Langsung hu konten

Langsung hu menu sekunder

Langsung hu daftar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  September 2017

Usihi ma Idop ni Uhur ni Jahowa

Usihi ma Idop ni Uhur ni Jahowa

“Jahowa, Jahowa do Naibata pardear layak anjaha paridop ni uhur.”​—2 MUSA 34:6.

DODING: 142, 12

1. Sonaha do Jahowa patandahon diri-Ni bani si Musa? Anjaha mase on porlu ibotoh si Musa?

BANI sada panorang, ipatandahon Naibata ma bani si Musa pasal goran pakon biak-Ni. Sasintongni Jahowa boi do mintor patuduhkon hagogohan pakon hapentaran-Ni. Tapi na parlobei ipatugah ai ma pasal idop ni uhur pakon dear layak-Ni. (Basa 2 Musa 34:5-7.) On porlu do ibotoh si Musa ase porsaya na iurupi Jahowa do ia. Jadi marhitei on, taridah do anggo Jahowa sihol mangurupi juakjuak-Ni. (2 Mus. 33:13) Sonaha ma pangahapta halani mambotoh na maridop ni uhur do Jahowa hubanta? Idop ni uhur ai ma sapangahapan bani sitaronon ni na legan janah ra mangurupi sidea. Jadi on ma na laho iulas hita bani artikel on.

2, 3. (a) Aha do na pataridahkon anggo jolma boi maridop ni uhur? (b) Mase hita sihol mangulas pasal idop ni uhur?

2 Paridop ni uhur do Jahowa. Halani itompa usih songon rupani, jolma pe boi pataridahkon idop ni uhur hassi pe lang mananda Jahowa. (1 Mus. 1:27) Bani Bibel  buei do contoh na patugahkon pasal halak na maridop ni uhur. Umpamani, bani panorang ni si Salomo, adong dua naboru na maringori anjaha haduasi mangkatahon anakni do sada etek-etek ai. Laho mambotoh ise do sasintongni inang ni etek-etek ai, ihatahon si Salomo ma ase iponggol dua etek-etek ai. Tapi gabe idop ma uhur ni inang ni etek-etek ai janah mintor ihatahon ma bani raja ase ulang iponggol etek-etek ai tapi ibere ma bani naboru na sada ai. (1 Raj. 3:23-27) Contoh na legan ai ma pasal boru ni si Parao. Sanggah jumpahsi si Musa na etek ope, gabe “idop ma uhurni mangidahsi” lanjar ibuat ma si Musa gabe anak angkatni hassi pe ibotohni halak Heber na laho ibunuh do si Musa ai.​—2 Mus. 2:5, 6.

3 Mase iulas hita pasal biak idop ni uhur? Halani sihol do Jahowa ase hita mangusihi-Si. (Ep. 5:1) Hassi pe usih songon rupa-Ni do hita itompa, tapi halani lang gokan dear, gatih do hita mangindahi pitah na porlu bani dirinta sandiri. Anjaha sipata lang ibotoh hita bani panorang na sonaha do hita boi maridop ni uhur. Jadi aha ma na boi mangurupi hita ase mamingkirhon haporluan ni halak na legan? Parlobei, ulas hita ma siusihan humbani Jahowa pakon halak na legan na pataridahkon idop ni uhur. Paduahon, parlajari hita ma sonaha do hita boi mangusihi Jahowa janah aha do gunani ai banta.

SIUSIHAN HUMBANI JAHOWA

4. (a) Mase isuruh Jahowa malekat-Ni laho hu Sodom? (b) Aha do na boi iparlajari hita humbani si Lot?

4 Bani Bibel gati do ipatuduh pasal idop ni uhur ni Jahowa. Umpamani na masa bani si Lot, halak parpintor. “Sai marhoru tong” ia halani buei hajahaton i Sodom pakon Gomora, janah halak ijai seng mabiar bani Naibata. Halani ai sihol ripaskonon ni Jahowa ma halak ai. (2 Ptr. 2:7, 8) Tapi isuruh Jahowa ma malekat-Ni patugahkon ai bani si Lot anjaha maningon maporus ma ia. Bibel mangkatahon, “Halani ipadokah-dokah [si Lot], itangkap na dua halak ai ma tanganni pakon tangan ni parinangon pakon tangan ni boruni na dua ai, halani sihol paluahon ni Jahowa do ia; iarahkon sidea ma ia anjaha ipasaran i darat ni huta ai.” (1 Mus. 19:16) Hunjon taridah ma iarusi Jahowa do na masa bani si Lot. Halani ai, pos ma uhurta iarusi Jahowa do homa sitarononta.​—Jes. 63:7-9; Jak. 5:11; 2 Ptr. 2:9.

Pos ma uhurta iarusi Jahowa do homa sitarononta

5. Sonaha do Bibel mangojur hita ase maridop ni uhur?

5 Iajarhon Jahowa do ase juakjuak-Ni maridop ni uhur. Umpamani pingkirhon ma pasal sada titah na ibere Jahowa bani halak Israel. Ijai ihatahon anggo dong halak na painjamkon duitni bani na legan, hiou ni na manginjam ai boi do ibuat bahen borot.  (Basa 2 Musa 22:26, 27.) Tapi paima sundut mata ni ari, maningon ipaulak do hiouni ai ase ulang borgohan ia sanggah borngin. Halak na lang maridop ni uhur, ra do lang ipaulak hiouni ai. Tapi sihol do Jahowa ase juakjuak-Ni maridop ni uhur. Hunjon, prinsip aha do na boi idapot hita? Sirsir ma mangurupi sanina-botou na mamorluhon, sedo halani tarpaksa tapi halani hita maridop ni uhur bani sidea.​—Kol. 3:12; Jak. 2:15, 16; basa 1 Johannes 3:17.

6. Humbani idop ni uhur ni Jahowa bani halak Israel, aha do na boi iparlajari hita?

6 Totap do ipatuduh Jahowa idop ni uhur-Ni bani halak Israel hassi pe mardousa sidea dompak-Si. Hita mambasa, “Girah anjaha gati do namin isuruh Jahowa, Naibata ni ompung ni sidea, palumbahon sidea marhitei suruhan-Ni, ai harga do bangsa-Ni pakon rumah ianan ai bani uhur-Ni.” (2 Kron. 36:15) Songon Jahowa, hita pe sihol maridop ni uhur bani halak na lape mananda Jahowa. Sihol do uhur ni Jahowa ase ganupan halak mubah janah marhasoman pakon-Si. (2 Ptr. 3:9) Halani ai, on ma panorangni hu banta laho patugahkon sipasingat ni Jahowa bai ganup halak anjaha mangurupi sidea ase mandapot idop ni uhur ni Naibata.

7, 8. Mase sada kaluarga boi porsaya bani idop ni uhur ni Jahowa?

7 Sonari on, buei do juakjuak ni Naibata na mangahapkon idop ni uhur-Ni. Umpamani bani tahun 1990-an, masa ma porang suku i Bosnia. Dong sada kaluarga ijai na sihol kebaktian. Adong ma niombahni na margoran si Milan, marumur 12 tahun pakon sada anggini. Anjaha sihol ididi do bapa ni sidea bani kebaktian ai. Bingkat ma sidea marbus pakon saksi na legan hun Bosnia hu Serbia. Sanggah i parbatasan, ipasoh tantara ma bus ni sidea. Halani legan do suku ni kaluarga ni si Milan, ipaturun tantara ai ma sidea. Tapi na leganni ipaturut do laho. Itahan tantara ai ma kaluarga ni si Milan sadokah dua ari. Dob ai isungkun tantara ai ma komandanni aha do na laho bahenonni bani kaluarga ni si Milan. Itangar kaluarga ni si Milan ma balos ni komandan ni sidea na mangkatahon, “Boan ma sidea janah tembak ma!”

8 Sanggah na marsahapi tantara ai, roh ma dua halak na lang itanda manjumpahi kaluarga ni si Milan. Ihusipkon sidea ma anggo sidea pe saksi Jahowa do. Janah domma ibotoh sidea aha na masa, humbani sanina na samotor rapkon kaluarga ni si Milan. Jadi isuruh saksi ai ma ase si Milan pakon anggini masuk hu motor ni sidea i dipar ni parbatasan, halani anggo dakdanak, lang ipareksa tantara surat-suratni. Tapi namatoras ni si Milan, isuruh ma mardalan hun pudi ni pos parbatasan ai laho hu motor ni sidea. Mabiar tumang do si Milan. Anjaha isungkun namatorasni ma, “Ai ipaturut sidea gakni hanami laho?” Tapi sanggah na lintun ai sidea, songon na lang ididah tantara ai do sidea. Ujungni, boi ma sidea bingkat hu  kebaktian. Porsaya do sidea ibalosi Jahowa do tonggo ni sidea. Tongon, lang tongtong sonai pangurupion ni Jahowa bani juakjuak-Ni. (Lah. 7:58-60) Tapi humbani sarita on, nini si Milan ma, “Songon na ipapitung malekat do tantara ai janah ipaluah Jahowa ma hanami.”​—Ps. 97:10.

Songon Jesus, ai ra do nasiam mangurupi halak ase mananda Jahowa?

9. Sonaha do pangahap ni Jesus bani buei halak na mangirikkonsi? (Idah gambar bani alm. 9.)

9 Jesus pe paridop ni uhur do. Sanggah dong ididahni halak na “loja anjaha mambur merap do sidea songon biribiri na so marparmahan”, gabe idop ma uhurni bani sidea. Dob ai, aha do na ibahenni? “Buei ma ipodahkon bani sidea”. (Mat. 9:36; basa Markus 6:34.) Tapi legan do halak Parisei. Sidea lang maridop ni uhur janah lang ra mangurupi halak. (Mat. 12:9-14; 23:4; Joh. 7:49) Songon Jesus, ai ra do nasiam mangurupi halak ase mananda Jahowa?

10, 11. Ai bani ganup panorang do hita patuduhkon idop ni uhur? Bere ma contohni.

10 Sasintongni lang maningon bani ganup panorang hita patuduhkon idop ni uhur. Umpamani, iagan Raja Saul do ia na maridop ni uhur halani lang ra mamunuh munsuh ni Naibata, Raja ni Amalek si Agag pakon ganup pinahan ni sidea. Hape domma parlobei ihatahon Naibata ase ibunuh si Saul ma ganupan ai. Halani lang manangihon Jahowa, itulak ma ia gabe raja. (1 Sam. 15:3, 9, 15) Hunjon taridah ma ibotoh Jahowa do sadihari panorang na sosok laho patuduhkon idop ni uhur, halani Ia do Panguhum na pintor anjaha boi mambotoh uhur ni jolma. (Tangis. 2:17; Hes. 5:11) Lang piga dokah nari uhumon ni Jahowa ma ganup parjahat bani ari panguhuman, janah lang be ai panorangni bani Jahowa laho maridop ni uhur bani parjahat. (2 Tes. 1:6-10) Sasintongni, halani idop ni uhur-Ni do bani halak parpintor, ase iripaskon ganup parjahat.

11 Jadi sedo hakta na laho manontuhon ise do na sosok ipaluah pakon na lang. Tapi na boi ibahen hita sonari ai ma mangurupi halak na legan. Sonaha do hita patuduhkon idop ni uhur bani na legan? On ma na laho iulas hita.

SONAHA HITA BOI PATUDUHKON IDOP NI UHUR

12. Sonaha do hita patuduhkon idop ni uhur bani na legan?

12 Ringgas ma mangurupi. Marosuh do Jahowa ase hita maridop ni uhur bani na legan pakon hasomanta. (Joh. 13:34, 35; 1 Ptr. 3:8) Artini maridop ni uhur ai ma “sapangahapan bani hasunsahan ni na legan”. Jadi anggo dong na mamorluhon, urupi hita ma sidea domu bani na boi tarbahen hita. Umpamani, mangurupi sidea mangkorjahon horja i rumah ampa mamboli aha na ihaporluhon sidea.​—Mat. 7:12.

Ringgas ma mangurupi na legan (Idah paragrap 12)

13. Sonaha do juakjuak ni Jahowa mangurupi sidea na hona bencana?

 13 Mangurupi na hona bencana. Maidop do uhurta sanggah mangidah dong na hona bencana. Buei do halak mananda Saksi-Saksi Jahowa halani ringgas mangurupi halak na hona bencana. (1 Ptr. 2:17) On ma na iahapkon sada botou i Japang. Bani tahun 2011 masa ma gempa ampa tsunami i Japang. Nini botou ai ma, “Malas tumang do uhurhu janah tarapoh do ahu sanggah huidah sanina hun Japang pakon hun nagori na legan roh laho padearhon rumah pakon Balei Harajaon. Huarusi ma holong do Jahowa pakon hasomanta bangku. Janah pos do uhurhu itonggohon sanina-botou na i sab tanoh on do hanami.”

14. Sonaha do hita boi mangurupi na boritan pakon na matua?

14 Mangurupi na boritan pakon na matua. Holong do uhurta mangidah na boritan pakon na matua. Tongon mangarap do hita bani Harajaon ni Naibata laho manasap ganup sitaronon. Tapi paima roh ai, urupi hita ma na boritan pakon na matua. Sahalak pangarang mansaritahon pasal inangni na dob matua janah boritan Alzheimer. Bani sada panorang, kotor ma baju inangni ai janah lang boi inangni hu kamar mandi pakon  manggantih bajuni. Dob ai, roh ma dua saksi Jahowa na sadokah on domma somal marsahapi pakon sidea. Isungkun saksi ai ma bani inangni aha na porlu iurupi. Hassi pe maila do inangni ai, tapi ra do ia iurupi. Ibere saksi ai ma homa inangni minum janah marsahapi ma sidea. Martarima kasih banggal ma anakni ai janah nini ma, “Anggo saksi Jahowa idalankon sidea do domu bani aha na iajarhon.” Hunjon, ai ra do nasiam mangurupi halak na boritan pakon na matua domu bani na tarbahen nasiam?​Pil. 2:3, 4.

15. Sonaha do horja parambilanon boi mangurupi halak?

15 Mangurupi halak mananda Jahowa. Sada cara sidearan laho mangurupi halak ai ma mangajarhon pasal Naibata ampa harajaon-Ni. Anjaha ajarhon ma homa anggo mandalankon aturan ni Naibata ai do sidearan. (Jes. 48:17, 18) Horja parambilanon on boi pasangapkon Jahowa. Ai boi do nasiam ringgas marbarita?​—1 Tim. 2:3, 4.

GUNANI MARIDOP NI UHUR!

16. Aha do gunani anggo hita maridop ni uhur?

16 Bahat do gunani anggo hita maridop ni uhur. Sada dokter mangkatahon anggo hita maridop ni uhur bani na legan, lambin sehat ma hita anjaha dear do parhasomananta. Dob ai anggo iurupi hita halak na sunsah, hita pe lambin martuah janah lang be lungunan. (Ep. 4:31, 32) Anjaha panggora ni uhurta pe lambin dear halani mambotoh harosuh ni Naibata do na ihorjahon hita. Sobali ai anggo hita maridop ni uhur, gabe namatoras na dear ma hita janah lambin toguh ma parhajabuan. Somalni halak na paridop ni uhur dapotan idop ni uhur do homa humbani na legan.​—Basa Mateus 5:7; Lukas 6:38.

17. Mase hita sihol patuduhkon idop ni uhur?

17 Hassi pe parohkon hadearon do banta anggo hita maridop ni uhur, tapi na siporlunan on patuduhkon anggo hita sihol mangusihi ampa pasangapkon Naibata. Jahowa do na parlobei patuduhkon holong ampa idop ni uhur. (Pod. 14:31) Jadi usihi hita ma idop ni uhur ni Naibata. Anggo sonai ibahen hita, lambin orot ma parhasomananta pakon sanina-botou anjaha mardamei pakon na legan.​—Gal. 6:10; 1 Joh. 4:16.