Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  September 2017

“Totap ma Pangkar”

“Totap ma Pangkar”

“Tenger ma uhurmu, anjaha totap laho pasaudkon ai; ulang ma ho mabiar barang gobir! Ai Naibata Jahowa . . . do na mangkasomani ho”​—1 KRONIKA 28:20.

DODING: 60, 29

1, 2. (a) Tugas aha do na ibere bani si Salomo? (b) Mase porlu ipatoguh si Daud uhur ni si Salomo?

IPILIH Jahowa do si Salomo laho pajongjongkon rumah panumbahan i Jerusalem. Rumah ai ibahen “maningon banggal tumang do” janah jenges. Anjaha na siporlunan, igoran do holi rumah ai “Rumah ni Naibata Jahowa.”​—1 Kron. 22:1, 5, 9-11.

2 Tapi anggo si Salomo, “poso anjaha seng marpangalaman ope.” Halani ai, ai pangkar do si Salomo manjalo tugas ai? Ase boi marhasil maningon pangkar do ia. Anjaha porsaya do homa si Daud, bapani, sai urupan ni Jahowa do ia mangkorjahon tugas ai.

3. Aha do na boi iparlajari si Salomo humbani bapani?

3 Si Salomo boi do marlajar humbani bapani na pangkar. Sanggah poso ope bapani, pangkar do ia mamunuh binatang panoroh, laho manlinggomi biri-birini. (1 Sam. 17:34, 35) Dob ai, halani pangurupion ni  Naibata ongga do ia mamunuh si Goliat, halak na banggal tumang, pitah mamakei umbalang.​—1 Sam. 17:45, 49, 50.

4. Mase si Salomo maningon pangkar?

4 Halani ai ma iojur si Daud ase si Salomo ulang mabiar pajongjongkon rumah ni Naibata. (Basa 1 Kronika 28:20.) Anggo si Salomo mabiar, gabe galek ma ia anjaha lang ra be mangkorjahon tugasni ai.

Hita pe porlu do iurupi Jahowa ase pangkar mandalankon tugas na binere-Ni

5. Songon si Salomo, mase hita porlu pangkar?

5 Usih songon si Salomo, hita pe porlu do iurupi Jahowa ase pangkar mandalankon tugas na binere-Ni. Halani ai, iparlajari hita ma pasal juakjuak ni Naibata sapari na pangkar. Janah pingkirhon ma sonaha hita boi mangusihi sidea.

SIUSIHAN NA PANGKAR

6. Parlajaran aha do na boi idapot hita humbani si Josep na pangkar?

6 Ongga do parinangon ni si Potipar mangarahkon si Josep modom pakonsi. Tapi pangkar do si Josep manulak ai, hassi pe ibotohni boi do ia hona uhum halani ai.​—1 Mus. 39:10, 12.

7. Mase si Rahab boi pangkar? (Idah gambar bani alm. 27.)

7 Siusihan na legan ai ma si Rahab. Sanggah matamata ni halak Israel das i rumah ni si Rahab, pangkar do ia paponopkon sidea. (Jos. 2:4, 5, 9, 12-16) Mase? Halani domma ibotohni na laho bereon ni Jahowa do huta Jeriko ai bani halak Israel. Anjaha porsaya do ia Jahowa do Naibata na sintong. Jadi hassi pe isuruh raja Jeriko suruhanni laho mangindahi matamata ai, totap do lang ipatugah si Rahab pasal matamata ai. Halani pangkarni ai, gabe maluah ma ia pakon kaluargani.​—Jos. 6:22, 23.

8. Aha do na mangurupi susian ni Jesus boi pangkar?

8 Pangkar do homa susian ni Jesus. Halani mangidah habaranion ni Jesus, in do na mangurupi sidea ase boi pangkar. (Mat. 8:28-32; Joh. 2:13-17; 18:3-5) Umpamani totap do sidea marbarita hassi pe domma ilarang halak Sadukei.​—Lah. 5:17, 18, 27-29.

9. Domu bani 2 Timoteus 1:7, aha do na mangurupi hita ase pangkar?

9 Mase si Josep, si Rahab, Jesus, pakon susianni boi pangkar mandalankon harosuh ni Jahowa? Halani sidea marpangunsandeian bani Jahowa sedo bani dirini sandiri. Sonai homa hita, ase boi pangkar, ulang ma hita marpangunsandeian bani dirinta sandiri tapi bani Jahowa ma. (Basa 2 Timoteus 1:7.) Bani artikel on, iulas hita ma sonaha hita boi pangkar ibagas kaluarga ampa i kuria.

 PANGKAR IBAGAS KALUARGA

10. Mase na maposo maningon pangkar?

10 Halani hita manggoluh bani dunia ni Sibolis, maningon pangkar do na maposo mandalankon harosuh ni Naibata. Sidea boi marlajar humbani si Salomo na pangkar mambahen haputusan laho pajongjongkon rumah ni Naibata. Hassi pe na maposo boi iurupi namatorasni, tapi maningon sidea sandiri do na mambahen haputusan. (Pod. 27:11) Umpamani maningon ipingkirhon sidea do ise na laho ipilih gabe hasoman, aha do hiburan na sosok bani sidea, sonaha do sidea manjaga parlahouni ase totap dear, janah sadihari do sidea sihol ididi.

11, 12. (a) Sonaha do si Musa pataridahkon na pangkar do ia? (b) Parlajaran aha do na idapot na maposo humbani si Musa?

11 Na maposo maningon do manontuhon aha na laho ipindahi sidea ibagas hagoluhanni. Bani piga-piga nagori, bahat do na maposo iojur marsikolah na gijang ase boi mandapot horja na bahat gajini. Dong homa bani nagori na masombuh, iojur do na maposo ijai maningon gogoh marhorja ase boi mangurupi kaluargani. Anggo ai do na masa bani nasiam, dingat ma si Musa. Anak angkat boru ni si Parao do ia. Tontu boi do ia gabe bayak janah tarsar. Janah ra do kaluargani halak Masir, guru, atap na leganni mangojur ia ase mangindahi habayakon. Tapi pangkar do si Musa mamilih laho tading pakon bangsa ni Naibata. Dob laho ia hun Masir, totap do ia marpangunsandeian bani Jahowa. (Heb. 11:24-26) Halani ai, ipasu-pasu Jahowa ma ia anjaha banggalan do pasu-pasu na laho jaloonni bani ari magira.

12 Songon si Musa, anggo hanima marpangunsandeian bani Jahowa janah mamilih mangidangi Naibata ibagas goluhnima, ipasu-pasu Jahowa ma hanima. Janah pos ma uhurmu isarihon Jahowa do homa kaluargamu. Hanima pe boi mangusihi si Timoteus na mambere dirini laho mangidangi Jahowa. *Basa Pilippi 2:19-22.

Ai pangkar do nasiam ibagas hagoluhan on? (Idah paragrap 13-17)

13. Mase sada botou maningon pangkar laho mamilih aha na laho sipindahonni ibagas hagoluhanni?

13 Dong sada botou i Alabama, AS, na maningon pangkar manontuhon aha na laho ipindahi ibagas hagoluhanni. Ia mangkatahon, “Halak na parmela tumang do ahu. Mabiar tumang ahu marsahap bani hasoman i Balei Harajaon anjaha mabiar do homa ahu laho marbarita.” Tapi halani iurupi namatoras pakon sanina na i kuria, gabe marintis biasa ma ia. Ihatahonni do use, “Iojur dunia on do hita ase marsikolah na gijang, mangindahi horja na bahat gajini, janah sonaha ase bayak atap pe gabe halak na tarsar.” Tapi ibotohni do lang ganupan halak boi mandapot ai, janah  anggo dong pe na boi, totap do sidea lang martuah. Pangahapni, mangidangi Jahowa do na boi parohkon malas ni uhur.

14. Sonaha do namatoras boi mambere siusihan na dear anggo sidea pangkar?

14 Maningon pangkar do namatoras mambahen siusihan bani niombahni. Umpamani, ai tongtong do nasiam mambahen parlajaran Bibel kaluarga, marbarita, sonai age martumpu, hassi pe bos ni nasiam manuruh lembur bani panorang ai? Sipata i kuria, ra do adong namatoras na legan na manungkun mase iojur nasiam ase niombah mamilih cita-cita rohani marimbangkon marsikolah na gijang atap mangindahi horja na bahat gajini. Ai boi do nasiam lamlam anjaha pangkar patugahkon alasanni bani sidea?

15. Sonaha do Psalmen 37:25 pakon Heber 13:5 boi patoguhkon uhur ni namatoras?

15 Tapi, sipata dong do namatoras na lang mangojur niombahni ase mangidangi bani ianan na mamorluhon, mangidangi i Betel, atap pe dihut pajongjongkon Balei Harajaon ampa Balei Kebaktian. Mase? Halani mabiar anggo domma matua holi sidea, ise ma na mangurus sidea. Anggo sonai do pangahap ni nasiam, martenger ni uhur ma bani Jahowa anjaha pos ma uhurmu isarihon-Ni do nasiam.  (Basa Psalmen 37:25; Heber 13:5.) On boi mangojur niombahmu ase barani mambahen cita-cita laho mangidangi Jahowa.​—1 Sam. 1:27, 28; 2 Tim. 3:14, 15.

16. Sonaha do namatoras boi mangurupi niombahni ase mangidangi Jahowa anjaha aha do gunani ai bani niombah?

16 Adong sada bapa i Amerika Serikat na mangkatahon, “Sanggah lape boi mardalan atap pe marsahap niombahnami, domma iojur hanami ase ia marintis. Dobkonsi banggal, ai do na ipilihni anjaha in do na mangurupi ia ase ulang mangihutkon harosuh ni dunia on.” Sanina na legan na dong dua niombahni mangkatahon, “Bahat do namatoras i dunia on mangojur niombahni ase marsikolah na gijang, masuk hu tim olahraga, atap na leganni. Tarlobih ma hita maningon marpongkut ni uhur ma hita mangojur niombahta ase mamilih mangidangi Jahowa ibagas goluhni. On boi mangurupi sidea manjaga parlahouni totap dear. Anjaha namatoras pe marmalas ni uhur do mangidah niombahni mangidangi Jahowa ibagas hagoluhanni.” Pos ma uhur nasiam, anggo iurupi nasiam niombah mangkorjahon harosuh ni Naibata, ipasu-pasu Jahowa do nasiam.

PANGKAR IBAGAS KURIA

17. Sonaha do hita boi pangkar i kuria?

17 Hita na i kuria pe porlu do pangkar. Umpamani, maningon pangkar do sintua mambahen haputusan sanggah adong sanina-botou na mambahen dousa atap pe sanggah mangurupi sanina-botou na boritan i Rumah Sakit. Dong do homa piga-piga sintua maningon pangkar mambahen parlajaran Bibel i penjara atap pe sanggah mambobahon partumpuan. Botou na lape marhajabuan pe, boi do homa pangkar laho mangidangi gabe parintis biasa, mangidangi bani ianan na mamorluhon, dihut pajongjongkon Balei, dihut hu Sikolah bani Parbarita Harajaon, atap pe Sikolah Gilead.

18. Sonaha do botou na matua boi pataridahkon na pangkar do sidea?

18 Malas do uhurta mangidah botou namatua i kuria. Hassi pe sidea lang boi be marhorja songon haposoonni hinan, tapi boi do sidea totap pangkar. (Basa Titus 2:3-5.) Umpamani, ra do sintua manuruh botou namatua laho pasingatkon botou na maposo pasal parpakeianni. Sanggah na pasingatkon ai maningon lamlam ma sidea patugahkon sonaha do parpakeian na hormat. (1 Tim. 2:9, 10) Jadi anggo botou namatua ra mambere sipasingat ampa podah, on boi patoguhkon kuria.

19. (a) Sonaha do sanina na dob ididi boi pataridahkon na pangkar do sidea? (b) Bani sanina na dob ididi, sonaha do Pilippi 2:13 pakon 4:13 mangurupi nasiam ase pangkar?

19 Bani sanina na dob ididi pe maningon pangkar do. Umpamani, anggo nasiam ra mangidangi gabe siparugas  atap pe sintua, on boi parohkon hadearon i kuria. (1 Tim. 3:1) Tapi dong do piga-piga na mabiar manjalo tugas ai. Ra do halani hinan ongga ia mambahen hasalahan, gabe lang talup be pangahapni manjalo tugas ai. Atap pe na legan gobir halani lang pandei mangajari. Anggo sonai pangahapmu, iurupi Jahowa do nasiam ase boi pangkar. (Basa Pilippi 2:13; 4:13.) Dingat ma si Musa, ia pe ongga do mangahap seng boi mandalankon tugas na ibere Jahowa. (2 Mus. 3:11) Tapi halani pangurupion hun Bani, boi do ia pasaloseihon tugasni ai. Jadi sonai homa nasiam ase boi pangkar, martonggo ma bani Jahowa, basa ma Bibel bai ganup ari, anjaha rimangi siusihan hun Bibel na pangkar. Dob ai pindo ma pangurupion humbani sintua anjaha sirsir ma mangurupi horja i kuria. Hanami mangojur ganup sanina na ididi ase pangkar marhorja janah ringgas ma i kuria.

“JAHOWA . . . DO NA MANGKASOMANI HO”

20, 21. (a) Aha do na ihatahon si Daud bani anakni si Salomo? (b) Mase hita porsaya anggo hita boi mandalankon tugas hun Jahowa?

20 Ihatahon si Daud do bani anakni si Salomo, sai hasomanan ni Jahowa do ia laho pajongjongkon rumah panumbahan. (1 Kron. 28:20) Iparimbagaskon si Salomo do hata ai anjaha on do na mangurupisi ase manjalo tugas humbani Jahowa, hassi pe ia poso janah hurang pangalaman. Marhitei pangurupion ni Jahowa, salosei ma ipajongjong si Salomo rumah ai sadokah pitu satongah tahun.

21 Sonai homa do sonari on urupan ni Jahowa do hita mandalankon tugas ibagas kaluarga ampa kuria. (Jes. 41:10, 13) Anggo hita pangkar mandalankon tugas na ibere Jahowa, ipasu-pasu ma hita sonari ampa bani ari magira. Jadi totap ma tenger uhurta, anjaha horjahon ma tugas hun Bani.

^ par. 12 Torih ma podah na mangurupi hanima bani artikel “Gunakanlah Cita-Cita Rohani untuk Memuliakan Pencipta Saudara,” i Menara Pengawal 15 Juli 2004.