Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 99

Penjaga Penjara si Ndatken Kebenaren

Penjaga Penjara si Ndatken Kebenaren

I Pilipi, lit budak diberu si irasuki malekat jahat. Malekat jahat e erban diberu e banci ngeramal. Tuanna pe ndatken melala sen perban si e. Sanga Paulus ras Silas reh ku Pilipi, ikutken diberu e ku ja pe kalak e lawes seh piga-piga wari dekahna. Perban malekat jahat ndai, serko-serko me diberu e, nina, ‘Kalak enda me budak-budak Dibata Si Madakuasa.’ Dungna, ipelawes Paulus me malekat jahat e, nina, ‘Bas gelar Jesus, ndaratlah i bas ia nari!’ Diberu e pe dungna sadar.

Sanga ieteh tuanna maka lanai banci datna sen arah budakna e, merawa kel ia. Ibabana me Paulus ras Silas ku pengadilen, janah nina, ‘Kalak enda nggo ngelanggar hukum ras ngganggu penduduk kota!’ Iputusken me Paulus ras Silas ipekpeki ras ipenjaraken. Dungna, imasukken penjaga penjara me kalak e ku penjara si gelapna janah ipasung.

Sanga kalak e i bas penjara, irendeken Paulus ras Silas pujin man Jahwe si pasti ibegi tahanen si deban. Rempet-rempet bas tengah berngi, terjadi gempa bumi si megegeh. Pintu-pintu penjara talang janah rante-rante ras pasung pe lepas. Mis me kiam penjaga penjara ngenen pintu-pintu e janah idahna nggo talang kerina. Perban akapna kerina tahanen nggo kiam, ibunuhna atena bana alu pedangna.

Sanga si e, mis ilebuh Paulus ia, ‘Ula bunuhndu bandu! Jenda denga nge kami!’ Mis me masuk penjaga penjara e ku ingan Paulus ras Silas, nce nungkuk ia i lebe-lebe kalak e. Nce, isungkunna kalak e, ‘Kai si arus kulakoken gelah selamat?’ Nina kalak e, ‘Kam ras keluargandu arus tek man Jesus.’ Kenca si e, iajarken Paulus ras Silas man bana kata Jahwe, janah penjaga penjara e bage pe keluargana ibaptis.

“Kam pagi itangkap dingen isiksa. Kam pagi iendesken ku bas rumah pertoton guna icubai janah itamaken ku bas penjara. Kam pagi ibaba ku lebe-lebe raja ras ku lebe-lebe kalak si erkuasa erkite-kiteken aku. Enda pagi jadi kesempaten man bandu guna meritaken berita si mehuli.”—Lukas 21:12, 13