Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 69

Gabriel Reh Ndahi Maria

Gabriel Reh Ndahi Maria

Lit sekalak kade-kade Elisabet si gelarna Maria. Ia singuda-nguda denga, ras ia tading i kuta Nasaret i daerah Galilea. Ia nggo ertunangan ras Jusup, sekalak tukang kayu. Sanga nggo enem bulan Elisabet hamil, reh me malekat Gabriel ndahi Maria. Nina man Maria, ‘Mejuah-juah, Maria. Keleng kel ate Jahwe man bandu.’ Tapi, la iangka Maria kai maksud Gabriel. Emaka, nina Gabriel, ‘Kentisik nari, hamil me kam, janah anakndu pagi dilaki. Ban gelarna Jesus. Ia me pagi si jadi Raja, janah Kerajanna e tahan rasa lalap.’

Nina Maria ngaloisa, ‘Tapi aku me lenga erjabu. Banci kin lit anakku?’ Nina Gabriel ka, ‘La lit si la mungkin bas Jahwe. Kesah si badia me pagi si erban lit anakndu. Kade-kadendu si Elisabet pe nggo hamil.’ Dungna, nina Maria, ‘Aku budak Jahwe kap. Tek aku man kerina si katakenndu e.’

 

 Lawes me Maria ku kuta Elisabet i sada bukit. Sanga ibegi Elisabet kerehen Maria, bayi i bas beltek Elisabet pe nipak-nipak. Perban lit kesah si badia bas Elisabet, nina ngerana, ‘Mejuah-juah, Maria. Tuhu-tuhu kam ipasu-pasu Jahwe. Meriah kel ukurku nggo idahi mamak Tuanku aku.’ Nina Maria me, ‘Ue, meriah kel ukurku muji Jahwe.’ Nce, i je me Maria tading telu bulan dekahna, dung e mulih me ia ku rumahna i Nasaret.

Sanga ieteh Jusup si Maria nggo hamil, isirangkenna atena ia. Tapi, lit sekalak malekat si reh ku bas nipi Jusup, janah nina, ‘Ula kam mbiar ngempoi Maria. Labo salahna maka ia bage.’ Emaka, iempoi Jusup me Maria janah ibabana ia ku rumahna.

‘Ibahan Jahwe kai ateNa si ibahanNa i langit ntah i doni.’—Masmur 135:6