Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 73

Johanes Nikapken Dalan

Johanes Nikapken Dalan

Anak Sakaria ras Elisabet, e me si Johanes, dungna jadi nabi sanga ia nggo galang. Isuruh Jahwe ia ngajarken man kalak maka Mesias nggo reh. Tapi ia erberita labo i rumah pertoton ntah pe i bas kota. Ia erberita i ingan si la lit jelma tading i je. Sanga si e, rehen kalak arah Jerusalem nari ras kuta-kuta Juda guna erlajar arah Johanes. Iajarkenna me maka kalak jahat arus robah gelah meriah ukur Jahwe. Kenca ibegikenna Johanes, melala si ertobat, janah iperidiken i Lau Jordan.

Sederhana kel kegeluhen Johanes. Uisna arah mbulu unta nari, panganna belalang ras madu hutan. Merhat kel kalak nandai ise nge situhuna Johanes e. Kalak Parisi ras kalak Saduki pe reh ndahi ia, padahal kalak e seh kel sombongna. Nina Johanes man kalak e, ‘Robahlah kena. Ula kapndu jago bandu alu ngaku-ngaku kam kesusuren Abraham. Labo ena buktina kam anak Dibata.’

Melala kalak si reh ndahi Johanes ras nungkun, ‘Uga ban kami gelah meriah ukur Dibata?’ Nina Johanes man kalak Jahudi e, ‘Adi lit dua bajundu, bereken sada man kalak si la lit bajuna.’ Tehndu ngkai maka bage nina Johanes? Iajarina muridna ngkelengi kerina kalak gelah meriah ukur Dibata.

Nina Johanes ka man pemungut pajak, ‘Arus kena jujur, ula tipundu ise pe.’ Bagenda ka nina man tentera-tentera, ‘Ula alokenndu sen sogok ras ula erbual.’

 Imam-imam ras kalak Lewi pe reh ndahi Johanes, nce isungkunna ia, ‘Ise nge kam situhuna? Melala si merhat metehsa.’ Nina Johanes, ‘Aku kap sora si erlebuh arah padang gurun ras maba kalak ku Jahwe, bagi si itulisken Jesaya.’

Meriah ukur kalak megiken kai si iajarken Johanes. Melala kalak erpengakap maka Johanes e me Mesias. Tapi, nina Johanes, ‘Si belinen asangken aku nandangi reh. Ngelepasken selopna pe aku la cocok. Aku mperidiken alu lau, tapi ia mperidiken alu kesah si badia.’

“Ia reh guna meritaken kerna terang e man manusia, gelah kerina manusia megiken dingen tek man berita e.”—Johanes 1:7