Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 6

Kai Arapen Kalak si Enggo Mate?

Kai Arapen Kalak si Enggo Mate?

1. Kai berita si mehuli man kalak si enggo mate?

Sanga Jesus i doni, temanna Lasarus mate. Jesus seh i rumahna kenca empat wari ia mate. Jesus lawes ku kuburenna radu Marta ras Maria, turang Lasarus. La ndekah kenca si e enterem kalak reh pulung i kuburen Lasarus. Banci nge bayangkenndu uga riahna ukur Marta ras Maria sanga ngidah Jesus mpekeke Lasarus?​—Oge Johanes 11:21-24, 38-44.

Enggo me ieteh Marta berita si mehuli kerna kalak mate. Ietehna ka nge maka i bas sada waktu pagi Dibata Jahwe mpekeke kalak si enggo mate guna nggeluh i doni.​—Oge Jop 14:14, 15.

2. Uga keadan kerna kalak mate?

Nina Dibata man Adam, ”I bas taneh nari kam ijadiken, janah jadi taneh ka kam mulihken.”​—KEJADIN 3:19.

Manusia itepa i bas abu taneh nari. (Kejadin 2:7; 3:19) Labo lit kegeluhen roh i bas kulanta. Kita itepa Dibata i bas bentuk dareh ras daging saja, emaka la lit sada bagin pe si tetap nggeluh kenca kita mate. Otakta pe mate, ras kai pe labo banci siinget adi kita nggo mate. E me sabapna, Lasarus labo beluh nuriken kai si inanamina sanga ia mate, sabap kalak mate kai pe lanai ietehna.​—Oge Masmur 146:4; Pengerana 9:5, 6, 10.

Payo nge Dibata niksa kalak si nggo mate i bas api? Pustaka ngatakenca, kalak mate sitik pe la sedar. Emaka, ajaren api neraka enda sada ajaren palsu si njuruken Dibata. Bage pe niksa jelma i bas api, ciga kel ate Dibata ras labo lit sitik pe i bas ukurNa.​—Oge Jeremia 7:31.

Tontonlah video Uga nge Keadan Kalak Mate?

 3. Banci kin kalak mate ngerana ras kita?

Kalak mate la banci ngerana ntah pe erpembegi. (Masmur 115:17) Tapi, lit malekat-malekat jahat si nangko rupa kalak si mate ndai. (2 Petrus 2:4) Emaka, Jahwe ngelarang kita ngerana ntah pe nungkun ku kalak mate.​—Oge Ulangen 18:10, 11.

4. Ise saja kin pagi si ipekeke Dibata?

Kentisik nari jutan kalak si nggo mate nggeluh mulihi i doni. Melala ka nge kalak si la nandai Dibata ras kalak si jahat denggo ipekeke Dibata.​—Oge Lukas 23:43; Perbahanen Rasul-Rasul 24:15.

Nterem jelma ipekeke guna ndatken kesempaten erlajar kerna Dibata, gelah erkiniteken nandangi Jesus janah patuh man bana. (Ketangkasen 20:11-13) Kerina jelma si nggeluh mulihi ras ngelakoken kai si mehuli banci nggeluh si rasa lalap i doni enda.​—Oge Johanes 5:28, 29.

5. Kai banci sipelajari kerna Jahwe i bas kinikeken nari?

Kalak mate banci erpengarapen guna nggeluh si rasa lalap sabap Dibata nggo ngutus Jesus guna mate nebus dosanta. Emaka, alu litna kinikeken e, banci si gejapken kekelengen ras kiniulin Dibata. I bas wari kinikeken e pagi, ise nge atendu ijumpaindu?​—Oge Johanes 3:16; Roma 6:23.