Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PASAL SIWAH

Enggo nge Ndeher Kedungen Doni Enda?

Enggo nge Ndeher Kedungen Doni Enda?

1. Janari banci sieteh kerna wari si pepagi?

PERNAH nge tontonndu berita, kenca si e rukur, ’Ngkai maka reh kelekna keadan doni enda?’ Lit melala kejadin si la mehuli bage pe kejahaten si erbanca piga-piga kalak tek maka kita reh deherna ku kedungen doni enda. Payo nge bage? Lit nge cara gelah meteh kai si terjadi i bas wari si pepagi? Lit. Amin gia manusia la banci meteh kai si nandangi terjadi, Jahwe banci. IkatakenNa bas Pustaka si Badia kerna masa depanta bage pe doni enda.​—Jesaya 46:10; Jakup 4:14.

2, 3. Ajar-ajar Jesus merhat kal meteh kerna kai, ras kai jabap Jesus?

2 Paksa sioge Pustaka si Badia kerna kedungen doni enda, labo ertina kedungen planet doni enda, tapi kedungen kalak si jahat. Jesus ngajarken maka Kinirajan Dibata pagi si ngkuasai doni enda. (Lukas 4:43) Merhat kal ajar-ajarna meteh ndigan Kinirajan e reh, emaka isungkunna Jesus, ”Ndigan kin kerina enda jadi? Kai nge pagi tanda-tanda kerehenndu dingen kai nge pagi tanda-tanda kedungen jaman enda?” (Matius 24:3) La ipebetehken Jesus man ajar-ajarna tanggal piga e terjadi, tapi ikatakenna kai si terjadi ope denga kedungen doni enda. Kai si ikataken Jesus e, paksana terjadi gundari.

3 I bas pasal enda sipelajari bukti maka kita nggeluh tepat i bas masa ope denga kedungen doni enda. Si pemena,  perlu sipelajari sada perang si terjadi i surga gelah banci sieteh ngkai maka kejadin-kejadin si la mehuli terjadi i doni enda.

PERANG I SURGA

4, 5. (a) Kai si terjadi i surga kenca Jesus jadi Raja? (b) Bagi si ikataken Ketangkasen 12:12, kai si terjadi i doni kenca Setan isampetken?

4 I bas Pasal 8 nggo sipelajari maka Jesus jadi Raja i surga i bas tahun 1914. (Daniel 7:13, 14) Buku Ketangkasen ngatakenca, maka terjadi me ”perang i Surga. Mikael [Jesus] ras malekat-malekatna erperang ngelawan naga e [Setan]. Janah naga e ras malekat-malekatna ngelawan Mikael”. * Setan ras begu-beguna talu, kenca e isampetken ku doni. Bayangken uga riahna akap malekat-malekat! Tapi kai si terjadi nandangi manusia i doni? Pustaka si Badia ngatakenca maka enda pagi jadi masa si dem alu perbeben. Engkai? Erkiteken merawa kal Iblis sabap ”ietehna maka kentisik nari ngenca kesempaten lit i bas ia”.​—Ketangkasen 12:7, 9, 12.

5 Iblis erban melala perbeben i doni enda. Merawa kal ia erkiteken ietehna maka kentisik nari ngenca waktuna sope Dibata ngkernepken ia. Mari sipelajari kai si ikataken Jesus kerna peristiwa si terjadi i bas wari-wari pendungi.​—Nehen Penjelasen tambahen 24.

WARI-WARI PENDUNGI

6, 7. Jelasken kerna perang ras kelihen si terjadi gundari.

6 Perang. Nina Jesus, ”Bangsa pagi ngelawan bangsa, kerajan ngelawan kerajan.” (Matius 24:7) Buen  jelma mate sanga perang bas jamanta asangken bas jaman-jaman si deban. Menurut laporen Lembaga Pengamat Dunia, mulai tahun 1914, nggo 100 juta kalak mate erkiteken perang. I bas 100 tahun saja, mulai tahun 1900 ngasa tahun 2000, lit telu kali lipat buen kalak si ibunuh bas perang asangken kalak si ibunuh sope tahun 1.900. Bayangken kiniseran ras kinisuin si inanami jutan jelma erkiteken perang!

7 Kelihen. Nina Jesus, ”I jah-i je terjadi kelihen.” (Matius 24:7) Amin gia lalan pangan si iasilken gundari asangken tahun-tahun si nggo lewat tapi mbue kalak la bias nakan panganna. Engkai? Erkiteken la bias senna nukur pangan ntah pe erjuma. Lebih sada miliar kalak, sitik kal ngenca pendapatenna bas sada wari. Nina Organisasi Kesehaten Dunia, tiap tahun jutan anak-anak mate, lalan erkiteken kelihen!

8, 9. Kai si mbuktiken maka nubuat Jesus kerna linur ras penakit nggo terjadi?

8 Taneh linuren. Inubuatken Jesus, ”Ijapa pe terjadi pagi taneh  linuren.” (Lukas 21:11) Gundari melala linur si megegeh terjadi tiap tahun. Mulai tahun 1900, lebih dua juta manusia nggo mate erkiteken linur. Amin gia alat si canggih banci lebih meter mereken persinget asangken alat si mbarenda, tapi tetap saja melala jelma mate.

9 Penakit. Nina Jesus lit pagi ”penakit”. Penakit berbahaya pedas ngelangketi janah munuh melala jelma. (Lukas 21:11) Amin gia dokter-dokter nggo erlajar uga cara nambari melala penakit, tapi tetap saja lit penakit si la banci itambari. Sada laporen ngataken maka tiap tahun jutan jelma mate erkiteken tuberkulosis, malaria ras kolera. Labo e saja, lit 30 penakit si mbaru, janah piga-piga lenga banci itambari.

UGA NGE SIFAT-SIFAT JELMA I BAS WARI-WARI PENDUNGI

10. Kai buktina maka 2 Timotius 3:1-5 nggo terjadi gundari?

10 Nina 2 Timotius 3:1-5, ”I bas wari-wari pendungi pagi mbue reh kiniseran.” Ituriken rasul Paulus uga sifat nterem  jelma i bas wari-wari pendungi. Ikatakenna maka jelma pagi

  • nggeluh ngukurken dirina saja

  • merangap

  • la ibegikenna nande bapana

  • la setia

  • reh kurangna kekelengen i bas keluarga

  • la banci ngkuasai dirina

  • la ralang-alang merawa dingen merampus

  • lanai diatena Dibata, tapi kesenangen saja idaramina

  • tempa-tempa ngkelengi Dibata, tapi situhuna lang

11. Menurut Masmur 92:8 kai si nandangi terjadi man kalak jahat?

11 Bage nge sifat-sifat jelma isekelewetndu? I belang-belang doni bage me sifat-sifat jelma. Tapi kentisik nari Dibata erban sada tindaken. Ia erjanji, ”Engkai maka kalak jahat turah mehumur desken dukut, kalak si ilat reh bayakna dingen sikap  geluhna. Tapi nandangi meripuk me ia kerina.”​—Masmur 92:8.

BERITA SI MERIAH I BAS WARI-WARI PENDUNGI

12, 13. Kai si iajarken Jahwe man banta i bas wari-wari pendungi?

12 Nina Pustaka si Badia i bas wari-wari pendungi, doni enda dem alu kinisuin ras kiniseran. Tapi nina Pustaka si Badia lit ka hal-hal si mehuli si terjadi.

”Berita Si Meriah kerna Kinirajan e iberitaken man manusia i belang-belang doni enda.”​—Matius 24:14

13 Pemeteh kerna Pustaka si Badia reh jelasna. Isuratken nabi Daniel nubuat kerna wari-wari pendungi. Nina, ”Kalak pentar ngenca pagi ngerti.” (Daniel 12:9, 10) Dibata mereken kiningasupen man umatNa guna ngangkai isi Pustaka si Badia alu lebih jelas. Jahwe ngelakoken enda khususna mulai tahun 1914. Contohna, iajarkenNa kebenaren kerna gelarNa, sura-suraNa nandangi doni enda, tebusen, keadan kalak mate ras kinikeken. Enggo sipelajari Kinirajan Dibata ngenca si ngasup nasapken kerina perbebenta. Ras erlajar carana ndatken keriahen ukur bage pe ndalani kegeluhen si ngena ate Dibata. Tapi, kai si nilakoken umat Dibata nandangi pemeteh e? Nubuat si deban mereken jabapna.​—Nehen Penjelasen tambahen 21 ras 25.

14. I ja saja nge berita si meriah kerna Kinirajan e iberitaken, janah ise si mberitakenca?

14 Dahin erberita si meriah i belang-belang doni. Paksa Jesus nuriken kerna wari-wari pendungi, ikatakenna, ”Berita si Meriah kerna Kinirajan e iberitaken man manusia i belang-belang doni enda.” (Matius 24:3, 14) Berita si Meriah e paksana iberitaken bas lebih 230 negeri janah lebih i bas 700 cakap. Jelas me, kerina Saksi-Saksi Jahwe si rehna i bas ’kerina bangsa ras suku’ nampati kalak guna meteh kai kin Kinirajan e,  ras kai si nandangi ilakokenna man kerina manusia. (Ketangkasen 7:9) Enda gratis. Bali bagi si inubuatken Jesus, amin gia melala si rate segat ras nganiaya kalak enda, tapi la lit kai pe si banci mpengadi dahin e.​—Lukas 21:17.

KAI SI PERLU ILAKOKENNDU?

15. (a) Tek nge kam kita nggeluh i bas wari-wari pendungi? Engkai? (b) Kai si terjadi nandangi jelma si patuh man Jahwe ras si la patuh man Jahwe?

15 Tek nge kam kita nggeluh i bas wari-wari pendungi? Melala nubuat i bas Pustaka si Badia kerna wari-wari pendungi nggo terjadi. Kentisik nari ipengadi Jahwe dahin erberita si meriah, janah seh me ”kedungenna e”. (Matius 24:14) Kai kin kedungenna e? E me Harmagedon, paksa Dibata nasapken kerina kalak jahat. Jahwe nggunaken Jesus ras malekat-malekat si megegeh guna ngkernepken ise si la patuh man baNa ras anakNa. (2 Tesalonika 1:6-9) Kenca si e, Setan ras begu-beguna lanai banci nipu manusia. Janah kerina si nggit patuh man Dibata ras ndukung KinirajanNa banci ngidah kerina janji Dibata terjadi.​—Ketangkasen 20:1-3; 21:3-5.

16. Erkiteken ”kedungenna” nggo ndeher, kai nge si perlu ilakokenndu?

16 Doni si ikuasai Setan enda ikernepken kentisik nari. Penting sisungkuni dirinta, ’Kai si perlu kulakoken?’ Ate Jahwe gelah kam terus erlajar Pustaka si Badia. Erlajarlah alu tutus. (Johanes 17:3) Perpulungen Saksi-Saksi Jahwe tiap minggu nampati kalak guna ngangkai isi Pustaka si Badia. Rehlah kam alu ratur. (Oge Heber 10:24, 25.) Paksa kam erlajar janah ietehndu lit si man perobahen i bas dirindu, ula  mbiar erbahan perobahen e. Adi terus ilakokenndu, hubungenndu ras Dibata Jahwe banci reh paguhna.​—Jakup 4:8.

17. Engkai maka melala jelma sengget paksa reh kedungenna e?

17 Rasul Paulus ngatakenca maka paksa kalak jahat ikernepken melala jelma sengget erkiteken ’wari e reh bagi penangko si reh asum berngi’. (1 Tesalonika 5:2) Inubuatken Jesus melala jelma la ermediate kerna bukti-bukti si ncidahken maka kita nggeluh i bas wari-wari pendungi. Ikatakenna, ”Kerehen anak manusia si isuruh e pagi bali kap ras kai si jadi i bas paksa Nuah nai. Bagi nai ope denga reh lau mbelin kerina kalak si nggeluh paksa si e man dingen minem, sereh dingen empo seh ku warina Nuah bengket ku bas perahu; sitik pe la ietehna kai nandangi jadi man bana ope denga reh lau mbelin si erbahanca ia mombak kerina. Bage ka me pagi jadi asum reh Anak Manusia si isuruh Dibata e.”​—Matius 24:37-39.

18. Kai nge persinget si ibereken Jesus man banta?

18 Ipersingeti Jesus kita, nina, ”Jagalah bandu gelah pusuhndu la iberati alu barang si erbahanca kam ketagih minem si erbahanca mabuk, ntah kearun ate kerna kegeluhen enda.” Ikatakenna maka kedungen e rempet reh bali ”bagi siding man kerina jelma i belang-belang doni enda”. Emaka nina, ”Erjagalah dingen tetap ertoto gelah kam pulah i bas kerina kejadin e, janah ngasup kam tedis ilebe-lebe anak manusia si isuruh Dibata.” (Lukas 21:34-36) Engkai maka penting kal siperdiateken persinget Jesus e? Erkiteken kentisik nari doni Setan si jahat enda ikernepken. Kalak si ngena ate Jahwe ras Jesus ngenca si selamat janah nggeluh si rasa lalap i doni si mbaru.​—Johanes 3:16; 2 Petrus 3:13.

^ par. 4 Mikael eme gelar Jesus si deban. Guna ndatken terbuen keterangen, banci nehenndu Penjelasen tambahen 23.