Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 93

Jesus Mulih ku Surga

Jesus Mulih ku Surga

Jumpa me Jesus ras murid-muridna i Galilea, iberena me kalak e sada perentah si penting. ‘Laweslah kam ras ban kerina bangsa jadi muridku. Ajarken man kalak e, kai si nggo ku ajarken man bandu, baptis kalak e.’ Dung e, erjanji Jesus, ‘Ingetlah, lalap nge aku ras kena.’

Sedekah 40 wari kenca ia ipekeke, Jesus nggo njumpai ratusen muridna i Galilea ras Jerusalem. Melala kel pelajaren si penting si iajarkenna ras mbue mukjizat si ilakokenna. Perjumpan kalak e si terakhir, eme i Gunung Saitun. Nina Jesus, ‘Ula tadingken kena Jerusalem. Timai i jenda kai si nggo ijanjiken Bapak.’

La iangka rasul-rasul kai maksud Jesus e. Isungkun kalak e man Jesus, ‘Maksudndu, jadi Raja atendu gundari i Israel?’ Ijawap Jesus, ‘Nina Jahwe lenga waktuna aku jadi Raja. Kentisik nari alokenndu me kesah si badia gelah banci kam jadi saksiku. Erberitalah kam ku Jerusalem, Judea, Samaria, seh ku sebelang doni.’

Kenca si e, Jesus nangkih ku langit janah dungna itutupi embun. Terus itatap kalak e ku datas tapi Jesus lanai idah.

Lawes me kalak e arah Gunung Saitun mulih ku Jerusalem. Rajin kel kalak e pulung ras ertoto i datas loteng. Itimai kalak e petunjuk arah Jesus.

“Kenca Berita Si Meriah kerna Kinirajan e iberitaken man manusia i belang-belang doni enda, jadi saksi man kerina bangsa, kenca bage maka seh me kedungenna e.”—Matius 24:14