Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  Februari 2018

Si Jakob gabe ompung ni Mesias, ai halani domma ibere si Esau do hak sikahanan hubani?

Na Isungkun Pambasa

Na Isungkun Pambasa

Bani halak Israel sapari, ai maningon anak sikahanan do na boi gabe ompung ni Mesias?

Sapari sonai do pangarusionta. Mase? Bani Heber 12:16 ihatahon, ihorjahon si Esau do ‘habutakon’ anjaha ibereni do bani si Jakob “hak sikahanan halani sipanganon na otik”. Jadi iagan hita ma, halani domma ijalo si Jakob “hak sikahanan” ai, ia ma na gabe ompung ni Mesias.​—Mat. 1:2, 16; Luk. 3:23, 34.

Tapi dobkonsi tangkas iparlajari hita humbani Bibel, gabe ibotoh hita ma lang maningon anak sikahanan na gabe ompung ni mesias. Mase? Ulas hita ma piga-piga alasanni:

Anak sikahanan ni si Jakob humbani si Lea ai ma si Ruben, anjaha anak sikahananni humbani si Rahel ai ma si Josep. Tapi halani si Ruben mangkorjahon na butak ibere ma hak sikahanan ai bani si Josep. (1 Mus. 29:31-35; 30:22-25; 35:22-26; 49:22-26; 1 Kron. 5:1, 2) Songon na dob ibotoh hita lang humbani ginompar ni si Josep atap pe si Ruben, Mesias ai tubuh. Tapi humbani ginompar ni si Juda do. Anjaha si Juda, ai ma anak paompathon ni si Jakob humbani si Lea.​—1 Mus. 49:10.

Tongon, bani Lukas 3:32 adong do ipatugah lima goran ni halak na gabe ompung ni Mesias. Ra do sidea ai anak sikahanan. Umpamani, ihatahon do anak ni si Boas ai ma si Obed, anjaha anak ni si Obed ai ma si Isai.​—Rut 4:17, 20-22; 1 Kron. 2:10-12.

Lang si Daud anak sikahanan ni si Isai. Tapi anak sianggian do ia. Hassi pe sonai humbani ginompar ni si Daud do Mesias ai tubuh. (1 Sam. 16:10, 11; 17:12; Mat. 1:5, 6) Sonai homa do ompung ni Mesias na legan,  ai ma si Salomo. Ia sedo anak sikahanan ni si Daud.​—2 Sam. 3:2-5.

Tapi sedo artini hak sikahanan ai lang ponting. Sasintongni bahatan do na ijalo anak sikahanan marimbangkon anak na legan. Umpamani, porini marujung goluh bapa ni sidea, anak sikahanan do na gabe kopala kaluarga manggantihon bapani. Anjaha sanggah mambagi tading-tadingan, anak sikahanan mandapot dua hali lompit.​—1 Mus. 43:33; 5 Mus. 21:17; Jos. 17:1.

Tapi, hak sikahanan ai boi do ibere bani anak na legan. Umpamani, sanggah isuruh si Abrahan si Ismael misir hun rumahni, hak sikahanan ibere ma hubani si Isak. (1 Mus. 21:14-21; 22:2) Songon na dob iulas hita nongkan, hak sikahanan ni si Ruben ibere do bani si Josep.

Aha do sasintongni na sihol na iajarhon si Paulus bani Heber 12:16? Ijai si Paulus mangkatahon “Ulang ma adong siparriah-riah atap na marhabutakon songon si Esau, na manjualhon hak sikahanan halani sipanganon na otik.”

Jadi si Paulus sedo na laho patugahkon ise do na gabe ompung ni Mesias. Tapi ia sihol mambere sipasingat hubani halak Kristen. Halani ai ma ase ihatahonni, “Papintor nasiam ma dalan sidalanan ni nahei nasiam” ase “ulang adong na [lang dapotan] idop ni uhur ni Naibata”. Dob ai ipasingat si Paulus use sidea ase ulang songon si Esau, na lang mangkargai aha na dob ijaloni halani mangkorjahon hisap-hisap ni daging.​—Heb. 12:12-16.

Songon hasomalan ni halak sapari, halani anak sikahanan do si Esau dong do hakni laho mambere galangan bani Jahowa. (1 Mus. 8:20, 21; 12:7, 8; Job 1:4, 5) Tapi lang ihargai si Esau hakni ai. Pitah mandalankon hisap-hisap ni daging do na siporlunan bani. Umpamani, halani sipanganon na otik, ijual ni do hak sikahanan ai. Si Esau pe ra do domma mambotoh na ihatahon Jahowa bani si Abraham, anggo ginomparni si Abraham marsitaronon do holi. Anjaha ra do ia lang ra dihut manaron ai. (1 Mus. 15:13) Dob ai, ibuatni ma dua naboru na lang sisombah Jahowa bahen parinangonni. Ai ma na mambahen pusok uhur ni namatorasni. (1 Mus. 26:34, 35) Legan do pakon si Jakob, na mambuat naboru sisombah Jahowa bahen parinangonni!​—1 Mus. 28:6, 7; 29:10-12, 18.

Humbani sarita on, boi ma ibotoh hita anggo ompung ni Mesias ai lang ganupan anak sikahanan. Anjaha iakui halak Jahudi do ai. Hunja do ibotoh hita? Halani ihatahon sidea do Kristus ai ginompar ni si Daud, ai ma anak sianggian humbani si Isai.​—Mat. 22:42.