Langsung hu konten

Langsung hu daptar isi

 PANGALAMAN

Dapotan Pasu-pasu do Anggo Mangkorjahon Parentah ni Jahowa

Dapotan Pasu-pasu do Anggo Mangkorjahon Parentah ni Jahowa

Ahu pakon paramangonku, botouhu pakon parinangonni, ibere ma tugas hu bannami. Anjaha mintor ihatahon hanami ma, “Eak, ra do hanami!” Mase hanami mintor ra, anjaha aha do pasu-pasu na ijalo hanami? Tapi paima ai, husaritahon ma lobei pasal hagoluhanku.

AHU tubuh bani tahun 1923 i Hemsworth, kota Yorkshire, Inggris. Anjaha dong sada botouhu na margoran si Bob. Sanggah ahu marumur siah tahun, dapot bapa ma sada buku na mansaritahon sonaha do ugama na ladung pakahouhon jolma. Marosuh tumang do bapa bani buku on. Halani ia pe lang marosuh bani pambobai ugama na lang mangkorjahon aha na iajarhon ni sidea. Dob piga-piga tahun, roh ma si Bob Atkinson hu rumahnami. Iputarhon ma rokaman ambilan ni Sanina Rutherford. Hunjon ibotoh hanami ma, anggo ia sarupa do haporsayaonni pakon halak na mambere buku ondi hubani bapa. Iontangni ma hanami mangan hu rumahni. Ijai ibalosi ia do bahat sungkun-sungkunnami pasal Bibel. Ia pe mangontang hanami ase roh hu partumpuan. Anjaha roh ma hanami. Iananni lang pala daoh hun rumahnami. Hunjai ma mungkahni, hanami tongtong roh martumpu. Dob ai, ipungkah ma sada kuria i Hemsworth. Lang piga dokah, roh ma hamba zona (sonari igoran sintua kaliling) hu kurianami rap pakon piga-piga parintis na roh hun kuria na legan. Halani marsaor pakon sidea, gabe tarojur ma ahu laho mangusihi sidea.

Sanggah ai, kaluarganami mulai ma marbisnis. Tapi ihatahon bapa ma bani botouhu, “Anggo ho sihol marintis, maningon kaluar ma ho hun bisnista on.” Jadi sonai ma na ibahen botouhu. Marintis ma ia, sanggah marumur 21 tahun. Dobkonsi dua tahun, ahu pe marintis ma, sanggah marumur 16 tahun. Bani ari senin ronsi jumat, sahalak ahu do marbarita. Tapi bani ari sabtu pakon minggu, dong ma hasomanku. Ahu marbarita mamakei fonograf ampa kartu kesaksian. Kartu kesaksian ai ma, sada kartu na etek na marisi barita na pondok hun Bibel. Huahapkon do pasu-pasu ni Jahowa. Halani dong sada na huurupi marlajar Bibel, podas mambahen hamajuan. Anjaha bahat do kaluargani manjalo hasintongan. Dobkonsi satahun, iontang ma ahu gabe parintis istimewa pakon si Mary Henshall. Hanami itugaskon bani ianan na lape ongga manangar hasintongan i Cheshire.

 Bani Porang Dunia II, naboru-naboru pe isuruh do mangurupi parporangan. Tapi dong do aturan na mangkatahon anggo siparugas ugama, boi do lang dihut. Halani ahu parintis istimewa, huagan ma ahu pe boi do lang dihut mangurupi parporangan. Hape lang sonai. Jadi ipenjarahon ma ahu sadokah 31 ari. Sanggah ahu marumur 19 tahun, dua hali ma ahu hu pengadilan halani totap lang ra mangurupi parporangan. Tapi ujungni, ibahen ma haputusan anggo ahu boi do lang dihut mangurupi. Hunjon, huahapkon ma pangurupion ni Jahowa ampa tonduy na pansing na mambahen ahu ase totap martahan.​—Jes. 41:10, 13.

MARHAJABUAN

Bani tahun 1946, pajumpah ma ahu pakon si Arthur. Si Arthur domma tolu bulan i penjara halani lang ra dihut marporang. Dobkonsi ai, gabe parintis istimewa ma ia pakon saninani, si Dennis i Hemsworth. Sidea domma iajarhon bapani pasal hasintongan humbani na etek. Anjaha ididi do sidea sanggah poso ope. Lang piga dokah dobkonsi sidea rup marintis, itugaskon ma si Dennis hu Irlandia. Jadi lang dong be hasoman ni si Arthur marintis. Halani bujur do si Arthur, iarahkon bapa ma ia ase tading i rumahnami. Sanggah ahu mulak hu huta pajumpah ma hanami. Jadi marbuali ma hanami sanggah manusi piring dob salosei mangan borngin. Dobkonsi ai, markirim-kirim surat ma hanami. Tapi bani tahun 1948, ipenjarahon ma use si Arthur sadokah tolu bulan. Bani bulan Januari 1949, marhajabuan ma hanami. Marcita-cita do hanami ase boi tongtong marintis. Halani ai, pandei-pandei ma hanami mangatur parduiton. Bani ari porei, marombo ma hanami. Hassi pe sonai, halani pasu-pasu ni Jahowa, boi do hanami totap marintis.

Dobkonsi hanami marhajabuan bani tahun 1949 i Hemsworth

Hira-hira dob satahun, itugaskon ma use hanami hu Irlandia Utara. Parlobei hu Armagh, dob ai hu Newry. Halak na tading i kota ai, ai ma halak Katolik na unduk bani ugamani. Jadi maningon maruhur ma hanami sanggah mangidangi. Hanami martumpu i rumah ni sada sanina, daohni 16 kilometer. Pitah ualuh halak dassa hanami. Sipata dob salosei martumpu, lang boi hanami mulak. Jadi marborngin ijai ma hanami. Anjaha modom i semen do hanami. Tapi patarni, bahat do sipanganon na ipasirsir simada rumah bannami. Malas tumang do uhurnami halani sonari on domma bahat saksi Jahowa ijai.

“EAK, RA DO HANAMI!”

Botouhu pe pakon parinangonni, si Lottie, marintis istimewa do sidea i Irlandia Utara. Bani tahun 1952, laho ma hanami na ompat hu Belfast laho mandihuti kebaktian distrik. Marborngin ma hanami i rumah ni sada sanina na bujur. Hapeni ijai homa do marborngin hamba cabang hun Inggris ai ma si Pryce Hughes. Bani kebaktian ai ipatandahon ma sada buku baru na marjudul God’s Way Is Love (Holong do Dalan ni Naibata). Bornginni, marbuali ma hanami pasal buku ai. Ihatahon Sanina Hughes ma buku ai ibahen bani halak Katolik na i Republik Irlandia. Ijon bahat do na lang marosuh bani saksi Jahowa. Anjaha bahat do pambobai ugama mangkatahon na lang dear pasal  hita. Halani ai bahat ma saksi na pindah. Ihatahon si Pryce ma, “Hanami mandarami sidea na domma marjabu, anjaha boi mamboan motor ase mambagihon buku on i negara on.” * Mintor ihatahon hanami ma, “Eak, ra do hanami!”

Pakon parintis na legan i becak

Bahat do parintis na tading i rumah ni sada botou, si Ma Rutland. Ia domma dokah mangidangi Jahowa. Hanami pe sompat do tading ijai. Ijual hanami ma piga-piga barangnami. Dob ai, laho ma hanami naik becak ni si Bob laho mamboli motor. Ujungni, dapot hanami ma motor bokas. Isuruh hanami ma ase itaruhkon motor ai hu rumah, halani lang adong hanami na boi mamboan motor. Bani bornginni, mintor marlatih ma si Arthur i podoman sonaha mamboan motor. Patarni, sihol ipadarat si Arthur ma motor ai hun rumah. Tapi mintor roh ma si Mildred Willett (parinangon ni si John Barr). Jadi ia ma na mangajari hanami mamboan motor.

Motornami ampa garobakni

Patarni laho ma hanami hunjai. Itonahkon sanina-botou ma ase hanami ulang tading i garobak ni motor. Halani, gati do halak na lang marosuh bani saksi Jahowa, manutung garobak ni motorta. Ipindahi hanami ma rumah, tapi lang dong dapot. Ujungni borngin ai, modom i motor ma hanami na ompat. Patarni dapot hanami ma sada garobak ni motor na dong ibagasni dua podoman. Ai ma na gabe rumahnami. Sanggah itadingkon hanami garobak motor ai, i lobei ni rumah ni halak, lang dong na mangganggu. Jadi laho ma hanami daohni 16 ronsi 24 kilometer. Huja pe hanami laho, marbarita do hanami.

Jadi ganup rumah i Republik Irlandia i tenggara, irohi hanami do. Lang dong na manlanglangi hanami marbarita. Anjaha dong ma 20.000 buku na ibagihon hanami. Ibere hanami ma goran-goran ni halak na marosuh marlajar Bibel, hu kantor cabang Inggris. Malas tumang uhur halani sonari on domma adong marribu halak saksi Jahowa i Irlandia!

MULAK HU INGGRIS AMPA HU SKOTLANDIA

Dobkonsi piga-piga tahun itugaskon ma hanami hu London. Tapi baru ope piga-piga minggu hanami i London, mintor isuruh kantor cabang ma si Arthur mangidangi gabe sintua kaliling! Jadi pitah sada minggu dassa hanami ilatih bani horja on, janah laho ma hanami hu kebaktian i Skotlandia. Halani ai lang bahat be panorang ni si Arthur pasirsirhon ambilanni. Tapi totap do ijalo si Arthur ganup horja na ibere organisasi ni Jahowa, anjaha ahu pe gabe tarojur ma laho mangusihi ia. Hanami itugaskon hu sada ianan na lape ongga manangar hasintongan. Tapi sonari on domma bahat Saksi-Saksi Jahowa ijai. Sada pasu-pasu do on huahap.

Bani tahun 1962, iontang ma si Arthur hu sikolah Gilead. Pitah ia do na iontang, anjaha sapuluh bulan do dokahni sikolah ai. Huojur do ia ase ra mandihuti sikolah ai. Halani pitah ahu dassa ijon, itugaskon kantor cabang ma ahu hu Hemsworth gabe parintis istimewa. Dobkonsi satahun mulak ma si Arthur hun sikolah Gilead. Itugaskon ma ia gabe pengawas distrik. Jadi mangidangi ma hanami hu Skotlandia, Inggris utara, ampa hu Irlandia Utara.

 MANDAPOT TUGAS NA BARU I IRLANDIA

Bani tahun 1946, itugaskon ma si Arthur hu kantor cabang i Republik Irlandia, gabe hamba cabang. Mungkahni songon na bungbang do ahu halani domma sodap huahap marbarita. Tapi totap do ijalo hanami tugas ai. I Betel horjangku ai ma, mangkarduskon buku-buku, marmasak, ampa paborsih-borsihkon. Anggo hurimangi malas uhurhu halani boi mangidangi i Betel. Halani ai hanami mangojur nasiam ase manjalo tugas aha pe humbani organisasi. Sipata si Arthur itugaskon do gabe pangawas distrik. Halani ai hanami pe boi pajumpah pakon bahat sanina-botou, anjaha lambin orot ma parhasomanannami. Buei do homa parlajar Bibelnami na mambahen hamajuan. Ganupan ai halani pasu-pasu ni Jahowa do!

SADA MASA NA PONTING I IRLANDIA

Bani tahun 1965, on ma parlobei sahali ibahen kebaktian internasional i Dublin. * Hassi pe bahat do tantangan, tapi boi do ujungni dear kebaktian ai. Adong 3.948 halak na roh, anjaha 65 halak na ididi. Adong 3.500 sanina-botou na roh hun nagori na legan. Sidea marborngin i rumah ni halak na legan. Dobkonsi salosei kebaktian ai, ihatahon kantor cabang ma tarima kasih marhitei surat bani halak na manjalo sanina-botounta i rumahni. Simada rumah ai pe, mamuji parlahou ni sanina-botounta na dear. Gabe hasaksian na dear do on bani halak i Irlandia.

Si Arthur mangalo-alo sanina Nathan Knorr, kebaktian 1965

Si Arthur patandahon Buku Cerita Alkitab i Gaelic tahun 1983

Bani tahun 1966, kantor cabang na i Irlandia utara ampa i selatan ipasada ma hu kantor cabang na i Dublin. Gabe longang do hanami halani pangaturan on. Halani somalni halak i kota-kota ai, gati do maringori pasal ugama ampa politik. Tapi saksi Jahowa boi do marsada. Bahat do homa halak Katolik ampa Protestan ujungni gabe ra manjalo hasintongan.

TANTANGAN NA LEGAN

Bani tahun 2011, i pasada ma homa kantor cabang na i Irlandia pakon na i Inggris hu kantor cabang na i London. Hanami pe pindah do homa hujai. Tapi lang piga dokah, boritan Parkinson (naborit na dong i utok-utok) ma si Arthur. Marujung goluh ma ia bani 20 Mei 2015. Ijia domma 66 tahun hanami marhajabuan.

Halani pusok tumang do uhurhu, sompat do ahu stres ampa lungunan tumang. Sadokah on si Arthur do hasomanku huja-huja pe. Siholan tumang do ahu hu bani. Tapi mintor hupadohor ma diringku bani Jahowa. Anjaha buei homa do sanina-botou hun Irlandia, Inggris, pakon Amerika Serikat na manongos hata pangapohon hubangku. Abang ni si Arthur ai ma si Dennis pakon si Mavis parinangonni, ampa panogolanku si Ruth pakon si Judy, sidea pe manongos surat do homa hu bangku. Ai ma na boi mangurupi ahu ase totap toguh.

Marosuh tumang do ahu bani ayat i Jesaya 30:18 na mangkatahon, “Halani ai paima-imahon do Jahowa, sihol do marulak-ulakan uhur-Ni dompak nasiam; halani ai bingkat do Ia laho mangidopi nasiam. Ai Jahowa, ai ma Naibata ni uhum, martuah ma ganup halak na martenger ni uhur Bani.” Tarapoh do ahu halani mambotoh sihol do Jahowa paimahon panorangni laho pasaloseihon haganup parsoalanta janah mambere horja na dear hubanta i paradeiso.

Humbani pangalaman goluhku, boi ma huidah sonaha do Jahowa manogu-nogu ampa mamasu-masu horja parambilanon i Irlandia! Malas tumang do uhurhu boi dihut bani horja on. Tongtong do boi dapot hita pasu-pasu ni Jahowa anggo ihorjahon hita ganup parentah-Ni.

^ par. 12 Idah 1988 Yearbook of Jehovah’s Witnesses, alm. 101-102.

^ par. 22 Idah 1988 Yearbook, alm. 109-112.