Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 101

Paulus Iutus ku Roma

Paulus Iutus ku Roma

Perdalanen Paulus si peteluken dung i Jerusalem. I je, itangkap ras ipenjaraken ia. Bas berngi e, idah Paulus me Jesus si ngataken, ‘Lawes me kam ku Roma janah erberita i je.’ Ibaba me Paulus arah penjara si i Jerusalem ku Kesarea. I je me ia ipenjaraken dua tahun. Sanga ia iadili i lebe-ilebe Gubernur Pestus, nina Paulus me, ‘Kupindoken gelah Kaisar Roma si ngadili aku.’ Nina Pestus, ‘Perban ipindondu bage, Kaisar me si ngadili kam.’ Ibaba me Paulus ku Roma alu kapal, janah lit dua seninana kalak Kristen si nemani ia, eme Lukas ras Aristarkus.

Bas perdalanen e, kapal kalak e kena badai bas piga-piga wari. Kerina kalak i je nggo mbiar mate. Tapi nina Paulus, ‘O nake, lit malekat si ngerana man bangku i bas nipi si ngataken, “Ula kam mbiar, Paulus. Kam pasti seh i Roma, janah kerina kalak i bas kapal enda pasti selamat.” Jadi, ula kam mbiar! Labo kam mate.’

Kenca 14 wari, ngadi me badai e. Dungna, nggo idah daraten. Kepeken, si teridah e pulo Malta. Sanga ngadi, kapal e nggo ceda kel, tapi 276 penumpangna selamat kerina. Lit si erlangi ras lit ka si nagangi pecahen kapal gelah seh ku daraten. Kalak si tading i Malta reh nampati kalak e ras mpegara api gelah ula kalak e bergehen.

Telu bulan kenca si e, ibaba tentera Roma Paulus alu kapal si deban. Kenca ia seh, mis ijumpai turang seninana ia. Sanga idahna kalak e, terpegegehi kel ia janah bujur kel nina man Jahwe. Amin pe ia tahanen, tapi ibereken ia tading i rumah kontraken tapi arus ijaga prajurit. I je me ia tading dua tahun. Melala kalak si reh ndahi ia. Man kalak e me ia erberita kerna Kerajan Dibata ras ngajarken kerna Jesus. Selain si e, itulis Paulus ka surat man runggun-runggun i Asia Kecil ras Judea. Tuhu-tuhu Paulus ipake Jahwe bas erberita si meriah ku kerina bangsa.

“I bas kerina perbahanen kami icidahken kami maka kami si erdahin Dibata kap. Si enda icidahken kami arah megenggeng i bas ngenanami kiniseran-kiniseran, kepiceten, ras kebiaren.”—2 Korinti 6:4