Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  September 2017

“Marhagogohon do Hata ni Naibata”

“Marhagogohon do Hata ni Naibata”

“Ai na manggoluh do hata ni Naibata anjaha marhagogohon.”​—HEBER 4:12.

DODING: 114, 113

1. Mase hita porsaya marhagogohon do Hata ni Naibata? (Idah gambar i atas.)

PORSAYA do juakjuak ni Jahowa “manggoluh do hata ni Naibata anjaha marhagogohon”. (Heb. 4:12) Domma iahapkon hita sonaha do Bibel boi mangurupi hita pakon halak na legan. Umpamani, sanggah lape marlajar Bibel, dong hinan do na panangko, hatagihan narkoba, anjaha mangkorjahon na butak. Dong homa halak na tarsar anjaha bayak tapi lang martuah sidea. (Par. 2:3-11) Tapi halani marlajar Bibel, boi ma sidea mandapot panogu-noguon anjaha marpangarapan. Bahat do pangalaman sisonai adong bani seri artikel “Alkitab Mengubah Kehidupan” i Menara Pengawal. Hassi pe domma gabe saksi Jahowa, tapi maningon do totap ipatoguh sidea haporsayaonni bani Naibata marhitei pangurupion ni Bibel.

2. Sonaha do Hata ni Naibata boi mangurupi halak Kristen bani abad na parlobei?

2 Halak na marlajar Bibel somalni mambahen hamubahon. On ma na masa bani abad na parlobei. (Basa 1 Korint 6:9-11.) Si Paulus mangkatahon,  “Sisonai do nasiam deba lobei.” Artini, dong piga-piga halak Kristen na iminaki, ongga do hinan marparlahou na sambor songon halak na so sitean harajaon ni Naibata. Tapi halani pangurupion Hata ni Naibata ampa tonduy na pansing, sidea boi mambahen hamubahon. Hassi pe domma gabe halak Kristen, dong ope na mambahen dousa janah ipabali hun kuria. Tapi dobkonsi ia mambahen hamubahon, ijalo ma use ia i kuria. (1 Kor. 5:1-5; 2 Kor. 2:5-8) Tontu malas do uhurta mangidah sanina-botou na boi mambahen hamubahon halani pangurupion Hata ni Naibata.

3. Aha na laho iulas hita bani artikel on?

3 Ronsi sonari pe marhagogohon do Bibel ai hubanta. Jadi dear ma igunahon hita ai. (2 Tim. 2: 15) Bani artikel on, ulas hita ma sonaha do hita boi manggunahon Bibel ibagas (1) hagoluhanta, (2) pangidangionta, ampa (3) sanggah marambilan i kuria. Artikel on mangurupi hita ase lambin mangkaholongi Naibata na mangajarhon na marguna hubanta.​—Jes. 48:17.

IBAGAS HAGOLUHANTA

4. (a) Aha na boi ibahen hita ase mandapot guna humbani Bibel? (b) Attigan do dearni panorang ni nasiam boi mambasa Bibel?

4 Ase mandapot guna humbani Bibel, tongtong ma basa hita Bibel bai ganup ari. (Jos. 1:8) Hassi pe bahat horjanta atap pe dong tanggung jawab na legan, tapi maningon bahen hita ma panorang laho mambasa Bibel. (Basa Epesus 5:15, 16.) Umpamani boi mambasa girah bani sogod ari, tongah ari atap pe borngin. Anggo sonai ibahen hita, sarupa ma pangahapta songon panurat ni Psalmen na mangkatahon, “Holong tumang do uhur hubani titah-Mu; manipat ari do hupingkiri ai.”​—Ps. 119:97.

Hassi pe bahat horjanta atap pe dong tanggung jawab, tapi maningon bahen hita ma panorang laho mambasa Bibel

5, 6. (a) Mase porlu irimangi hita isi ni Bibel? (b) Sonaha do carani manrimangi aha na ibasa hita hun Bibel? (c) Aha do gunani na iahapkon nasiam halani mambasa ampa manrimangi isi ni Bibel?

5 Tapi lang sungkup pitah mambasa Bibel. Porlu do homa ase manrimangi aha na dob ibasa hita. (Ps. 1:1-3) On boi mangurupi hita ase mandalankon podah ni Bibel ibagas hagoluhanta. Sonari hita boi mambasa Bibel na tarsetak atap pe bani alat elektronik. Tapi, totap do hita boi mandapot guna humbani mambasa Bibel.

6 Sanggah mambasa Bibel, sonaha do carani manrimangi ai? Ulang ma podas-podas mambasa janah sungkun ma dirimu sandiri: ‘Hunjon, aha do na boi huparlajari pasal Jahowa? Sonaha do ahu boi mandalankon podah on? Hamubahon aha ope na porlu hubahen?’ Anggo irimangi hita ganupan ai  janah martonggo, gabe rosuh ma hita mandalankon titah ni Naibata, anjaha iahapkon hita ma hagogohan ni Hata ni Naibata ibagas hagoluhanta.​—2 Kor. 10:4, 5.

IBAGAS PANGIDANGION

7. Sonaha do hita boi manggunahon Bibel sanggah mangidangi?

7 Sanggah mangidangi, porlu tumang do hita mambasahon ayat ni Bibel. Dong sada sanina mangkatahon, “Porini nasiam mangidangi rup pakon Jahowa, ise do sibahatan na marsahap, nasiam do atap Jahowa?” Anggo ibasahon hita ayat humbani Bibel, artini ipaturut hita do Jahowa na marsahap. Anggo ibasa hita sada ayat na topat, gogohan do ai marimbangkon aha na ihatahon hita. (1 Tes. 2:13) Jadi sanggah mangidangi, ai marusaha do nasiam mambasahon Bibel?

Anggo ibasahon hita ayat humbani Bibel, artini ipaturut hita do Jahowa na marsahap

8. Sanggah marbarita, mase lang sungkup pitah mambasahon ayat ni Bibel?

8 Tapi lang sungkup pitah mambasahon tumang. Porlu do homa iulas anjaha ipatorang hita ayat na dob ibasa. Mase? Halani songon abad na parlobei, buei ope halak sonari lang mintor mangarusi aha na ibasa sidea. (Rom 10:2) Jadi anggo ipatorang hita bani simada rumah pasal ayat na ibasa ai, gabe tarojur ma uhur ni sidea laho mandalankon podah ni Bibel atap pe boi gabe tarapoh sidea.​—Basa Lukas 24:32.

9. Sanggah marbarita, sonaha do hita boi mangurupi halak ase mangkargai isi ni Bibel? Patugah ma contohni.

9 Sanggah marbarita porlu ma ipingkirhon hita aha do haporsayaon ni sidea, anjaha pingkirhon ma homa sonaha boi mangurupi sidea ase mangkargai Bibel. Umpamani boi do ihatahon hita, “Aha do na ihatahon Sitompa pasal on?” Dob ai anggo hita pajumpah pakon halak na lang Kristen, boi ihatahon hita, “Aha do na ihatahon buku na pansing pasal on?” Atap bani halak lang porsaya bani ugama, hita boi mangkatahon, “Ongga do itangar ham hatorangan humbani buku na dob dokah isuratkon?” Jadi anggo sonai ibahen hita, lambin rosuh ma halak manangar barita humbani Bibel.​—1 Kor. 9:22, 23.

10. (a) Patugah ma pangalaman ni sada sanina na mambasa sada ayat sanggah ia marbarita? (b) Anggo pangalaman nasiam sonaha?

10 Buei do sanina na mangahapkon marhagogohon do Hata ni Naibata sanggah ia marbarita. Umpamani, dong sada sanina na domma somal mambere majallah Ambilan na Madear bani sada dalahi na matua. Sanggah ia laho mambere majallah na baru, tarpingkir ma ia laho mambasahon sada ayat humbani 2 Korint 1:3, 4, na mangkatahon “Bapa paridop ni uhur ampa  Naibata sipangapoh in . . . mangapoh hanami ibagas sagala sitarononnami.” Dobkonsi ibasa, ipindo dalahi ai ma use ase ibasa saninanta ma ayat ai sahali nari. Ihatahon dalahi ai ma sosok tumang ayat on hu bani halani pusok do uhurni. Halani ai gabe rosuh ma dalahi ai marlajar Bibel. Hunjon ibotoh hita ma margogoh do Hata ni Naibata mangurupi halak na legan.​—Lah. 19:20.

SANGGAH MARAMBILAN I KURIA

11. Aha do tanggung jawab ni sidea na mangajari i kuria?

11 Buei do sanina pakon botou na marosuh roh hu partumpuan ampa kebaktian. Halani, ijai do sidea manombah Jahowa anjaha mandapot pangajarion. Halani ai sidea na mambobahon i kuria maningon dear ma sanggah mangajari. (Jak. 3:1) Anjaha maningon humbani Bibel ma pangajarion na ipadas sidea. Jadi sonaha do sanina manggunahon Bibel sanggah mangajari i kuria?

12. Sonaha do parambilan boi manggunahon Bibel sanggah mangajari?

12 Porlu tumang do ase mambasa ayat sanggah marambilan i kuria. (Joh. 7:16) Jadi sanggah marambilan, ulang ma gabe pangalaman atap limbaga na ipatugah hita, na gabe idingat  halak marimbangkon ayat na ibasa hita. Janah, dingat ma mambasa Bibel lang sarupa pakon mangajari hun Bibel. Halani, anggo mabahattu pe ibasa hita ayat, lang idingat halak ganupan ai. Jadi pilih ma ayat na topat, parlajari ma sonaha do patorangkon ayat ai, janah pilih ma limbaga na sosok bani ayat ai. Dob ai patugah ma sonaha do ayat ai boi idalankon ibagas hagoluhan. (Neh. 8:8) Anggo adong rangkani, parlajari ma sonaha do ayat-ayatni markaitan hubani rangkani. Janah pilih ma ayat na boi patorangkon gagasan utama bani rangka ai. (Torih ma hatorangan bani buku Memperoleh Manfaat dari Pendidikan Sekolah Pelayanan Teokratis parlajaran 21 ronsi 23.) Na siporlunan, pindo ma pangurupion ni Jahowa ase nasiam boi mangajarhon aha na ibagas Bibel.​—Basa Esra 7:10; Podah 3:13, 14.

13. (a) Ayat na itangar hita bani ambilan i kuria marpangkorhon do ai hubanta. Patorang ma sada pangalaman? (b) Ongga do iahapkon nasiam sonaha ayat na ibasa i partumpuan boi mangurupi nasiam?

13 Adong pangalaman humbani sada botounta sanggah ia dakdanak, bahat tumang sitarononni, janah hassi pe domma mananda Jahowa, totap do ia lang porsaya anggo  Jahowa holong hu bani. Tapi adong ma sada ayat na itangarni bani ambilan i kuria. Gabe tarapoh tumang uhurni manangar ayat ai. Das i rumah, iparimbagaskon anjaha itangkasi ia ma ayat ai. Dapotsi ma use ayat-ayat na legan na sosok bani ayat ai. Halani ai gabe pos ma uhurni ihaholongi Jahowa do ia. * Ongga do iahapkon nasiam songon pangalaman ni botou ai?​—Neh. 8:12.

14. Sonaha do hita patuduhkon anggo hita mangkargai Bibel?

14 Tontu martarimakasih do hita bani Jahowa na dob mambere Bibel hubanta. Songon janji-Ni ai, totap do hata-Ni boi martahan. (1 Ptr. 1:24, 25) On ma mambahen hita tarojur mambasa Bibel ganup ari, mandalankon podah-Ni, anjaha manggunahon ai laho mangurupi na legan. Anggo sonai ibahen, taridah ma na holong do hita bani Jahowa anjaha ihargai hita do Bibel ai.

^ par. 13 Ida ma kotak “ Na Mambahen Ahu Boi Mubah.”