Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PElAJAREN 32

Peminpin si Mbaru ras Dua Diberu si Perpang

Peminpin si Mbaru ras Dua Diberu si Perpang

Kenca Josua minpin Israel ertahun-tahun dekahna, mate me ia bas umur 110 tahun. Sanga Josua nggeluh denga, kalak Israel nembah Jahwe. Tapi kenca Josua mate, kalak Israel nggo nembah patung, bali bagi kalak Kanaan. Perban kalak Israel lanai patuh man Jahwe, ipediat Jahwe me raja Kanaan si gelarna Jabin, erban susah kalak Israel. Perban si e, ipindo kalak e penampat Jahwe. Emaka ipilih Jahwe me Barak si jadi peminpin. Barak me si nampati kalak e gelah mulihi nembah Jahwe.

Lit diberu si gelarna Debora, ia sekalak nabi. Isuruh Jahwe ia njumpai Barak. Nina man Barak, ‘Babalah 10.000 kalak guna erperang ngelawan tentera Jabin i Lau Kison. Italukenndu nge kari tentera Jabin si ipinpin Sisera e.’ Nina Barak man Debora, ‘Nggit aku lawes, adi ikut kam.’ Nina Debora, ‘Ue, nggit aku ikut, tapi labo kari kam si mbunuh Sisera. Nina Jahwe, sekalak diberu kari si mbunuh ia.’

Lawes me Debora, Barak, ras tenterana nangkih ku Gunung Tabor, ersikap guna erperang. Kenca ieteh Sisera kerna si e, ipepulungna me gereta perang ras tenterana i teruh gunung e. Nina Debora man Barak, ‘Wari enda, ibere Jahwe kemenangen man bandu.’ Nusur me Barak bage pe 10.000 tenterana guna erperang ras tentera Sisera si megegeh.

Iban Jahwe me reh lau si galang arah Lau Kison. Emaka, gereta perang tentera Sisera lanai banci erdalan perban leket bas kubang. Perban si e, lawes Sisera nadingken geretana, janah kiam ia. Talu me tentera Sisera, tapi Sisera kiam. Janah cebuni ia i tenda diberu si gelarna Jael. Ibereken Jael susu man Sisera, iselimuti Jael ia. Nce terpedem Sisera perban latih kel akapna. Dung e, alu manjar-anjar masuk Jael ku tenda e, janah pantukkenna paku tenda ku takal Sisera. Mate me Sisera.

Reh Barak, idaram-daramina Sisera. Nce, ndarat Jael bas tenda nari, dilona Barak, nina, ‘Mari kubasken. Enda kalak si idaramindu.’ Masuk me Barak ku tenda janah idahna Sisera nggo mate. Kenca si e, Barak ras Debora muji Jahwe alu rende, perban nggo ibereken Jahwe kemenangen man kalak Israel. Emaka, sedekah 40 tahun lanai lit si ngganggu kalak Israel.

“Nterem diberu-diberu maba berita.”—Masmur 68:12