piga kalak si bage. Turiken man bana kerna arapen si luar biasa i bas wari si pepagi. Adi reh kam ku perpulungen janah pebetehkenndu man jelma si deban kerna kebenaren i bas Pustaka si Badia, banci igejapkenndu maka kam lanai nggit jadi bagin i bas agama palsu ras kebiasanna. Pasti meriah ukurndu janah Jahwe pe mereken pasu-pasu si mbelin nandangi pengorbanenndu erkiteken milih nembah Ia alu cara si benar.​—Maleaki 3:10.