Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 56

Keleng Ate Josia Undang-Undang Dibata

Keleng Ate Josia Undang-Undang Dibata

Josia jadi raja i Juda sanga umurna waluh tahun denga. Sanga si e, melala kalak si nembah patung-patung ras ngelakoken ilmu gaib. Sanga umur Josia 16 tahun, ipelajarina uga carana nembah Jahwe alu cara si benar. Sanga umurna 20 tahun, iruntuhkenna kerina patung-patung ras ingan nembah berhala si lit i negeri e. Janah, sanga umurna 26 tahun, iaturkenna gelah rumah pertoton Jahwe ipehuli.

I bas rumah pertoton, idat imam si mbelin Hilkia gulungen si isina kerna Undang-Undang Jahwe—banci jadi Musa si nulis gulungen e. Sapan eme sekretaris raja, ibabana gulungen e man Josia, dung e ibacakenna alu sora megang. Sanga ibegi Josia, sadar me ia maka nggo ndekah kel rayatna la patuh man Jahwe. Emaka nina Raja Josia man Hilkia, ‘Pasti merawa kel Jahwe man kita. To sungkuni Jahwe, gelah katakenNa kai si arus silakoken.’ Ibere Jahwe jawapenNa arah nabi Hulda, nina, ‘Nggo ilupaken kalak Juda Aku. Pasti Kuukum kalak e, tapi labo bas pemerentahen Josia, perban Josia meteruk ukur.’

Sanga ibegi Raja Josia kata-kata arah Jahwe e, lawes ia ku rumah pertoton janah ipepulungna kerina kalak Juda ku je. Kenca e, ibacakenna Undang-Undang Jahwe man kerina rayatna. Emaka erjanji me Josia bage pe rayatna guna tuhu-tuhu patuh man Jahwe.

 Enggo ndekah kel kalak Juda la ngerayaken wari Paskah. Tapi bas Undang-Undang si ibaca Josia e, wari Paskah arus irayaken tiap tahun. Emaka nina man rayatna, ‘Mari sirayaken wari Paskah man Jahwe.’ Kenca e, isikapken Josia melala persembahen man Jahwe, janah iaturkenna gelah lit kalak si rende i rumah pertoton. Dung irayaken kalak e wari Paskah, irayaken kalak e ka Wari Raya Roti si La Itama Ragi sedekah pitu wari. La pernah lit perayan wari Paskah si bage riahna mulai kin jaman Samuel nari. Keleng kel ate Josia Undang-Undang Dibata. Meriah nge akapndu erlajar kerna Jahwe?

“KataNdu kap tendang man nahengku, nerangi dalan si kudalani.”—Masmur 119:105