Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 48

Anak Sekalak Janda si Nggeluh Mulihi

Anak Sekalak Janda si Nggeluh Mulihi

Sanga musim perlego e, nina Jahwe man Elia, ‘Lawes kam ku Sarpat. I jah kari lit sekalak janda si mere kam man.’ Sanga seh Elia i gerbang kuta e, idahna sekalak janda si mesera sangana ndarami ranting. Dung e ipindona lau inemen man janda e. Lawes me janda e muat lau tapi ngerana ka Elia, nina, ‘Banci babandu sitik roti man bangku?’ Tapi nina janda e, ‘La lit roti si banci kubereken man bandu. Tepung ras minak kami bias erban roti si kitik man aku ras anakku ngenca.’ Nina Elia man diberu e, ‘Nggo erjanji Jahwe adi iberekenndu aku roti, tepung ras minakndu la banci keri seh ngasa nusur udan.

Emaka lawes janda e ku rumahna janah ibanna roti man nabi Jahwe e. Bagi si ijanjiken Jahwe, janda ras anakna e tetap lit panganna sedekah musim perlego. Tepung ras minakna la keri-keri.

Kenca si e, terjadi me si erban sedih. Anak janda e sakit janah dungna mate. Emaka ipindona penampat arah nabi Elia. Iangkip Elia anak dilaki e janah ibabana ku kamarna si lit i datas tingkat rumah diberu e. Itamakenna ku ingan medem janah ertoto ia nina, ‘Jahwe, banlah anak enda nggeluh mulihi.’ Tehndu ngkai maka pemindon e la seri ras pemindon si deban? Perban, sanga si e lenga pernah lit kalak si mate nggeluh mulihi. Selain si e, janda ras anakna enda pe labo kalak Israel.

Dungna anak dilaki e nggeluh mulihi janah nggo banci erkesah! Nina Elia man janda e, ‘Nen! Anakndu nggo nggeluh.’ Meriah kel ukur diberu e janah nina man Elia, ‘Kam tuhu-tuhu nabi Dibata. Kuteh maka si kataken Jahwe ngenca si ipesehndu.’

“Nehenlah perik kak: la merdang, la rani, la lit lumbungna; tapi bage gia man nge ia ibahan Dibata. Kam ndauh ergan asa perik-perik e.”—Lukas 12:24