Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 57

Jahwe Nuruh Jeremia Erberita

Jahwe Nuruh Jeremia Erberita

Ipilih Jahwe si Jeremia jadi nabiNa man kalak Juda. IsuruhNa Jeremia erberita man kalak Juda ras mpersingeti kalak e gelah robah. Tapi nina Jeremia, ‘Ngudasa denga aku Jahwe. La aku beluh ngerana man kalak e.’ Emaka nina Jahwe bana, ‘Ula kam mbiar. Aku kari si ngajari kam. Kusampati nge kam.’

Dung e, isuruh Jahwe gelah ipepulung Jeremia peminpin-peminpin Israel, nce ipecahkenna kudin taneh i lebe-lebe kalak e, janah nina, ‘Bagenda me pagi si terjadi man Jerusalem.’ Sanga iban Jeremia bage, merawa kel peminpin-peminpin e. Lit sekalak imam i je gelarna Pashur, ipekpekna Jeremia nce ipasungna ia. Emaka sada berngi e, la ia banci kemuit. Paginna ipulahi Pashur ia. Nina Jeremia me, ‘Adi bagenda, lanai aku tahan. Ngadi saja aku erberita.’ Tuhu nge ia ngadi erberita? Lang. Kenca iukurina kerna si e, nina, ‘Berita arah Jahwe e bagi api bas pusuhku. La aku banci ngadi erberita.’ Emaka Jeremia terus mpersingeti kalak e.

Ertahun-tahun kenca si e, lit me raja si mbaru i Juda. Segat ate imam-imam ras nabi-nabi palsu man berita si ipeseh Jeremia. Emaka ikataken kalak e man pejabat-pejabat, nina, ‘Jeremia arus iukum mate.’ Emaka nina Jeremia, ‘Ngkai maka bunuhndu aku adi labo lit salahku? Kata Jahwe kap si kupeseh e, labo kataku.’ Kenca ibegi pejabat-pejabat e kai si ikataken Jeremia, nina, ‘Ula bunuh ia, labo ia ersalah.’

Perban terus Jeremia erberita dungna merawa pejabat-pejabat e. Ipindo kalak e man raja gelah Jeremia ibunuh. Ibere raja kalak e rate-ate man Jeremia. Emaka itangkap kalak e Jeremia ras ibenterkenna ku sumur si erkubang, janah ipediatna i je gelah ia mate. Menam Jeremia gedap bas kubang e.

Kenca e, lit sekalak pejabat istana gelarna Ebedmelek, ngerana ia man raja, nina, ‘Nggo iambekken kalak ah Jeremia ku bas sumur! Adi sipediat ia i je, pasti mate me ia.’ Emaka isuruh raja me si Ebedmelek gelah lawes ia ras 30 dilaki guna ngangkat Jeremia arah sumur nari. Nggit nge kita ngusih Jeremia, si tetap erberita amin gia melala si ngelarangsa?

“Segat pagi ate kalak kerina man bandu erkite-kiteken aku. Tapi kalak si megenggeng seh ku kedungenna terkelin kap.”—Matius 10:22