Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 68

Lit Anak Elisabet

Lit Anak Elisabet

Lebih 400 tahun kenca tembok Jerusalem ibangun mulihi, lit sekalak imam si gelarna Sakaria, ras diberuna Elisabet. Kalak e tading i deher kota e. Nggo dekah kel kalak e erjabu tapi lenga lit anakna. Bas sada wari, Sakaria sangana ertugas nutung persembahen si merim i bas rumah pertoton. Rempet-rempet, reh malekat Gabriel. Sengget kel Sakaria. Tapi, nina Gabriel man bana, ‘Ula kam mbiar. Aku maba berita si meriah arah Jahwe nari. Kentisik nari, diberundu, Elisabet, ngelahirken sekalak anak dilaki. Ban gelarna Johanes. Nggo ipilih Jahwe ia ngelakoken dahin si istimewa.’ Nce, isungkun Sakaria ia, ‘Kai buktina si katakenndu e tuhu? Aku ras diberuku me nggo metua. Lanai bo mungkin lit anak kami.’ Nina Gabriel ka, ‘Dibata nge si nuruh aku ngataken si enda man bandu. Tapi perban la kam tek man bangku, lanai kam banci ngerana seh asa lahir anakndu.’

Ndekah kel Sakaria bas ingan e, la bagi biasana. Emaka, sanga ndarat ia, mamang ate kalak uga maka ndekah kel ia bas. Tapi, perban lanai ia banci ngerana, emaka pake bahasa isarat ia. Dungna, ieteh kalak maka Sakaria nggo ndatken berita arah Dibata.

Kenca si e, hamil me Elisabet, janah ilahirkenna sekalak anak dilaki, pas kel bagi si nggo ikataken malekat. Rehen me keluargana ras teman-temanna guna ngenen anakna e. Meriah kel ukur kalak e. Nina Elisabet man kalak e, ‘Gelarna pagi Johanes.’ Nina kalak e ka, ‘La kap lit gelar Johanes bas keluargandu. Sakaria saja ban gelarna, seri ras bapakna.’ Tapi, itulisken Sakaria me bagenda, ‘Gelarna arus Johanes.’ Kenca si e, rempet-rempet Sakaria banci ngerana mulihi! Berita kerna kelahiren anakna e pe seh ku belang-belang Judea. Melala kalak si tersungkun, ‘Jadi kai nge pagi anak enda adi nggo galang?’

Kenca si e, reh ka kesah si badia man Sakaria, janah iceritakenna me kai si nandangi terjadi, ‘Pujilah Jahwe. Nggo erjanji Ia man Abraham guna mereken Mesias si nelamatken kita. Johanes me pagi si jadi nabi, janah ia me si nikapken dalan man Mesias.’

Lit ka kejadin si luar biasa si terjadi man Maria, kade-kade Elisabet. Mari sinen kerna si e bas pelajaren seterusna.

“Si enda la banci jadi i bas manusia, tapi i bas Dibata kai pe banci jadi.”—Matius 19:26