Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 14

Ngkai Maka Perlu Ibahan Dibata Sada Organisasi?

Ngkai Maka Perlu Ibahan Dibata Sada Organisasi?

1. Ngkai maka mbarenda iorganisasi Dibata bangsa Israel?

Iorganisasi Dibata kerina kesusuren Abraham jadi sada bangsa ras iberekenna sada undang-undang man bangsa e. IgelariNa bangsa e bangsa ”Israel”. Ia nggunaken bangsa e lako ndalanken penembahen si benar ras undang-undangNa. (Masmur 147:19, 20) Emaka, arah bangsa Israel ketuahen me melala jelma bas erbage-bage bangsa.​—Oge Kejadin 22:18.

Dibata milih bangsa Israel jadi saksi-saksiNa. Kai si ialami bangsa Israel mbarenda nuduhken kai gunana ndalanken undang-undang Dibata. (Ulangen 4:6) Emaka, arah bangsa Israel bangsa-bangsa sideban nandai Dibata si tuhu-tuhu.​—Oge Jesaya 43:10, 12.

2. Ngkai maka kalak Kristen si asli perlu iorganisasi?

Bangsa Israel dungna itulak Dibata. Emaka, igantiken Dibata bangsa e alu perpulungen Kristen. (Matius 21:43; 23:37, 38) Gundari, kalak Kristen nggo nggantiken keduduken bangsa Israel guna jadi saksi-saksi Dibata Jahwe.​—Oge Perbahanen Rasul-Rasul 15:14, 17.

Jesus erbahan sada pengaturen gelah kerina pengikutna mberitaken berita si meriah ras njadiken ajar-ajar i bas bangsa-bangsa nari. (Matius 10:7, 11; 24:14; 28:19, 20) I bas wari-wari pendungi enda dahin si mbelin e nggo seh tampukna. Enda me si tangtangna kal bas sejarah manusia Dibata mpersadaken jutan kalak i bas erbage-bage bangsa guna nembah Ia. (Ketangkasen 7:9, 10) Kalak Kristen si asli iorganisasi gelah sisampat-sampaten dingen siajar-ajaren. Kalak Kristen enda ndatken pengajaren si seri i bas perpulungen-perpulungenna i belang-belang doni.​—Oge Heber 10:24, 25.

 3. Uga nge mula tangtangna organisasi Saksi-Saksi Jahwe si genduari?

I bas tahun 1870-en, sada terpuk kitik ajar-ajar Pustaka si Badia mulai ndatken kebenaren-kebenaren i bas Pustaka si Badia nari, si nggo ndekah terbuni. Arah pelajaren si megermet iangka kalak e me maka Jesus nggo ngaturken perpulungen Kristen lako mberitaken berita si meriah. Emaka, ibenaken kalak e me sada kegiaten guna pembarken berita Kerajan e ku sebelang doni. Bas tahun 1931, kalak enda mulai make gelar Saksi-Saksi Jahwe.​—Oge Perbahanen Rasul-Rasul 1:8; 2:1, 4, 11; 5:42.

4. Uga carana Saksi-Saksi Jahwe iorganisasi?

I bas abad pemena, perpulungen-perpulungen Kristen i negeri-negeri sideban ndatken bimbingen ras ketetapen bas sada badan pinpinen nari si ngakui maka Jesus me Kepala perpulungen. (Perbahanen Rasul-Rasul 16:4, 5) Bage ka pe genduari, Saksi-Saksi Jahwe i belang-belang doni ndatken bimbingen ras ketetapen bas Badan Pinpinen nari si eranggotaken piga-piga pertua si erpengalamen. Kalak enda me si ngawasi kerina kantor-kantor cabang Saksi-Saksi Jahwe si nerjemahken, ncetak ras mbagiken ogen si erpalasken Pustaka si Badia i bas lebih 600 cakap. Emaka, Badan Pinpinen banci mereken kata pengapul ras bimbingen i bas Pustaka nari man lebih 100.000 perpulungen i belang-belang doni. I bas tiap-tiap perpulungen, dilaki-dilaki si ncukupi sarat ngelayani jadi pertua-pertua. Kalak enda melias, perkeleng ras mediate man kerina rarasen biri-biri Dibata.​—Oge 1 Petrus 5:2, 3.

Saksi-Saksi Jahwe iorganisasi guna mberitaken berita si meriah ras njadiken ajar-ajar. Bali ras rasul-rasul si ndube, kalak enda mberitakenca ku tiap-tiap rumah. (Perbahanen Rasul-Rasul 20:20) Kalak enda pe ngiahken kerina kalak si ngkelengi kebenaren gelah erlajar Pustaka si Badia. Tapi, Saksi-Saksi Jahwe labo sekedar organisasi saja. Kalak enda sada keluarga si sikeleng-kelengen, si erbapaken Dibata Jahwe si perkeleng. (2 Tesalonika 1:3) Erkiteken Saksi-Saksi Jahwe iorganisasi guna erbahan meriah ukur Dibata ras nampati kalak sideban, emaka kalak enda me sada keluarga si meriahna kal ukurna i doni enda.​—Oge Masmur 33:12; Perbahanen Rasul-Rasul 20:35.