Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 12

Jakup Ndatken Warisen

Jakup Ndatken Warisen

Umur Isak 40 tahun sanga ia erjabu ras Ribka. Ngena kel atena Ribka. Bas pudi wari, lahir me anak kalak e—dilaki duana janah kembar.

Sintua gelarna Esau, singuda gelarna Jakup. Esau meriah kapna gawah-gawah ras erburu. Tapi Jakup riahen akapna i rumah.

Mbarenda, anak sintua me si buen ndat taneh ras sen adi nggo mate bapakna. Enda me gelarna warisen. Warisen si lit bas keluarga Isak termasuk janji si ibereken Jahwe man Abraham. Jakup penting kel akapna janji si ibereken Jahwe e, tapi Esau lang.

Bas sada wari, latih kel akap Esau mulih erburu nari. Merim kel iakap Esau pangan si itasakken Jakup, janah nina, ‘Melihe kel aku! Enta sitik pangan si megara-gara ena!’ Nina Jakup, ‘Banci kubereken, adi iberekenndu bangku hakndu selaku anak sintua.’ Nina Esau, ‘Bage pe lo dalih yah! Bandu saja, si penting man aku lebe.’ Menurutndu mejile nge si ilakoken Esau e? Nggo pasti lang. Itukarken Esau warisenna si seh kel ergana ras sada mangkok pangan.

Sanga Isak nggo metua, seh me waktuna guna mereken pasu-pasu man anakna sintua. Tapi alu penampat Ribka, anakna si nguda me si ndatken pasu-pasu e. Emaka, merawa kel Esau sanga ietehna kerna si e, janah ibunuhna atena agina e. Guna ngelindungi Jakup, nina orang tuana bana, ‘O nakku, laweslah kam ndahi turangku Laban, nimai lanai merawa ate abangndu.’ Ibegiken Jakup pedah orangtuana e janah lawes me ia.

“Lit kin gunana man sekalak jelma, amin bana gia kerina doni enda tapi bene kesahna? Tentu lang! La kai pe banci ibereken manusia guna gancih kesahna”—Markus 8:36, 37