Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 72

Jesus Sanga Kitik Denga

Jesus Sanga Kitik Denga

I Nasaret me Jusup ras Maria mpebelin Jesus ras adek-adekna. Jusup erdahin jadi tukang kayu guna mere man keluargana. Iajarkenna ka keluargana kerna Jahwe ras hukumNa. Keluarga kalak e rajin kel lawes ku sinagoga, ntah pe rumah pertoton. Janah tiap tahun, ku Jerusalem kalak e ngerayaken Paskah.

Sanga umur Jesus 12 tahun, lawes me keluarga e ku Jerusalem, bagi si biasana. I je, nggo nterem kel kalak pulung guna ngerayaken Paskah. Kenca si e, mulih Jusup ras Maria ku kutana. Akap kalak e, Jesus sangana ras kade-kadena. Tapi, sanga idarami kalak e, kepeken la ia i je.

Perban si e, mulih ka me kalak e ku Jerusalem. Telu wari kalak e ndarami Jesus. Dungna, jumpa kalak e ras Jesus i rumah pertoton. Kepeken, sangana ia ras guru-guru. Ibegikenna kalak e ngerana janah isungkunna ka kalak e. Mamang ate guru-guru e mbegi penungkunen Jesus. Mulai me isungkuni kalak e ia. Sanga ijawap Jesus penungkunen e, reh senggetna kalak e, perban tuhu-tuhu iangkai Jesus Hukum Jahwe.

Perban biarna kel Jusup ras Maria, ikataken Maria man Jesus, ‘Andiko, Nakku! Ja nari kam? Nggo latih kuakap ndaramisa.’ Nina Jesus, ‘Me tehndu nge, Mak, aku arus i rumah Bapakku.’

Mulih me Jesus ras orang tuana ku Nasaret. Iajari Jusup ka Jesus ertukang. Menurutndu kalak si uga nge Jesus e sanga ia nguda denga? Reh galangna reh buena me pemeteh Jesus, janah reh ngenana ate Dibata bage pe jelma man ia.

“O Dibata ngena ateku ndalanken peratenNdu, pengajarenNdu kubuniken i bas pusuhku.”—Masmur 40:9