Langsung hu konten

Langsung hu menu sekunder

Langsung hu daftar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  September 2017

“Hata ni Naibata Totap do Boi Martahan”

“Hata ni Naibata Totap do Boi Martahan”

“Melus do poyon-poyon ai, marurus bungani, tapi anggo hata ni Naibatanta totap do ronsi sadokah ni dokahni.”​—JESAYA 40:8.

DODING: 116, 115

1, 2. (a) Sonaha do hagoluhanta anggo lang dong Bibel? (b) Mase ma halak ra manerjemahkon Bibel?

SONAHA do hagoluhanta anggo lang dong Bibel? Tontu kahou ma hita. Lang boi mambotoh hasintongan pasal Naibata ampa aha na laho masa bani ari magira. Anjaha hita pe lang boi mambotoh pambahenan ni Jahowa na sapari.

2 Tapi seng ipaturut Naibata sonai na masa. Ibere do banta Bibel ai ma hata-Ni. Anjaha marjanji do Ia anggo hata-Ni ai, totap do martahan. On do homa na ihatahon si Petrus na ibuat humbani Jesaya 40:8. Hassi pe ayat ai lang patugahkon pasal Bibel tapi sosok do ai bani isi ni Bibel. (Basa 1 Petrus 1:24, 25.) Bahat halak mambotoh marguna do mambasa Bibel ibagas sahap ni sidea. Halani ai ma, marratus tahun na salpu marusaha do halak manerjemahkon Bibel ase boi ibasa buei halak, hassi pe Bibel ilarang do ondi ai. Tapi sihol do  Jahowa ase ganup halak “maluah anjaha das mananda hasintongan in”.​—1 Tim. 2:3, 4.

3. Bani artikel on, aha na laho iulas hita? (Idah gambar bani alm. 15.)

3 Bani artikel on, ulas hita ma sonaha do hata ni Naibata boi totap martahan hassi pe (1) dong parubahan bai bahasa, (2) dong parubahan bai pamarentahan na mangubah bahasa na ipakei na mabuei, ampa (3) panerjemahan Bibel ilarang. Mase on porlu iulas hita? Ase hita lambin mangkargai Bibel pakon Naibata.​—Mi. 4:2; Rom 15:4.

PARUBAHAN NI BAHASA

4. (a) Sonaha do bahasa boi mubah? (b) Hunja do boi ibotoh hita anggo Naibata ai lang sididah bohi? Anjaha sonaha do pangahap ni nasiam?

4 Bahasa boi do mubah. Umpamani bahasa na ipakei sapari ra do lang iarusi be sonari. Idingat nasiam do ra contohni ai bani sahap ni nasiam. Sonai homa do bahasa Heber pakon Gorik. Hassi pe sonari buei do halak na boi marsahap Heber pakon Gorik, tapi lang be iarusi sidea bahasa Heber pakon Gorik na sapari na ipakei laho manuratkon Bibel na parlobei sahali. Halani ai ma porlu do ase Bibel iterjemahkon. Dong piga-piga halak marpangahap ase boi mangarusi isi ni Bibel maningon iparlajari sidea ma bahasa Heber pakon Gorik. Tapi lang bahat gunani ai. * Tapi sonari on malas do uhurta halani Bibel domma iterjemahkon hira-hira 3.200 bahasa. On patuduhkon anggo Jahowa sihol ase “haganup bangsa, marga, hata pakon suku” boi mangarusi Bibel. (Basa Pangungkabon 14:6.) Halani ai, sihol ma hita dohor bani Naibata na parholong ampa na so sididah bohi.​—Lah. 10:34.

Sonari on malas do uhurta halani Bibel domma iterjemahkon hira-hira 3.200 bahasa

5. Dobkonsi Bibel iterjemahkon bani sahap Simalungun, aha do pangkorhonni?

5 Halani parubahan bahasa, mangkorhon do ai bani terjemahan ni Bibel. Ra do sanggah mungkahni sada Bibel iterjemahkon, urah ope iarusi isini. Tapi lambin dokah lang sai iarusi be. Umpamani bani mungkahni abad 20, iterjemahkon ma Bibel bani sahap Simalungun. Mintor tarsar do Bibel ai bani halak Simalungun. Janah dong ma halak na mambuat hata-hata hun Bibel laho ipakei bani parsahapan siganup ari. * Tapi bani Padan na Baru i Bibel ai lang dong be isuratkon goran Jahowa.

6. Mase hita marmalas ni uhur halani adong Bibel Terjemahan Dunia Baru?

 6 Sanggah parlobei sahali Bibel bahasa Simalungun iterjemahkon, urah do ai iarusi. Tapi sonari on hata-hata na ibagas Bibel ai lang sai urah be iarusi. Sonai homa do na masa bani buei Bibel na dob dokah iterjemahkon. Tapi malas do uhurta halani domma adong Bibel Terjemahan Dunia Baru. Bibel on mamakei bahasa na urah iarusi na mambahen halak marosuh mambasa hata ni Naibata. (Ps. 119:97) Janah Bibel on domma adong bani lobih 150 bahasa. On patuduhkon buei halak i sab tanoh on domma boi mambasa Bibel bani bahasa ni sidea. Tapi na siporlunan, bani Bibel ai isuratkon do goran ni Naibata songon na bani mungkahni.

PARUBAHAN BAI PAMARENTAHAN

7, 8. (a) Mase bahat halak Jahudi bani abad patoluhon SM lang be mangarusi Bibel bani bahasa Heber? (b) Aha do Septuaginta Gorik ai?

7 Halani parubahan bai pamarentahan i tanoh on, mangkorhon do ai bani bahasa. Tapi Jahowa marosuh do ase hata-Ni boi iarusi buei halak. Umpamani halak Jahudi atap halak Israel do na manuratkon 39 buku na parlobei ibagas Bibel. Isuratkon ma ai ibagas bahasa Heber atap Aram. Halani ai ma ihatahon do sidea na parlobei “ondosan ni hata ni Naibata”. (Rom 3:1, 2) Tapi bani abad patoluhon SM, bahat halak Jahudi lang be mangarusi bahasa Heber. Mase? Halani bani panorang ai roh do si Aleksander Agung hun Gorik manaluhon buei nagori i tanoh on. On ma na mambahen pamarentahan ni Gorik pakon bahasani gabe tarsar i tanoh on, janah nagori na irajai pamarentahan Gorik gabe mamakei bahasa ai. (Dan. 8:5-7, 20, 21) Halak Jahudi pe gabe bahat do na mamakei bahasa Gorik anjaha lang be mangarusi Bibel na isuratkon bani sahap Heber. Jadi aha ma na porlu ibahen?

8 Hira-hira 250 tahun paima Jesus tubuh, bani parlobei sahali iterjemahkon ma lima buku na parlobei hun Bibel bani bahasa Gorik. Dob ai, iterjemahkon use buku na leganni ronsi salosei. Terjemahan on igoran ma Septuaginta Gorik.

9. (a) Sonaha do Septuaginta pakon terjemahan na legan mangurupi halak mangarusi Hata ni Naibata? (b) Ayat na ija do na idingat nasiam bani Padan na Basaia?

9 Halani dong Septuaginta, gabe boi ma iarusi halak Jahudi na marsahap Gorik ma isi ni Bibel na isurat ibagas bahasa Heber. Boi do ibayangkon nasiam sonaha malas ni uhur ni sidea boi mambasa Bibel bani sahap ni sandiri? Dob ai, iterjemahkon do homa piga-piga bagian hun Bibel bani sahap Siria, Gotik, pakon Latin. On mambahen buei halak boi mangarusi isi ni Bibel. Janah songon hita sonari on, sidea pe boi mardingat ayat-ayat na iharosuhkonni.  (Basa Psalmen 119:162-165.) Jadi totap do boi martahan Hata ni Naibata hassi pe dong parubahan bai bahasa pakon pamarentahan.

PANERJEMAHAN BIBEL ILARANG

10. Bani masa ni si John Wycliffe, mase bahat halak lang boi mangarusi isi ni Bibel?

10 Marratus-ratus tahun na salpu ilarang pamarentah do halak na mabuei mambasa Bibel. Tapi dong do halak na mabiar bani Naibata, anjaha marusaha ma sidea manerjemahkon Bibel. Umpamani si John Wycliffe na tading i Inggris bani abad 14, marosuh do ia ase ganup halak boi mambasa Bibel. Tapi, bani panorangni lape dong Bibel bani bahasa Inggris. Janah mahal tumang do Bibel halani isurat tangan do ai ijia. Jadi otik dassa na dong Bibelni. Sidea na hu gareja pitah boi manangar Bibel ibasahon ibagas bahasa Latin. Janah bahasa ai lang iarusi halak na mabuei. Jadi aha do na ibahen Naibata ase halak na mabuei boi mangarusi isi ni Bibel?​—Pod. 2:1-5.

Si John Wycliffe pakon halak na legan marosuh do ase ganup halak boi mangarusi isi ni Bibel. Ai sonai do homa nasiam? (Idah paragrap 11)

11. Aha do pangkorhon ni Bibel na iterjemahkon si Wycliffe?

11 Bani tahun 1382, si John Wycliffe pakon hasomanni manerjemahkon Bibel bani bahasa Inggris. Anjaha dong ma kalompok halak na marosuh mamakei Bibel ai janah igoran ma sidea kalompok Lollard. Misir ma sidea mardalan nahei hu huta-huta i sab Inggris laho mambasahon isi ni Bibel pakon mambagihon piga-piga buku hun Bibel na isurat tangan ni sidea. Halani ai do gabe tarsar ma use Bibel.

12. Aha do na ibahen pambobai ugama bani kalompok Lollard pakon si Wycliffe?

12 Tapi sogam ma uhur ni pambobai ugama bani si Wycliffe pakon kalompok Lollard. Iparburu sidea ma kalompok ai anjaha anggo dong jumpah sidea Bibel na iterjemahkon si Wycliffe, mintor itutung ma ai. Ihatahon sidea do anggo si Wycliffe,  munsuh ni gareja. Hassi pe domma matei si Wycliffe, ihurak ma kuburanni anjaha itutung ma holi-holini, dob ai iambungkon ma abuni hu bah Swift. Tapi pambobai ugama ai seng boi manlanglangi halak ase mambasa Bibel. Halani dob marratus tahun, adong do use halak hun Eropa pakon nagori na legan, na manerjemahkon ampa mansetak Bibel bani buei bahasa na iarusi halak.

“NA MANGAJARI HO ASE MARTUAH HO”

13. Mardingat panerjemahan ni Bibel, mase ai boi toguh haporsayaonta?

13 Tongon Hata ni Naibata do isi ni Bibel. Tapi sanggah Bibel ai iterjemahkon songon terjemahan Septuaginta, Bibel ni si Wycliffe’s, Bibel Batak Simalungun pakon na leganni, seng artini Naibata na mansahapkon terjemahanni bani sidea. Tapi humbani na dob iulas hita, ibotoh hita ma hata ni Naibata totap do boi martahan songon na ibagahkon-Ni. On patoguhkon haporsayaonta saud do ganup janji ni Jahowa.​—Jos. 23:14.

14. Aha do gunani anggo hita mambasa Bibel?

14 Domma ibotoh hita anggo Naibata manjaga hata-Ni ase totap boi martahan. Halani ai lambin holong anjaha toguh ma haporsayaonta hu Bani. * Tapi mase Jahowa mambere Bibel hubanta? Halani holong do Ia hubanta janah sihol mangajarhon na marguna banta. (Basa Jesaya 48:17, 18.) Anggo ibasa hita Bibel, lambin holong ma hita Bani janah sihol mandalankon titah-Ni.​—1 Joh. 4:19; 5:3.

15. Aha na laho iulas hita bani artikel na mangihut?

15 Jadi sonaha ma hita boi mandapot gunani sanggah mambasa Bibel? Sanggah hita mangidangi, sonaha do hita mangurupi na legan ase marosuh mambasa Bibel? Bani na mambobai i kuria, aha do na mangurupi sidea ase tongon-tongon mangajarhon ajaran ni Bibel? On ma na sihol iulas hita bani artikel na mangihut.

^ par. 4 Idah artikel “Perlukah Kita Belajar Bahasa Ibrani dan Yunani?” bani majallah Menara Pengawal 1 November 2009.

^ par. 5 Umpamani, “martuahan do na mambere ase na manjalo” ampa “Jahowa do siparmahan ahu”.​—Lah. 20:35; Ps. 23:1.

^ par. 14 Idah kotak “ Roh ma Nasiam!