Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 63

Tulisen bas Dinding

Tulisen bas Dinding

I bas sada wari, Belsasar me si merentah i Babilon. Bas sada berngi iundangna ribun pejabat si penting i bas negerina ku sada pesta man-man. Isuruhna gelah ipedarat gelas-gelas emas si ibuat Nebukadnesar arah rumah pertoton Jahwe nari. Ipake Belsasar ras kerina tamuna gelas-gelas e janah ipuji kalak e dewa-dewana. Rempet lit tan si kabang-kabang. Itulisna kata-kata si aneh i bas dinding ruangen kalak e man.

Mbiar kel si Belsasar. Ilebuhna me dukun-dukunna janah nina, ‘Ise si banci njelasken erti tulisen e, kuban ia jadi kalak nomor telu si pentingna bas kerajanku.’ Uga pe ban kalak e, la lit si ngasup njelasken ertina. Nce, reh me ratu ras nina, ‘Mbarenda lit kap si beluh njelasken si bagenda man Nebukadnesar, gelarna Daniel. Enda pe pasti banci ijelaskenna.’

Ilebuh me Daniel njumpai raja. Nina Belsasar man Daniel, ‘Adi banci ijelaskenndu erti tulisen e, kubereken kam kalung emas janah kuban kam jadi kalak nomor telu si pentingna bas kerajanku. Nina Daniel me, ‘La padah iberekenndu aku hadiah, nggit nge aku njelasken ertina man bandu, Raja. Bapakndu Nebukadnesar, meganjang sange ukurna emaka ipeteruk Jahwe ia. Kam pe tehndu nge kerna si e, tapi gundari kam pe la ihamatindu Jahwe. Ipakendu gelas-gelas emas arah rumah pertoton nari emaka itulis Dibata kata-kata enda, Mene, Mene, Tekel, ras Parsin. Enda ertina italuken Media ras Persia me pagi Babilon enda janah kam pe lanai jadi raja.’

Tembok i sekeliling Babilon mekapal ras erlapis-lapis janah i darat kota e lit ka lau si mbages, emaka tempa-tempa kota e la mungkin italuken. Tapi bas berngi e, reh me pasuken Media ras Persia si ipinpin raja Persia eme Kores. Ipalerkenna lau e ku dalan si deban seh asa kerah, gelah banci idalani tentera-tenterana. Sanga tentera-tentera e nggo seh i je, gerbang kota nggo talang! Masuk me kerina tentera e, italukenna kota e janah ibunuhna me Raja Belsasar. Kenca si e, Kores me si erkuasa i Babilon.

Setahun kenca si e, imomoken Kores, ‘Nina Jahwe man bangku gelah kubangun ngulihi rumah pertoton i Jerusalem. Ise si nggit nampati, banci ikut.’ Emaka bagi si ijanjiken Jahwe, melala kalak Jahudi si mulih ku Jerusalem kenca kalak e itaban 70 tahun. Kerina barang-barang si ibuat Nebukadnesar, bagi gelas emas, gelas perak ras si debanna, itamaken Kores mulihi ku rumah pertoton. Jelas me, Jahwe si milih Kores guna nampati umatNa.

“Enggo runtuh Babilon! Enggo runtuh diberu, e me Babilon si mbelin e. Genduari rehen setan-setan ras kesah-kesah si melket ndahi diberu e.”—Ketangkasen 18:2