Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 9

Dungna Lit Anakna!

Dungna Lit Anakna!

Abraham ras Sara nggo ertahun-tahun erjabu. Itadingkenna rumahna si mejile i Ur janah tading i tenda. Tapi Sara la jungut-jungut perban tek ia man Jahwe.

Merhat kel Sara lit anakna emaka nina man Abraham, ‘Adi lit anak budakku Hagar, enda me jadi anakku.’ Kenca si e, lit anak Hagar. Gelarna Ismael.

Ertahun-tahun kenca si e, sanga umur Abraham 99 tahun ras Sara 89 tahun, reh telu kalak dilaki ndahi ia. Iundang Abraham kalak e ngadi kentisik i teruh batang kayu janah iberena pangan. Tehndu kin ise si reh e? Kalak e malekat! Ikatakenna man Abraham, ‘Setahun nari, lit me anakndu arah Sara.’ Ibegi Sara i bas tendana nari. Tawa ia sisada janah nina, ‘Banci denga kin lit anakku adi aku pe nggo metua?’

Setahun kenca si e, lit me anak Sara, bagi si ijanjiken Jahwe arah malekatNa. Iban Abraham gelarna Isak, si ertina “Tawa.”

 Sanga umur Isak lima tahun, idah Sara anakna itokoh-tokohi Ismael. Ilindungi Sara atena anakna, emaka ipindona man Abraham gelah ipelawesna Hagar ras Ismael. Tantangna, la nggit Abraham. Tapi ikataken Jahwe man Abraham, ‘Begikenlah kai nina Sara. Aku kari si njaga Ismael. Tapi arah Isak me pagi Ku tepati janjiKu man bandu.’

“Erkiteken tek Sara man Dibata maka banci mupus, . . . Tek ia maka isehken Dibata kai si enggo ipadankenNa.”—Heber 11:11