Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 44

Rumah Pertoton man Jahwe

Rumah Pertoton man Jahwe

Kenca Salomo jadi raja Israel, isungkun Jahwe ia, ‘Kai atendu Kubereken bandu?’ Nina Salomo, ‘Aku nguda denga, la kueteh kai si arus kulakoken. BereNdu min aku kepentaren gelah banci kupinpin umatNdu.’ Kenca e, nina Jahwe, ‘Perban ipindondu kepentaren, emaka Kuban kam si pentarna i doni enda. Kuban ka kam bayak. Janah adi patuh kam man bangKu, gedang umurndu.’

Ibangun Salomo me rumah pertoton e. Ipakena emas, pirak, kayu, ras batu si mejilena. Lit ribun dilaki ras diberu si beluh ikut mbangun rumah pertoton e. Kenca pitu tahun, dung me rumah pertoton e guna ibereken man Jahwe. Lit ka i je ingan mereken persembahen, ras persembahenna. Mungkuk Salomo i lebe ingan e janah ertoto, nina, ‘O Jahwe, labo kap mejilesa, janah kitiksa nge rumah pertoton si kubangun enda man baNdu, tapi alokenNdu min persembahen kami ras pertoton kami enda.’ Ialoken Jahwe nge pertoton ras ingan si ibangun Salomo e? Kenca dung Salomo ertoto, reh api langit nari janah itutungna kerina persembahen si lit i datas ingan persembahen e. Meriah kel ukur Jahwe nandangi rumah pertoton e. Kalak Israel pe meriah kel ukurna ngidah kejadin e.

Kepentaren Raja Salomo ieteh kerina kalak Israel bage pe seh ku ingan si ndauh. Rehen me kalak mindo penampat man Salomo. Sanga reh ratu Syeba njumpai Salomo, iujina ia alu penungkunen si mesera. Kenca ibegina jawapen Salomo, nina, ‘Sanga kubegi arah kalak kerna kepentarenndu, la aku tek. Tapi gundari, nggo kueteh kepeken pentaren kam asangken si ikataken kalak.’ Makmur kel kalak si tading i Israel sanga si e, janah meriah kel ukur kalak e. Tapi dungna kerina berubah.

“Janah situhuna i jenda lit belinen asa Salomo.”—Matius 12:42