Langsung hu konten

Langsung hu menu sekunder

Langsung hu daptar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  Oktober 2017

Panonggoran ni si Sakaria​—Parlajaranni Hubanta

Panonggoran ni si Sakaria​—Parlajaranni Hubanta

“Sai mulak ma hanima hu Bangku, ase marpangulaki uhur-Hu dompak hanima.”​—SAK. 1:3.

DODING: 120, 117

1-3. (a) Sadihari do halak Israel mulak hun habuangan Babel janah sonaha do pangahap ni sidea? (b) Mase sidea porlu ibere sipasingat humbani Jahowa?

ON MA na ididah si Sakaria bani panonggoran na ibere Jahowa. Adong ididahni gulungan na habang, dong sada naboru na hundul ibagas karanjang, pakon adong dua naboru na habang usih songon manuk-manuk na banggal. (Sak. 5:1, 7-9) Mase ibere Jahowa panonggoran on bani si Sakaria? Aha do na masa bani halak Israel bani panorang ai? Anjaha aha do parlajaranni hubanta?

2 Bani tahun 537 SM, malas tumang do uhur ni halak Israel halani domma ipaluah hun habuangan Babel dobkonsi 70 tahun sidea tading ijai! Mulak ma sidea hu Jerusalem laho pajongjongkon rumah panumbahan. Dobkonsi satahun, “domma itibalhon onjolan ni rumah ni Jahowa”. Halani ai, malas tumang ma uhur ni  sidea, “gogoh tumang do sora ni bangsa ai marolob-olob, pala tarbogei sora ai humbani na daoh”. (Esr. 3:10-13) Tapi bahat do na manlanglangi horja ai. Halani ai, gabe mandolei ma sidea. Gabe pajongjongkon rumahni bei ma sidea anjaha dong na marjuma. Ujungni, lang be itoruskon sidea horja ai hassi pe domma sapuluh omom tahun sidea mulak hun Babel. Halani ai ma sidea porlu do ibere sipasingat humbani Jahowa ase mulak hu Bani, anjaha lang pitah mamingkirhon haporluan ni sandiri. Janah sihol do Jahowa ase sidea manombah-Si ibagas malas ni uhur anjaha totap pangkar.

Ase iharosuhkon Jahowa panombahanta, maningon ibere do na sidearan hu Bani

3 Jadi bani tahun 520 SM, isuruh Jahowa ma si Sakaria laho pasingatkon halak Israel mase Jahowa paluahkon sidea hun huta Babel. Hassi pe lupa do halak Israel bani pambahenan ni Jahowa, tapi totap do idingat Jahowa sidea. Sosok do on songon arti ni goran ni Sakaria ai ma, “Jahowa do na Mardingat.” (Basa Sakaria 1:3, 4.) Marjanji do Jahowa laho mangurupi sidea pajongjongkon rumah panumbahan ai. Tapi ase iharosuhkon Jahowa panombahan ni sidea, maningon ibere sidea do na sidearan hu Bani. Sonari iulas hita ma sonaha Jahowa mangojur halak Israel marhitei panonggoran ni si Sakaria na paonomkon pakon na papituhon. Anjaha aha do parlajaranni hubanta.

PANGUHUMAN NI JAHOWA BANI PANANGKO

4. Aha do na ididah si Sakaria bani panonggoran na paonomkon? Mase bani gulungan ai isurat hun bagas pakon hun darat? (Idah gambar 1 bani alm. 15.)

4 Bani panonggoran na paonomkon na itorih si Sakaria, dong ma sada gulungan na habang. (Basa Sakaria 5:1, 2.) Dong do 9 meter ganjangni anjaha 4.5 meter bolagni. Anjaha tarbuha do gulungan ai. (Sak. 5:3, Terjemahan Dunia Baru, NW) Aha do isini? Ai ma barita sipasingat. Somalni halak manuratkon pitah hun bagas gulungan dassa. Tapi bani gulungan na habang on, isurat do hun bagas pakon hun darat. On patuduhkon ponting tumang do barita sipasingat ai.

Halak Kristen lang bulih manangko (Idah paragrap 5-7)

5, 6. Sonaha do pangahap ni Jahowa bani halak na manangko?

5 Basa Sakaria 5:3, 4Haganupan jolma, tarlobih homa bani juakjuak ni Naibata, maningon martanggung jawab do hu Bani. Halani hita igoran Saksi-Saksi Jahowa, anggo hita manangko, on boi pabutakkon goran ni Jahowa. (Pod. 30:8, 9) Tapi dong piga-piga halak na marpandapot, lang salah manangko anggo tarpaksa. Tapi aha pe alasanni, sahalak na manangko, patuduhkon anggo ia lang mangkaholongi Jahowa ampa titah-Ni. Dirini sandiri do na ipingkirhonni.

6 Anggo ibasa hita bani Sakaria 5:3, 4  ihatahon do hona papa ma “rumah ni panangko” janah “marianan ma [papa] ai i rumahni anjaha boiskononni ma”. Artini, ibotoh Jahowa do ise pe halak na manlanggar titah-Ni ibagas organisasi-Ni janah laho uhumon-Ni do sidea. Hassi pe sasada halak na manangko ra do lang tarbotoh bani polisi, bosni, sintua atap pe namatorasni, tapi seng boi ia paponopkon dousani humbani Jahowa. Janah patalaron ni Jahowa do ai. (Heb. 4:13) Tontu malas do uhurta boi marhasoman pakon halak na marparlahou na sintong “ibagas haganup”!​—Heb. 13:18.

7. Aha do na maningon ibahen hita ase ulang iuhum Jahowa?

7 Magigi do Jahowa bani halak na manangko anjaha uhumon-Ni do sidea. Malas do uhurta halani mambotoh prinsip-prinsip hun Bibel anjaha anggo idalankon hita ai, on boi pasangapkon goran ni Jahowa. Hita pe boi maluah humbani panguhuman-Ni.

BAI “GANUP ARI” PASAUD MA PADANMU

8-10. (a) Somalni mase sasahalak marbija? (b) Bija aha do na iosei raja Sedekia?

8 Bani gulungan ai pe dong sipasingat bani halak na marbija na lang tongon marhitei goran ni Naibata. (Sak. 5:4, NW) Somalni sasahalak marbija laho patuduhkon anggo hatani ai sintong. Janah dong do na marbija laho mangkorjahon atap lang mangkorjahon sada horja.

9 Maningon martanggung jawab do halak na marbija marhitei goran ni Jahowa. On ma na masa bani raja na  parpudi i Jerusalem, margoran si Sedekia. Marbija do ia marhitei goran ni Jahowa, laho mangondoskon dirini bani halak Babel. Tapi iosei ia do bijani ai. Halani ai nini Jahowa ma, “Tongon, bani ianan ni raja ai, na pabangkitkonsi gabe raja, na pabijahonsi, tapi iapasi, na mambere padan bani, tapi iosei, i tongah-tongah ni Babel do ia matei.”​—Hes. 17:16.

10 Jadi sihol do uhur ni Jahowa ase ipasaud si Sedekia ma bijani ai. (2 Kron. 36:13) Tapi lang sonai na ibahenni. Mangindo pangurupion do ia bani halak Masir. Tapi seng tarbahen halak Masir paluahkon sidea.​—Hes. 17:11-15, 17, 18.

11, 12. (a) Padan aha do na siporlunan na ibahen hita? (b) Sonaha do hita pasaudkon padanta ai?

11 Humbani si Sedekia, hita boi marlajar anggo Jahowa mambotoh padan na ibahen hita. Halani ai maningon ipasaud hita ma padanta ase malas uhur ni Jahowa hubanta. (Ps. 76:12) Hita domma marpadan laho mangondoskon diri bani Naibata. Artini, aha pe na masa hubanta, maningon idalankon hita do harosuh ni Jahowa. On do padan na siporlunan ibagas hagoluhanta.

12 Sonaha hita pasaudkon padanta bani Jahowa? “Ganup ari”, sai adong do na boi mambahen hita lang unduk bani Jahowa. On ma panorangni banta laho patuduhkon na holong do hita atap lang bani Jahowa. (Ps. 61:9) Umpamani, ra do i sikkolah atap i parhorjaan dong halak na mangarahkon nasiam ase marhallet pakonsi. Ai ra do nasiam manulak sidea? (Pod. 23:26) Atap ra do ibagas kaluarga, pitah nasiam do na sisombah Jahowa. Ai martonggo do nasiam bani Jahowa ase totap marparlahou na dear? Ai tongtong do nasiam martarima kasih bani Jahowa halani holong ampa panogu-noguan-Ni? Ai tiap ari do ibasa nasiam Bibel? Anggo sonai ibahen, taridah ma anggo nasiam pasaudkon padan ni nasiam bani Naibata. Anggo idalankon hita parentah-Ni janah mambahen na sidearan hu Bani, on patuduhkon anggo hita holong hu Bani anjaha Ia ma simada hita. Jadi anggo totap hita martenger ni uhur bani Naibata, pasu-pasuon-Ni ma hita.​—5 Mus. 10:12, 13.

Usih songon Jahowa, hita pe maningon do ipasaud hita padanta

13. Aha do na iparlajari hita humbani panonggoran ni si Sakaria na paonomkon?

13 Humbani panonggoran ni si Sakaria na paonomkon, iarusi hita ma, anggo hita mangkaholongi Jahowa, seng ra hita manangko atap pe mangosei padanta. Hassi pe bangsa Israel mambahen hasalahan, Jahowa totap do pasaudkon bagah-bagah-Ni anjaha lang ihalupahon Jahowa sidea. Ibotoh Jahowa do sonaha situasi ni sidea. Iinggoti bahat munsuh do sidea. Usih songon Jahowa, hita pe maningon do ipasaud hita padanta. Ia mangurupi hita marhitei pangarapan na  ipatugah Jahowa hubanta. Lang piga dokah nari, ripaskonon-Ni ma ganup parjahat i tanoh on. On ma na laho iulas hita bani panonggoran ni Sakaria na mangihut.

RIPASKONON NI JAHOWA MA PARJAHAT

14, 15. (a) Aha do na ididah si Sakaria bani panonggoranni na papituhon? (Idah gambar 2 bani alm. 15.) (b) Aha do artini panonggoran ai?

14 Dobkonsi ididah si Sakaria gulungan na habang ai, ihatahon malekat ma hu bani, “Kawahkon ma”. Ididah si Sakaria ma sada karanjang. (Basa Sakaria 5:5-8.) Tutup ni karanjang ai ibahen humbani simbora. Sanggah tutup ni karanjang ai tarbuha, ididahni ma adong “sada naboru hundul ibagas”. Ipatugah malekat ai ma hu bani, anggo naboru ai, ai ma “Hajahaton”. Rimangi ma sonaha pangahap ni si Sakaria sanggah mangidah naboru ai sihol kaluar hun karanjang ai! Tapi mintor itutupkon malekat ai ma karanjang ai. Aha do artini panonggoran on?

15 Sanggah malekat nongkan mintor manutup karanjang ai, on artini, lang ipaturut Naibata adong hajahaton ibagas organisasi-Ni. Porini pe dong na mambahen na sambor, mintor padaraton ni Jahowa do ai.​—1 Kor. 5:13.

Marjanji do Jahowa laho manjaga organisasi-Ni ase totap borsih (Idah paragrap 16-18)

16. (a) Aha na masa bani karanjang nongkan? (Idah gambar 3. alm. 15) (b) Huja do iboban naboru na marhabong ai karanjang nongkan?

16 Dob ai ididah si Sakaria ma adong dua naboru na habang usih songon manuk-manuk na banggal. (Basa Sakaria 5:9-11.) Lang sarupa naboru on pakon naboru na dong bani karanjang  ai. Iboban sidea ma karanjang na marisi “Hajahaton” ai. Huja? Hu “tanoh Sinear” i huta Babel. Mase ma hujai iboan sidea?

17, 18. (a) Mase huta Babel ihatahon ianan ni “Hajahaton”? (b) Aha do tanggung jawabta?

17 Bani masa ni si Sakaria, ibotoh halak Israel do anggo huta Babel, ai ma ianan ni “Hajahaton.” Sambor tumang do parlahou ni halak Babel janah manombah gana-gana. Jadi sanggah si Sakaria pakon halak Jahudi i habuangan Babel, marusaha do sidea ase ulang mangihutkon parlahou na dong ijai. Marhitei panonggoran on, pos ma uhurta sai tongtong do jagaon ni Jahowa ase organisasi-Ni totap borsih.

18 Panonggoran on pe mangartihon anggo halak Jahudi maningon do manjaga parlahouni ase totap borsih. Lang ipaturut Naibata dong parjahat ibagas bangsa-Ni. Sonari on ibagas organisasi ni Jahowa, iahapkon hita do holong ampa hadameion. Jadi ganup hita maningon martanggung jawab ma manjaga ase organisasi ni Jahowa totap borsih.

PARLAHOUNTA NA DEAR PASANGAPKON JAHOWA

19. Aha do artini panonggoran ni Sakaria hubanta sonari on?

19 Panonggoran ni si Sakaria na dob iulas hita, marisi sipasingat bani halak na mangkorjahon na sambor. Halani laho ripaskonon ni Jahowa do parjahat. Jadi maningon ihagigihon hita ma hajahaton. Sobali ai, ibotoh hita ma marhitei panonggoran on, anggo ihorjahon hita harosuh ni Jahowa, dapotan pasu-pasu ma hita anjaha maluah humbani panguhuman-Ni. Tongon lang sai urah marparlahou na dear i dunia na jahat on. Tapi pos ma uhurta sai urupan ni Jahowa do hita ase boi mandalankon harosuh-Ni! Mase hita boi porsaya anggo panombahan na sintong boi totap martahan? Halani hamarsikon banggal lambin dohor, mase hita boi porsaya sai linggoman ni Jahowa do organisasi-Ni? Hita sihol mangulas pasal on bani artikel na mangihut.