Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 20

Enem Tulah si Debanna

Enem Tulah si Debanna

Ipeseh Musa ras Harun persinget arah Dibata man Paro, nina, ‘Adi la iberendu bangsaKu lawes, Kuban laneng ratah ndemi negerindu.’ Mbue rehen laneng ratah ku rumah-rumah kalak Mesir, ku rumah kalak bayak bage pe kalak mesera. Kerina negeri e dem alu laneng ratah. Tapi bas Gosen, ingan tading kalak Israel, la lit laneng ratah. Kalak Mesir ngenca si kena tulah, mulai arah tulah si peempatken e. Emaka nina Paro, ‘Pindolah man Jahwe gelah ipelawesNa laneng e. Kubere nge bangsa e lawes.’ Tapi, kenca nggo ipelawes Jahwe laneng ndai, berubah ka mulihi perukuren Paro. Mekeng kel Paro e me?

Nina Jahwe, ‘Adi la ibere Paro bangsaku lawes, asuh-asuhen kalak Mesir sakit ras mate.’ Paginna, asuh-asuhen kalak e mate. Tapi asuh-asuhen kalak Israel lang. Paro tetap mekeng, janah la iberena bangsa e lawes.

Ikataken Jahwe man Musa gelah dahina Paro janah suruhNa menterken abu ku das. Abu e minter merap ku belang-belang negeri janah ngkenai kerina kalak Mesir. Abu e erban kerina kalak Mesir bage pe asuh-asuhenna kena bisul. Amin gia bage, tetap la ibere Paro kalak Israel lawes.

Isuruh Jahwe me Musa mpeseh persinget si deban man Paro, ‘Tetap denga nge kam la mere bangsaKu lawes? Kudabuhken me pagi udan baho ku negeri e.’ Paginna, idabuhken Jahwe me baho, perkas, bage pe api. La pernah terjadi si bage i Mesir. Kerina batang kayu ras sinuan-sinuan mbulaken, tapi si lit i taneh Gosen lang. Nina Paro, ‘Pindolah man Jahwe gelah ipengadiNa baho e! Kenca e banci kena lawes.’ Tapi kenca baho ras udan e ndai ngadi, berubah ka ukur Paro.

Kenca si e, nina Musa, ‘Gundari, sisa arah sinuan-sinuan si kena baho ipan labang me.’ Lit jutan labang mangani kerina si lit bas juma bage pe bulung-bulung batang kayu. Emaka nina Paro ka, ‘Pindolah man Jahwe gelah pelawesNa labang e.’ Tapi kenca ipelawes Jahwe labang e, tetap Paro mekeng.

Isuruh Jahwe Musa, nina, ‘Pepinter tanndu ku datas.’ Kenca e, rempet gelap kerina. Telu wari dekahna, la banci idah kalak Mesir kai pe ras ise pe. Ingan kalak Israel ngenca terang.

Ikataken Paro man Musa, ‘Banci kam ras bangsandu lawes, tapi asuh-asuhenndu ula baba.’ Ijabap Musa, ‘La banci bage, sebap perlu kami mbereken persembahen man Dibata Jahwe.’ Merawa kel Paro. Irawaina Musa, ’Nte lawesken! Ula lanai kuidah ko i jenda! Adi kuidah denga ko i jenda, kubunuh ko.’

“Sekali nari iidah bangsangKu kai lainna kejadin si reh man kalak bujur ras kalak jahat, man kalak si nembah man bangKu ras kalak si lang.”—Maleaki 3:18