Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 86

Jesus Mpekeke Lasarus

Jesus Mpekeke Lasarus

Lit telu kalak teman Jesus si tading i Betani. Gelarna Lasarus, ras dua turangna, eme Maria ras Marta. Sanga Jesus i bas seberang Lau Jordan denga, ikirim Maria ras Marta berita si penting man Jesus, isina, ‘Mekelek kel sakit Lasarus. Mis lah kam reh!’ Tapi Jesus la mis reh. Kenca dua wari maka iajakna murid-muridna, nina, ‘Ota kita ku Betani. Lasarus sangana tunduh, kumedaki ateku.’ Nina murid-muridna, ‘Mejile kap adi tunduh Lasarus, me lampas ia malem.’ Emaka nina Jesus alu terus terang, ‘Nggo mate Lasarus ndai.’

Sanga Jesus seh i Betani, Lasarus nggo empat wari ikuburken. Melala si reh guna ngapuli Marta ras Maria. Sanga ieteh Marta Jesus nggo reh, mis ijumpaina ia. Nina man Jesus, ‘Tuan, adi jenda min ndai kam, labo mate turangku e.’ Nina Jesus man Marta, ‘Nggeluh ka nge kari turangndu e. Me tek nge kam?’ Nina Marta, ‘Tek aku ipekeke nge ia pagi.’ Nina Jesus ka, ‘Aku kap si mpekeke ras mereken kegeluhen.’

Emaka reh Marta njumpai Maria janah ikatakenna, ‘Jesus nggo i jenda.’ Kiam me Maria ndahi Jesus janah ikutken jelma si nterem ia. Mis ia nungkuk i nahe Jesus, janah la ia erngadi-ngadi ngandung. Nina, ‘Tuan, adi jenda min ndai kam, labo mate turangku e!’ Ngidah si e, sedih kel akap Jesus janah ia pe ikut ngandung. Sanga idah jelma si nterem e Jesus ngandung, nina kalak e, ‘Keleng kel ate Jesus man Lasarus me.’ Tapi lit ka si ngataken, ‘Ngkai maka la iselamatkenna temanna e me?’ Dung e, kai nge si ilakoken Jesus?

Lawes me Jesus ku kuburen, si nggo itutup alu batu si galang. Isuruhna kalak si lit i je, ‘Gulingken batu e.’ Nina Marta, ‘Nggo empat wari kap ia ikuburken! Pasti nggo macik dagingna.’ Amin pe bage, batu e tetap igulingken. Nce, ertoto Jesus, ‘Bapak, bujur nggo ibegikenNdu aku. Kueteh nge maka lalap nge ibegikenNdu aku, tapi gundari ngerana aku alu sora megang gelah ieteh kalak enda maka Kam kap si nuruh aku.’ Kenca si e, erlebuh ia, ‘O, Lasarus, ndarat kam!’ Terjadi me hal si luar biasa: Lasarus ndarat arah kuburen nari, janah lit denga uis lenen si nutupi ia. Nina Jesus, ‘Tangtangi balutna e, nce pediat ia lawes.’

Nterem kalak si ngidah kejadin e dungna tek man Jesus. Tapi lit ka si ngelaporkenca man kalak Parisi. Kenca kejadin e, idarami kalak Parisi me cara guna munuh Lasarus ras Jesus. Lit sekalak arah 12 rasul Jesus, eme Judas Iskariot, sip-sip ia lawes njumpai kalak Parisi. Nce, isungkunna kalak e, ‘Asa kai upahku adi kusampati kena nangkap Jesus?’ Sepakat me kalak e maka upahna 30 duit pirak. Jenari, idarami Judas me cara gelah Jesus banci itangkap kalak Parisi.

“Dibatanta kap [Jahwe, NW] si ngkelini, ipulahiNa kita i bas kematen nari.”—Masmur 68:21