Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 36

Janji Jepta

Janji Jepta

Sekali nari ka, itadingken kalak Israel me Jahwe, nce isembahna dibata-dibata palsu. Sanga iserang kalak Amon kalak e, la lit si banci ilakoken dibata-dibata si palsu e guna nampati kalak e. Emaka, mesera me kalak e ertahun-tahun dekahna. Dungna, ikataken kalak e me man Jahwe, ‘Nggo erdosa kami. Selamatken min kami arah musuh-musuh kami e.’ Iperperken kalak Israel me patung-patungna e ras mulih ka kalak e nembah Jahwe. La nggit Jahwe ngidah kalak e lalap susah.

Lit sekalak tentera si gelarna Jepta si nggo ipilih guna minpin kalak Israel erperang ngelawan kalak Amon. Nina man Jahwe ‘Adi banNdu kami menang bas perang enda, erjanji aku, ise pe si pertama ndarat ngalo-ngalo aku sanga mulih ku rumah, kubereken ia man baNdu.’ Ibegiken Jahwe toto Jepta e janah ibanNa kalak e menang bas perang e.

Sanga Jepta mulih ku rumah, anakna si diberu me si pertama ndarat ngalo-ngalo ia. Ia me ngenca anakna. Landek-landek anakna e janah mainkenna alat musik. Kai nge si ilakoken Jepta? Ingetna me mulihi janjina, nce nina, ‘Andiko, Nakku! Ceda kel ukurku bandu. Nggo erjanji aku man Jahwe. Emaka, arus ku kirim kam ku tabernakel i Silo guna nepati janjiku.’ Nina anakna e, ‘Pak, adi nggo erjanji kam man Jahwe, arus tepatindu. Sada ngenca si kupindo, dua bulan ope aku berangkat, bereken aku main-main ras teman-temanku i gunung. Dung e, berangkat me aku.’ Anak Jepta terus setia ngelayani i tabernakel seh asa metua. Tiap tahun reh me teman-temanna ku Silo guna njumpai ia.

“Ise kelengen atena anakna si dilaki ntah si diberu asangken aku, la metunggung ia ras aku.”—Matius 10:37