Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  Februari 2018

Tongtong ma Dohor bani Jahowa!

Tongtong ma Dohor bani Jahowa!

‘Marguru bani tonduy na pansing ma nasiam.’​—GAL. 5:16.

DODING: 22, 75

1, 2. Mase songon na dong na hurang iahap si Robert, anjaha aha do na ibahenni?

SANGGAH poso ope, si Robert domma ididi. Tapi hasintongan ai lang tongon-tongon hona bani uhurni. Ihatahonni do, “Anggo ididah halak, songon na toguh do parhasomananku bani Jahowa. Lang ongga huhorjahon na salah, dihut do ahu martumpu, anjaha marintis ekstra do ahu piga-piga hali ibagas satahun. Tapi songon na dong na hurang huahap.”

2 Ibotoh si Robert ma aha na hurang ai, dobkonsi ia marhajabuan. Sipata ia pakon parinangonni mambahen sungkun-sungkun humbani Bibel. Anggo parinangonni boi do mambalosi sungkun-sungkun ni si Robert. Tapi anggo si Robert, gatih do lang boi mambalosi sungkun-sungkun ni parinangonni. Halani ai, gabe maila ma pangahapni. Nini si Robert, “Otik do hape na hubotoh pasal Bibel. Maningon mubah do ahu, ase boi mangurupi parinangonku dohor bani Jahowa. Jadi ringgas ma ahu marlajar Bibel. Lambin dokah, lambin bahat ma na boi  huarusi anjaha na siporlunan, lambin dohor ma ahu bani Jahowa.”

3. (a) Aha do na iparlajari hita humbani si Robert? (b) Aha do na laho iulas hita bani artikel on?

3 Aha do na iparlajari hita humbani si Robert? Hassi pe domma dong otik na ibotoh hita pasal Bibel, ringgas hita martumpu atap marbarita, tapi lang ai na mambahen hita dohor bani Jahowa. Atap, ra do domma ibahen hita hamubahon ibagas goluhta, hape dobkonsi iparimbagaskon hita use, dong ope na porlu ipadear. (Pil. 3:16) Bani artikel on iulas hita ma tolu sungkun-sungkun: (1) Hunja do ibotoh hita anggo hita domma dohor bani Jahowa? (2) Aha na boi bahenonta ase lambin dohor bani Jahowa? (3) Sonaha do hita patuduhkon ibagas hagoluhan siganup ari anggo hita dohor bani Jahowa?

HUNJA DO IBOTOH HITA ANGGO HITA DOMMA DOHOR BANI JAHOWA?

4. Ise do na maningon mandalankon podah na isuratkon bani Epesus 4:23, 24?

4 Sanggah hita marlajar Bibel, bahat do hamubahon na ibahen hita ibagas goluhta. Hassi pe hita domma ididi, totap ope adong na porlu sipadearon. Bibel mangkatahon, “Gabe bayu ma nasiam ibagas tonduy ni uhur nasiam.” (Ep. 4:23, 24) Jadi halani mardousa hita, maningon tongtong do hita mambahen hamubahon. Anjaha hassi pe domma dokah hita gabe saksi Jahowa, totap do hita porlu patoguhkon parhasomananta pakon Jahowa.​—Pil. 3:12, 13.

5. Sungkun-sungkun aha do na porlu irimangi hita?

5 Haganupan hita, na matua pakon na maposo porlu do mamareksa diri. Rimangi ma on, ‘Hassi pe domma dokah ahu ididi, ai lambin dohor do ahu bani Jahowa? Ai marusaha do ahu ase tongtong mangusihi Jesus? Sonaha do parlahouku sanggah i partumpuan, ai taridah do anggo ahu dohor bani Jahowa? Ibagas parsahapanku, aha do na siporlunan bangku? Ai ringgas do ahu marlajar Bibel? Sonaha do parpakeianku, anjaha sonaha do pangahapku sanggah ipodahi? Aha do na hubahen ase ulang mangkorjahon na lepak? Ai huhorjahon do na sintong?’ (Ep. 4:13) Anggo irimangi hita ganupan ai, ibotoh hita ma ai domma dohor hita bani Jahowa atap lang.

6. Ise do na mambotoh anggo hita domma dohor bani Jahowa atap lang?

6 Sipata humbani halak na legan pe boi do ibotoh hita anggo hita domma dohor bani Jahowa atap lang. Ipatugah si Paulus do anggo halak na  mangkaholongi dunia on, lang mambotoh aha na mambahen malas uhur ni Jahowa. Tapi anggo halak na dohor bani Jahowa, iarusi do harosuh ni Jahowa janah ibotoh do homa anggo Jahowa lang marosuh bani halak na mangkaholongi dunia on. (1 Kor. 2:14-16; 3:1-3) Sintua na mangusihi Jesus boi do mambotoh anggo dong sanina-botou na mangkaholongi dunia on, anjaha sihol do sintua ai mangurupi sidea. Jadi anggo dong sintua na mamodahi, ai ra do hita mambahen hamubahon? Anggo ra hita, on patuduhkon anggo hita sihol patoguhkon parhasomananta bani Jahowa.​—Par. 7:5, 9.

NA PORLU BAHENONTA ASE LAMBIN DOHOR BANI JAHOWA

7. Mase lang sungkup pitah mambotoh isi ni Bibel ase boi dohor bani Jahowa?

7 Hassi pe bahat na ibotoh hita pasal Bibel, tapi lang pitah ai na mambahen hita dohor bani Jahowa. Umpamani, si Salomo. Bahat do habotohonni pasal Jahowa. Anjaha isuratkon do homa piga-piga podahni bani Bibel. Tapi ujungni lang setia ia bani Jahowa. (1 Raj. 5:9, 10; 11:4-6) Halani ai, aha ope na porlu bahenonta? Maningon tongtong do ipatoguh hita haporsayaonta. (Kol. 2:6, 7) Sonaha carani?

8, 9. (a) Aha na porlu bahenon ase totap toguh haporsayaonta? (b) Sanggah hita marlajar Bibel, aha ma namin na gabe tujuanta? (Tonggor ma gambar bani alm. 22.)

8 Bani abad na parlobei, iojur si Paulus do halak Kristen ase gabe “halak na dob matoras”. (Heb. 6:1) Sonaha do hita boi mangihutkon podahni? Sada cara, iparlajari hita ma buku Cara agar Tetap Dikasihi Allah”. Buku ai mangurupi hita ase mandalankon prinsip ni Bibel ibagas hagoluhanta. Anggo domma salosei iparlajari hita buku ai, parlajari ma use buku na legan na boi patoguhkon haporsayaonta. (Kol. 1:23) Maningon iparimbagaskon hita do homa aha na iparlajari, anjaha mangindo  pangurupion bani Jahowa ase boi mandalankon ai.

9 Tujuanta sanggah marlajar Bibel ai ma ase hita boi pamalaskon uhur ni Jahowa, anjaha mandalankon parentah-Ni. (Ps. 40:9; 119:97) Anjaha ulang ma ihorjahon hita aha pe na mambahen galek haporsayaonta.​—Tit. 2:11, 12.

10. Aha do na porlu ibahen na maposo ase lambin dohor hanima bani Jahowa?

10 Na maposo, ai ongga do ipingkirhon hanima sonaha ase lambin bahat panorangnima laho mangidangi Jahowa? Sanggah kebaktian, dong sada sanina hun Betel na gatih marsahapi pakon na maposo na laho ididi. Isungkun sanina ai do sidea, ongga do ipingkirhon sidea sonaha ase lambin bahat panorangni laho mangidangi Jahowa. Piga-piga dong na mamingkirhon ase gabe parintis janah pindah bani ianan na mamorluhon parbarita. Tapi na leganni, lape ongga ipingkirhon pasal ai. Halani ai, anggo poso ope nasiam, rimangi ma on: ‘Anggo ahu martumpu janah marbarita, ai halani isuruh-suruh namatorasku do ahu? Ai toguh do parhasomananku bani Jahowa?’ Sasintongni na maposo atap pe na matua porlu do mamingkirhon aha na porlu bahenon ni sidea, ase boi mambere bahat panorang laho mangidangi Jahowa. Anggo ipingkirhon hita ai, ai do na  mangurupi hita ase lambin dohor bani Jahowa.​—Par. 12:1, 13.

11. (a) Aha do na porlu bahenonta ase lambin dohor bani Jahowa? (b) Ise do na boi gabe siusihan hubanta?

11 Dobkonsi ibotoh hita dong na hurang ibagas dirinta, maningon podas ma mambahen hamubahon, ase hita boi mandapot hagoluhan sadokah ni dokahni. (Rom 8:6-8) Lang iarapkon Jahowa ase hita gabe gokan dear. Tapi ibere-Ni do kuasa hubanta laho mangurupi hita. Hassi pe sonai, maningon marusaha ma hita mambahen hamubahon. Sanina John Barr ai ma Pangurus Pusat, ongga do mangulas Lukas 13:24, janah nini ma, “Bahat do halak na lang boi masuk hun labah na sompit in, halani lang ipatoguh sidea parhasomananni pakon Jahowa.” Jadi usihi hita ma si Jakob. Lang ra ia paluahkon sada malekat ronsi dapotni pasu-pasu. (1 Mus. 32:26-28) Sonai homa ma sanggah mambasa Bibel. Mambasa Bibel boi do pamalaskon uhurta. Tapi maningon marusaha do hita laho mangarusi isini, halani lang sarupa mambasa Bibel pakon na mambasa Novel.

12, 13. (a) Aha do na boi mangurupi hita laho mangihutkon podah bani Pilippi 2:5? (b)  Sonaha do hita boi mangusihi si Petrus anjaha mangihutkon podahni? (c) Aha do na boi bahenonta ase lambin toguh parhasomananta pakon Jahowa? (Tonggor ma kotak “ Na Boi Bahenonta ase Lambin Dohor bani Jahowa.”)

12 Anggo marusaha hita ase lambin dohor bani Jahowa, urupan-Ni ma hita marhitei tonduy na pansing ase boi mangusihi paruhuran ni Kristus. (Pil. 2:5) Tonduy na pansing boi do mangurupi hita ase ulang mangihutkon hisap-hisap ni daging, anjaha mangurupi hita ase marparlahou songon na iharosuhkon Jahowa. (Gal. 5:16, 22, 23) Anggo sadokah on arta do na ibahen hita na siporlunan, ulang ma mintor maretek ni uhur. Pindo ma pangurupion bani Jahowa ase boi mubah. (Luk. 11:13) Dingat ma si Petrus. Ia pe lang tongtong mangusihi paruhuran ni Kristus. (Mat. 16:22, 23; Luk. 22:34, 54-62; Gal. 2:11-14) Tapi halani totap ia marusaha, iurupi Jahowa do ia ase mubah. Ujungni gabe boi ma si Petrus mangusihi paruhuran ni Jesus. Hita pe boi do homa sonai.

13 Dob piga-piga dokah, ipatugah si Petrus ma pasal biak na maningon ipatuduh hita ase lambin dohor bani Jahowa. (Basa 2 Petrus 1:5-8.) Umpamani, maningon marusaha do hita ase boi manrajai diri, sabar, marholong ni uhur bani hasoman, ampa na leganni. Halani ai rimangi ma on, ‘Biak na ija do na sihol patuduhonku sadari on?’

MANDALANKON PRINSIP NI BIBEL IBAGAS HAGOLUHAN

14. Sonaha do hita patuduhkon ibagas hagoluhan siganup ari anggo hita dohor bani Jahowa?

14 Anggo hita mangusihi paruhuran ni Kristus, taridah do ai humbani parlahounta i parhorjaan, i sikolah, ampa sanggah mambahen haputusan. Anggo dohor hita bani Jahowa, ijaga hita do ase parhasomananta totap toguh pakon Naibata. Hita pe lang ra mangkorjahon na lepak. Jadi paima mambahen haputusan, pasomal ma laho mamingkirhon on: ‘Prinsip Bibel na ija do na boi  mangurupi ahu? Anggo Jesus ibagas situasingku, aha do na laho bahenonni? Ai malas do uhur ni Jahowa bani haputusan na hubahen?’ Sonari ulas hita ma piga-piga prinsip ni Bibel na mangurupi hita mambahen haputusan na dear.

15, 16. Sonaha do hita boi mangusihi paruhuran ni Kristus sanggah (a) mamilih hasoman marjabu? (b) mamilih hasoman?

15 Mamilih hasoman marjabu. Prinsipni boi ididah hita bani 2 Korint 6:14, 15. (Basa.) Ipatugah si Paulus do anggo halak na dohor bani Jahowa legan do pamingkirionni pakon halak na mangkaholongi dunia on. Jadi, sonaha do nasiam boi mangihutkon prinsip ai sanggah mamilih hasoman marjabu?

16 Mamilih hasoman. Prinsipni boi ididah hita bani 1 Korint 15:33. (Basa.) Halak na dohor bani Jahowa seng ra marhasoman pakon halak na boi mambahen galek haporsayaonni. Halani ai, pingkirhon ma sonaha do nasiam boi mandalankon prinsip ai. Umpamani sanggah manggunahon jejaring sosial atap pe mar-game online pakon halak na legan.

Humbani haputusan na hubahen, ai taridah do anggo ahu dohor bani Jahowa? (Tonggor ma paragrap 17)

17-19. Anggo nasiam dohor bani Jahowa, aha do na laho bahenon ni nasiam sanggah (a) mamilih na laho sihorjahononta? (b) mambahen cita-cita? (c)  dong parsalisihan?

17 Mamilih na laho sihorjahononta. Dong do sipasingat na ponting bani Heber 6:1. (Basa.) Aha do artini “horja hamatean” ai? Ai ma horja na lang dong gunani anjaha boi mambahen galek haporsayaonta bani Jahowa. Maningon ipadaoh hita ma horja sisonai. Jadi pingkirhon ma on: ‘Ai dong do gunani horja on bangku? Ai ra do ahu dihut bani bisnis sisonon? Ai ra do ahu dihut bani tumpuan na sihol mangubah dunia on?’

Humbani haputusan na hubahen, ai taridah do anggo ahu sihol mambere bahat panorang laho mangidangi Jahowa? (Tonggor ma paragrap 18)

18 Mambahen cita-cita. Sanggah Jesus marambilan i dolog, ibereni do podah na dear. (Mat. 6:33) Halak na dohor bani Naibata mambahen Harajaon ni Naibata do na siporlunan ibagas goluhni. Jadi laho mandalankon prinsip ai, pingkirhon ma on: ‘Dobkonsi tamat sikkolah ahu, ai hutoruskon ope laho kuliah? Ai hujalo do horja sisonon?’

Humbani haputusan na hubahen, ai taridah do anggo ahu sihol mardamei pakon halak na legan? (Tonggor ma paragrap 19)

19 Sanggah dong parsalisihan. Hita boi do mangihutkon podah ni si Paulus bani kuria Rom sanggah marsalisih pakon halak na legan. (Rom 12:18) Anggo hita mangusihi Kristus, marusaha do hita ase ‘mardamei pakon ganup halak’. Jadi aha do na laho bahenonta sanggah dong parsalisihan? Ai ra do hita manangar pandapot ni halak na legan? Ai boi do ididah halak na legan anggo hita marusaha ase mardamei?​—Jak. 3:18.

20. Mase nasiam sihol lambin dohor bani Jahowa?

20 Prinsip-prinsip ni Bibel boi do mangurupi hita mambahen haputusan na pamalaskon uhur ni Jahowa. Anggo hita dohor bani Jahowa, in ma na mambahen hita martuah. Sonai do na iahapkon si Robert na isaritahon nongkan. Nini do, “Halani ahu domma dohor bani Jahowa, boi ma ahu gabe paramangon pakon bapa na bujur, anjaha martuah.” Jadi anggo ijaga hita parhasomananta pakon Jahowa, gabe marmalas ni uhur ma hita, anjaha bani ari simagira boi mandapot “goluh na sintong”.​—1 Tim. 6:19.