Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 13

Jakup ras Esau Erdame

Jakup ras Esau Erdame

Erjanji Jahwe maka ilindungiNa nge Jakup bagi Ia ngelindungi Abraham ras Isak. Jakup tading i Haran, i je me ia erjabu, dungna reh teremna keluargana janah reh bayakna.

Kenca si e, ikataken Jahwe man Jakup, ‘Mulih lah kam ku taneh bapakndu.’ Emaka mulih me Jakup ras keluargana. Bas perdalanen, lit kalak si ngatakenca man Jakup, ‘Jumpa kami ras seninandu Esau, lit 400 kalak dilaki si ras ia.’ Mbiar kel Jakup ilukai Esau ia ras keluargana. Emaka ertoto ia man Jahwe, ‘O Jahwe, selamatken min aku i bas seninaku Esau nari.’ Paginna, ikirim Jakup melala biri-biri, kambing, lembu, unta, bage pe kelede man Esau.

Sanga nggo gelap, Jakup jumpa ras malekat! Ergulat ia ras malekat e seh asa terang. Amin gia mesui akap Jakup, la ia nyerah. Nina malekat e bana, ‘Pulahi aku.’ Tapi nina Jakup, ‘Labo kam kupulahi adi la ipasu-pasundu aku lebe.’

Dungna, ipasu-pasu malekat e Jakup. Ieteh Jakup maka labo ipediat Jahwe Esau ngelukai Jakup.

Sanga erpagi-pagi, arah ndauh nari idah Jakup me Esau ras 400 kalak e. Jakup erdalan leben guna njumpai Esau janah keluargana pudin reh. Nce, sanga jumpa ras Esau, nungkuk Jakup pitu kali i lebe-lebena. Kiam Esau ndahi Jakup janah dakepna ia. Ngandung kel kalak e duana janah nggo erdame kalak e. Menurutndu, uga nge perasan Jahwe nandangi perbahanen Jakup?

Kenca si e, Esau mulih ku rumahna, janah Jakup nerusken perdalanenna. Lit 12 anak Jakup si dilaki. Gelarna eme Ruben, Simeon, Lewi, Juda, Dan, Naptali, Gad, Aser, Isakar, Sebulon, Jusup, ras Benyamin. Salah sada anakna—Jusup—ipake Jahwe guna nelamatken umatNa. Tehndu uga carana? Mari sipelajari.

“Kelengilah imbang-imbangndu, janah ertotolah man Dibata kerna kalak si erbahanca kam ngenanami kiniseran. Alu bage kam enggo jadi anak-anak Dibata.”—Matius 5:44, 45