Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 8

Tadingkenlah Agama Palsu ras Dalanken Agama si Benar

Tadingkenlah Agama Palsu ras Dalanken Agama si Benar

1. Pilihen kai si arus ibahan kerina kalak kerna penembahen man Dibata?

JESUS ngatakenca, ”Ise la mihak aku ngelawan aku kap.” (Matius 12:30) Kita arus mihak salah sada, Jahwe ntah pe Setan. Buen kalak erpengakap ia ngelayani Dibata alu cara si benar, tapi menurut Pustaka si Badia Setan paksana ”nipu i belang-belang doni enda”. (Ketangkasen 12:9) Jutan kalak iakapna ia nembah Dibata, tapi situhuna ngelayani Setan! Emaka, kerina arus erban pilihen: ngelayani Jahwe, ”Dibata si setia [kebenaren, NW]”, ntah Setan ”bapa kerina kalak si perguak”.​—Masmur 31:6; Johanes 8:44.

Ndaratlah i bas Agama Palsu nari

2. Kai sada cara si igunaken Setan gelah kalak la nembah Jahwe?

2 Keputusen ngelayani Jahwe sada pilihen si mehuli. Pilihen enda ngena ate Dibata tapi la ngena ate Setan. Setan erban erbage cara guna ngambati kalak ngelayani Jahwe. Salah sada carana alu nggunaken kalak si deban, teman-teman ntah pe keluarga guna nokohi ras ngelawan kita. Jesus mpersingeti, ”Kerina si lit i bas jabuna imbangna kerina”.​—Matius 10:36.

3. Adi keluarga ntah pe teman-temanndu ngelawan kam erkiteken penembahenndu man Dibata, kai nge si ilakokenndu?

3 Adi si e terjadi man bandu, kai si ilakokenndu? Melala kalak mbiar ntah pe sangsi nadingken agamana amin gia enggo itehna agamana e salah. Menurut kalak e, ia la setia man keluarga adi nadingken agamana. Tapi cuba ukuri, adi itehndu lit anggota keluarga si make obat terlarang, la kin mis ipersingetindu kerna bahayana? Kam pasti la ikut-ikuten nggunaken obat e, ma bage?

4. Kai si ikataken Josua kempak kalak Israel kerna penembahen i bas jamanna?

4 Josua mpersingeti bangsa Israel gelah nandingken ajaren agama ras adat-istiadat si lepak si isusurken nini-ninina. Nina, ”Dage genduari, . . . pehagalah TUHAN janah sembahlah Ia alu tutus ate ras patuh. Pedauhlah dibata si nai isembah nini-ninindu i Mesopotami ras i Mesir, janah man TUHAN sajalah kam ersembah.” (Josua 24:14) Josua setia man Dibata, emaka Jahwe masu-masu ia. Adi kita setia man Jahwe, kita pe ipasu-pasuNa.​—2 Samuel 22:26.

Pedauh Kerina si Lit Hubungenna ras Penembahen si La Payo

5. Engkai maka arus sikernepken kerina barang-barang si lit hubungenna ras kinigurun?

5 Guna nadingken agama palsu arus sikernepken kerina barang-barangta si lit hubungenna ras kinigurun, misalna jimat, cincin ntah pe gelang “sakti”, ntah pe benda-benda si bali ras si e. Enda penting perban alu ngelakokenca kita ncidahken maka kita tuhu-tuhu tek man Jahwe.

6. Kai si ilakoken kalak Kristen i bas abad si pemena nandangi buku kinigurunna?

6 Perdiateken kai si ilakoken kalak Kristen i bas abad si pemena paksa atena ndalanken agama si benar. Pustaka si Badia ngatakenca, ”Nterem kalak si lit kinigurunna maba pustakana je nari itutungna i lebe-lebe jelma si nterem.”​—Perbahanen Rasul-rasul 19:19.

7. Kai si banci ilakokenndu adi iganggu begu-begu?

7 Piga-piga kalak si mulai ngelayani Jahwe, si mbarenda pernah jadi guru si baso ntah pe ikut terlibat i bas kinigurun ras sihir, banci saja iganggu begu-begu. Adi enda ialamindu, serkolah mindo penampat Jahwe alu ertoto make gelarNa. Pasti kam isampatiNa.​—Kuan-kuanen 18:10; Jakup 4:7.

8. Uga tindaken kalak Kristen nandangi barang-barang si ipake i bas penembahen si la payo?

8 Kalak si merhat ngelayani Jahwe la banci muniken ntah pe nggunaken patung, lambang, ntah pe gambar si ipake i bas penembahen si la payo. Kalak Kristen si tuhu-tuhu ”nggeluh erpalasken kiniteken, labo erpalasken kai si teridah”. (2 Korinti 5:7) Kalak e matuhi hukum Dibata si ngelarang nggunaken patung i bas nembah Dibata.​—Keluaren 20:4, 5.

Ergabunglah ras Umat Jahwe

9. Gelah banci kita jadi pentar, kai pedah si ibereken Pustaka si Badia?

9 Pustaka si Badia ngatakenca, ”Adi kam erteman ras kalak pentar kam pe ikut jadi pentar.” (Kuan-kuanen 13:20) Gelah jadi pentar, kita perlu erdalan, ntah pe ergabung ras Saksi-Saksi Jahwe. Kalak enda me si erdalan i bas dalan si nuju ku kegeluhen.​—Matius 7:14.

10. Uga carana Saksi-Saksi Jahwe nampati kam ngelayani Dibata?

10 Saksi-Saksi ermediate ras ngkelengi kalak si deban. Pendahin kalak enda eme nampati kalak si tutus atena erdibata gelah ngantusi kebenaren Pustaka si Badia si maba ku kegeluhen si rasa lalap. Ia senang nampati kam guna erlajar Pustaka si Badia alu la nggalar. Ijabapna penungkunen-penungkunenndu janah icidahkenna uga cara ndalanken ajaren Pustaka si Badia.​—Johanes 17:3.

11. Uga perpulungen banci nampati kam?

11 I bas perpulungen kalak e guna nembah Dibata, si biasana ilakoken i Bale Kinirajan, kam banci erlajar terbuen kerna dalan-dalan Jahwe. Kam pe reh nggitna ndalanken agama si benar. Janah, kam iajari ka gelah banci nampati kalak si deban guna meteh kebenaren kerna Pustaka si Badia.​—Heber 10:24, 25.

12. Uga pertoton banci nampati kam ngelayani Dibata?

12 Erbuena pemetehndu kerna tujun ras peraten Jahwe, mbelin kemungkinenna reh bagesna pengerganndu kerna dalan-dalanNa si erpalasken kekelengen. Kam pe arus mpebelin sura-surandu guna erban Dibata senang ras la erban ceda ateNa. Ingetlah, kam banci reh ku Jahwe i bas pertoton guna mindo penampatNa gelah banci ngelakoken si benar ras mpedauh si salah.​—1 Korinti 6:9, 10; Pilipi 4:6.

Uga kam banci ndalanken agama si benar?

13. Uga carana kam banci erbahan meriah ate Jahwe?

13 Asum kam terus erlajar, ietehndu me uga perluna mbaktiken diri ras iperidiken guna jadi Saksi Jahwe. Alu ergabung ras umat Jahwe, kam banci erbahan meriah ate Jahwe. (Kuan-kuanen 27:11) Kam banci lit i tengah-tengah umat si ermeriah ukur, si kerna si e nina Dibata, ”Nggeluh me aku ras ia janah ringan aku i tengah-tengahna. Aku me jadi Dibatana janah ia jadi bangsangKu.”​—2 Korinti 6:16.