Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 62

Kerajan bagi Batang Kayu si Galang

Kerajan bagi Batang Kayu si Galang

Bas sada berngi, dat Nebukadnesar sada nipi si ngeri kel. Ilebuhna kalak si pentar gelah iceritakenna erti nipi e. Tapi la lit sada pe si banci njelaskenca. Dungna iceritaken raja man Daniel.

Nina Nebukadnesar man Daniel, ‘Bas nipiku, kuidah sada batang kayu. Ganjangna seh ku langit. Kerina kalak i doni banci ngidahsa. Buahna mbue ras bulungna mejile. Binatang-binatang cilinggem iteruhna, ras perik-perik rasar bas dahanna. Dung e, kuidah sada malekat nusur arah langit nari. Ermomo malekat e nina, “Tabahlah batang kayu e, tektek dahan-dahanna. Tapi pelepas tongkehna i bas taneh, dingen iket alu besi ras tembaga. Pitu tahun dekahna perukurenna lanai bagi perukuren manusia, tapi bagi perukuren rubia-rubia. Ieteh kerina kalak me maka Dibata kap si Erkuasa janah iberekenNa kuasa man ise pe ateNa.”’

Ijelasken Jahwe erti nipi e man Daniel. Kenca iangkai Daniel erti nipi e, mbiar kel ia. Nina man raja, ‘Andiko raja, kuakap nipi e kerna musuhndu, kepeken enda kerna kam. Batang kayu si galang si iiket e, eme kam. Lanai kam pagi merentah, panganndu pe peren-peren si lit i juma seri bagi binatang si meliar. Tapi bagi nina malekat e, tongkeh kayuna ipediat tetap lit, enda ertina jadi raja ka kam pagi mulihi.’

Setahun kenca si e, erdalan-dalan Nebukadnesar i teras istanana si arah datas, janah megah kel ukurna ngenen kota Babilon e. Janah nina, ‘Luar biasa kel kota si nggo kubangun e me. Hebat kel aku me!’ Sanga ia ngerana denga, lit sora si reh arah langit nari, ‘Nebukadnesar! Gundari lanai kam si merentah i bas kerajanndu.’

Kenca si e, mis ia jadi kalak mahado janah nggo seri ras binatang si meliar. Emaka arus ia ipelawes arah istanana nari, janah tading me ia bas kerangen seri bagi binatang si meliar. Dungna, bukna gedang bagi buk rajawali, silu-siluna gedang bagi silu-silu perik.

 Kenca pitu tahun, Nebukadnesar sehat ka mulihi janah ijadiken Jahwe ka ia raja i Babilon. Emaka nina Nebukadnesar, ‘Bujur ningku, O Jahwe, Raja i babo kerina langit. Gundari nggo kueteh maka Jahwe kap si Erkuasa. IpeterukNa kalak si meganjang rukur janah iberekenNa kerajan man ise pe ateNa.’

“Kegombangen mabai ku kebenen, keganjangen ukur mahanca guling nge.”—Kuan-kuanen 16:18