Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 46

I Gunung Karmel me Terbukti

I Gunung Karmel me Terbukti

Jahat kel raja-raja i kerajan Israel sepuluh suku, si jahatna eme Ahap. Iempoina diberu jahat si nembah Baal. Gelarna Isebel. Ahap ras Isebel erban melala kalak Israel nembah Baal. Ibunuhna ka nabi-nabi Jahwe. Kai si ilakoken Jahwe? Isuruh Jahwe nabi Elia mpeseh pesanNa man Ahap.

Ikataken Elia man Raja Ahap maka perban kejahatenna, la lit me udan i Israel. Nggo lebih telu tahun dekahna sinuan-sinuan kalak Israel sada pe la turah janah nggo kelihen kalak e. Isuruh Jahwe mulihi Elia njumpai Ahap. Nina raja e, ‘Perban kam nge enda kerina terjadi! Salahndu nge e.’ Nina Elia njawapsa, ‘Labo perban aku maka kerah taneh e. Tapi perban sembahndu Baal. Adi bage, mari sibuktiken. Pepulung kerina bangsa Israel ras nabi-nabi Baal i datas Gunung Karmel.’

Emaka pulung me kalak e i gunung. Nce ngerana Elia, nina, ‘Ban pilihen kena. Adi Jahwe Dibata si benar, ikutken Ia. Tapi adi Baal akapndu si benar, ikutken ia. Mari sibuktiken. Arus isikapken 450 nabi-nabi Baal e persembahenna nce ilebuhna dibatana, janah aku pe kusikapken persembahenku nce kulebuh Jahwe. Ise kari si ngirim api, ia me Dibata si benar.’ Setuju me kerina kalak e.

Isikapken nabi-nabi Baal persembahenna. Sada wari ben ilebuh kalak e dibatana, nina, ‘O Baal, aloi kami! Perban la ijawap Baal, ngerana Elia, nina, ’Kurang gang ban sorandu. Ntah tunduh denga ia, medaki kena lebe.’ Nabi-nabi Baal e lalap erlebuh seh ngasa gelap. Tapi la lit si njawapsa.

Itamaken Elia persembahenna i datas inganna, nce iamburkenna lau ku persembahenna ras kerina ingan e. Nce ertoto ia, ’O Jahwe, banlah kalak e meteh maka Kam Dibata si benar.’ Kenca si e, nusur api arah Jahwe nutung persembahen e seh ngasa keri. Serko kalak e kerina janah nina, ‘Jahwe me Dibata si benar!’ Emaka nina Elia, ‘Ula pediat nabi-nabi Baal e kiam!’ I bas wari e, lit 450 nabi Baal si ibunuh.

Sanga idah Elia embun si kitik i datas lawit, ikataken Elia man Ahap, ‘Badai nggo reh. Baba geretandu, nce mulih kam ku rumah.’ Langit ras embun pe nggo gelap, angin rembus alu megegeh, janah udan pe meder. Dungna, ngadi me musim perlego. Meter kel Ahap kiam alu gereta kudana. Isampati Jahwe Elia kiam cepaten asangken gereta kuda e! Lit denga nge masalah nabi Elia? Mari sinen.

“Gelah ietehna maka Kam [Jahwe, NW] si Meganjangna i datas kerina doni enda.” —Masmur 83:19