Langsung hu konten

Langsung hu menu sekunder

Langsung hu daftar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  Oktober 2017

“Mangkaholongi . . . Marhitei Pambahenan ma ampa Hasintongan”

“Mangkaholongi . . . Marhitei Pambahenan ma ampa Hasintongan”

“Ulang ma hatanta pakon dilahta mangkaholongi, tapi marhitei pambahenan ma ampa hasintongan.”​—1 JOH. 3:18.

DODING: 72, 124

1. Aha do holong sibanggalan ai, janah sonaha do nasiam boi patorangkon ai? (Idah gambar i atas.)

JAHOWA do Harohan ni holong. (1 Joh. 4:7) Holong sibanggalan ai ma, holong na ipatuduh halani mangihutkon prinsip na sintong. Bani Bibel, ihatahon ma on a·gaʹpe ibagas bahasa Gorik. Holong on mangojur sasada halak laho mambahen na dear hubani na legan janah lang pitah mamingkirhon na porlu bani dirini sandiri. Anggo ipatuduh hita holong sisonai, gabe martuah ma hita.

2, 3. Sonaha do Jahowa patuduhkon holong-Ni hubanta?

2 Domma ipatuduh Jahowa holong sisonai bani manisia paima si Adam pakon si Hawa itompa. Umpamani, itompa Jahowa ma tanoh on jenges, janah ipasirsir ma aha na porlu bani manisia. Dob ai pe, ase itompa manisia. Lang pitah ai. Sihol do homa uhur ni Jahowa ase ganup manisia boi manggoluh sadokah ni dokahni i paradeiso.

3 Tapi mardousa do si Adam pakon si Hawa. Hassi pe sonai, pos do uhur ni Jahowa dong do holi humbani ginompar ni si Adam na mangkaholongi Ia. Halani ai  ma, marjanji do Jahowa laho mambere Anak-Ni bahen tobusan ase manisia boi maluah humbani dousa ampa hamatean. (1 Mus. 3:15; 1 Joh. 4:10) Sanggah manjanjihon ai, domma songon na saud tobusan ai ibere, hassi pe 4.000 tahun nari, baru pe ase saud ai. In ma holong-Ni na sibanggalan. (Joh. 3:16) Malas tumang do uhurta halani holong na ipatuduh Jahowa ai!

Patuduh ma holong hassi pe lang sai urah

4. Hunja do ibotoh hita anggo manisia na lang gokan dear boi patuduhkon holong?

4 Tapi manisia pe boi do patuduhkon holong sisonai hassi pe lang gokan dear sidea. Mase? Halani usih songon Jahowa do manisia itompa. Tongon lang urah mangkorjahon ai. Tapi bani Bibel, adong do halak na boi patuduhkon holong sisonai. Umpamani si Abel, halani holongni bani Jahowa, ibere do galangan na sidearan hu Bani. (1 Mus. 4:3, 4) Si Noak, tongtong do ia marbarita hassi pe lang dong na ra manangihonsi. (2 Ptr. 2:5) Anjaha si Abraham, halani banggal tumang do holongni bani Jahowa, ra do ia mambere si Isak, anakni bahen galangan bani Jahowa.​—Jak. 2:21

AHA DO HOLONG NA SO MARSIPAHULAH-HULAH?

5. Sonaha do hita patuduhkon holong na sasintongni?

5 Iparentahkon Bibel do hita ase “ulang ma hatanta pakon dilahta mangkaholongi, tapi marhitei pambahenan ma ampa hasintongan”. (1 Joh. 3:18) On sedo artini anggo hita lang boi mangkatahon holong do uhurta bani na legan. (1 Tes. 4:18) Tapi holongta ai maningon taridah ma humbani pambahenan. Umpamani, porini adong sanina-botounta na mamorluhon pangurupion, maningon iurupi hita ma sidea. (Jak. 2:15, 16) Sonai homa ma, anggo holong do uhurta bani Jahowa pakon halak na legan, lang sungkup pitah martonggo ase buei halak mananda hasintongan, tapi maningon ringgas ma hita bani horja parambilanon.​—Mat. 9:38.

6, 7. (a) Aha do holong na “marsipahulah-hulah”? (b) Patugah ma contoh na pataridahkon holong na marsipahulah-hulah.

6 Jadi aha do artini sanggah apostel Johannes mangkatahon ‘haholongi ma marhitei pambahenan ampa hasintongan’? Holongta ulang ma “marsipahulah-hulah”. (Rom 12:9; 2 Kor. 6:6) Sipata dong do halak na pataridahkon holong na marsipahulah-hulah. Ra do ia mangurupi halak tapi lang dear tujuanni. Sonai ma holong na marsipahulah-hulah.

7 Dong do piga-piga contoh na patuduhkon holong na marsipahulah-hulah. Umpamani Sibolis, aha na ihatahonni bani si Hawa sanggah i pohon Eden, songon na dear do ai, tapi sambor do tujuanni. (1 Mus. 3:4, 5) Dob ai, dong hasoman ni si Daud na margoran si Ahitopel. Tapi ujungni itahihon ia do si Daud. (2 Sam. 15:31) Sonai homa  ma sonari on, halak na murtad pakon halak na sihol mamosah kuria mamakei “sahap na lampot-lampot ampa na mantin-mantin”. (Rom 16:17, 18) Songon na holong do sidea bani na legan, tapi sasintongni laho mangindahi na porlu bani dirini sandiri do sidea.

8. Sungkun-sungkun aha do na porlu isungkun hita bani dirinta sandiri?

8 Sambor tumang do holong sisonai halani igunahon laho mangoto-otoi halak. Jolma do na boi ioto-otoi, tapi Jahowa lang boi. Jesus mangkatahon laho “agouhonon” ma halak na marsipahulah-hulah. (Mat. 24:51) Halani ai na gabe saksi Jahowa, ulang ma hita marparlahou sisonai. Jadi sungkun hita ma dirinta, ‘Ai tongon-tongon do holongku ai humbani borsih ni uhur, atap pitah mangindahi na porlu bani diringku sandiri do ahu?’ Sonari ulas hita ma siah cara sonaha do patuduhkon holong na so “sipahulah-hulah”.

SONAHA PATARIDAHKON HOLONG MARHITEI ‘PAMBAHENAN AMPA HASINTONGAN’

9. Anggo humbani borsih ni uhur do holongta, aha do na ibahen hita?

9 Marmalas ni uhur mangurupi hassi pe lang dong na mangidah. Anggo hita mangkaholongi sanina-botou pakon na legan humbani borsih ni uhurta, tontu ra ma hita mangurupi sidea hassi pe lang dong na mangidah. (Basa Mateus 6:1-4.) Ulang ma songon si Ananias pakon parinangonni, na mambere tumpak ase ididah buei halak, tapi sasintongni marladung do sidea pasal tumpak ai. Ujungni, iuhum Naibata ma sidea halani domma marsipahulah-hulah. (Lah. 5:1-10) Tapi sonari on bahat do sanina-botou na mangurupi Pangurus Pusat laho pasirsirhon sipanganon partonduyon. Hassi pe sonai, seng ra sidea patugah-tugahkon aha na dob ihorjahon sidea. Gabe siusihan do on hubanta.

Marmalas ni uhur mangurupi hassi pe lang dong na mangidah

10. Sonaha do hita pasangapkon halak na legan?

10 Pasangapkon halak na legan. (Basa Rom 12:10.) Ipasangap Jesus do susianni marhitei mamurihi nahei ni sidea. (Joh. 13:3-5, 12-15) Tapi lang sai iarusi susianni ai arti ni pambahenan ni Jesus, ronsi sidea manjalo tonduy na pansing. (Joh. 13:7) Halani ai, hita pe maningon marusaha do pataridahkon toruh ni uhur sanggah mangidangi halak na legan. Anggo ipasangap hita na legan, lang iagan hita dirinta do na lobihan humbani sidea halani gijang ni sikolah, habayakon, atap pe horjanta. (Rom 12:3) Sanggah dong halak na ipuji, dihut do hita marmalas ni uhur.

11. Sonaha ma hita namin sanggah mamuji halak?

11 Mambere pujian humbani borsih ni uhur. Marusaha ma mamuji  halak na legan, halani pujian ai boi do “pauli-ulihon” hita. (Ep. 4:29) Tapi sanggah na mamuji ai, maningon humbani borsih ni uhur ma na ihatahon hita. Ulang ma ipuji hita sidea i lobeini, tapi ihata-hatai i pudini. Janah sanggah dong na mamorluhon podah, ulang ma hita malang pasingatkon sidea. (Pod. 29:5) Usihi hita ma si Paulus, na ra mamuji halak Kristen i Korint halani horja ni sidea. (1 Kor. 11:2) Tapi lang homa malang ia mambere sipasingat na dear bani halak ai sanggah ihaporluhon.​—1 Kor. 11:20-22.

Hita patuduhkon holong marhitei mangurupi sanina-botounta na mamorluhon (Idah paragrap 12)

12. Sonaha do hita patuduhkon anggo hita manjalo tamu humbani borsih ni uhur?

12 Rosuh manjalo tamu. Iparentahkon Jahowa do hita ase mardear layak bani sanina-botou. (Basa 1 Johannes 3:17.) Tapi humbani borsih ni uhur ma hita mangkorjahon ai. Sungkun hita ma dirinta, ‘Ai pitah hasomanku atap halak na marugas i kuria dassa na huontang? Ai halani mangarap balasan do ahu ase huontang sanina-botou hu rumahku? Atap bani ganup sanina botou do huontang hassi pe lang pala sai hutanda sidea?’ (Luk. 14:12-14) Pingkirhon ma on: Ai ra do ahu mangurupi sanina-botou na mamorluhon, hassi pe halani ia sandiri do na lepak mambahen haputusan? Atap ai ra do ahu mangontang halak na lang ongga martarima kasih hubangku? Iparentahkon Jahowa do ase, “Marsitamueian ma nasiam, ulang ibagas ungut-ungut.” (1 Ptr. 4:9) Anggo idalankon hita parentah ai, gabe malas ma uhurta.​—Lah. 20:35.

13. (a) Mase hita porlu sabar sanggah mangurupi na galek? (b) Sonaha do hita boi mangurupi na galek?

13 Mangurupi sidea na galek. Iparentahkon Bibel do hita ase ‘manganju na galek, sabar dompak haganup’. On ma panorangni banta boi pataridahkon holong. (1 Tes. 5:14) Bahat do sanina-botou na mungkahni galek, tapi ujungni gabe toguh ma haporsayaonni. Tapi bani na legan, lang sai urah bani sidea ase patoguhkon haporsayaonni. Halani ai, maningon sabar ma tongtong hita. Sonaha do hita boi mangurupi sidea? Hita boi mangojur sidea marhitei podah hun Bibel, mangarahkon sidea rap marbarita, atap pe ra manangar sarita ni sidea. Anjaha ulang ma iagan hita pitah sanina-botou dassa na dong hagalekonni. Tapi ganupan hita dong bei do hahuranganta janah sipata boi do galek.  Si Paulus pe mangakui adong do hahuranganni. (2 Kor. 12:9, 10) Halani ai ma, ganupan hita mamorluhon ojuran ampa pangurupion.

14. Aha do na porlu bahenonta ase boi mardamei pakon sanina-botou?

14 Mardamei. Ponting tumang do hadameion ai. Hassi pe adong halak na mambahen borit uhurta, totap ma hita marusaha ase mardamei pakon sidea. (Basa Rom 12:17, 18.) Atap anggo hita do na mambahen borit uhur ni halak na legan, maningon toruh maruhur ma hita mangaku salah bani sidea. Rahanan do hita mangkatahon, “Mangaku salah ma ahu halani domma lepak parsahapku”, marimbangkon pitah mangkatahon, “Salah ma ahu”. Sonai homa ma, ibagas kaluarga pe porlu do mardamei. Sipata adong do paramangon pakon parinangon, anggo i lobei halak dear do sidea marsahap. Tapi i pudini, seng marsisahapan sidea janah martinggili. Salah do parlahou sisonai.

15. Sonaha do hita patuduhkon anggo hita ra manalpuhon hasalahan ni halak na legan?

15 Manalpuhon hasalahan. Anggo dong na mambahen borit uhurta, maningon ra ma hita manalpuhon ai humbagas uhurta, hassi pe sidea lang mangaku salah hubanta. Ase hita boi manalpuhon ai maningon ‘marsianjuan ma hita ibagas uhur na holong! Haporluhon hita ma manramotkon hasadaon ni tonduy marhitei panrahut ni damei’. (Ep. 4:2, 3) Dob ai, maningon ilupahon hita ma pambahenan ni sidea na lepak ai. Dingat ma holong ai, “seng ipadingat-dingat na jahat”. (1 Kor. 13:4, 5) Anjaha anggo ra hita manonggohon halak na mambahen borit uhurta, on patuduhkon anggo hita manalpuhon  hasalahan ni sidea humbani borsih ni uhur. (Luk. 6:27, 28) Tapi anggo mardomdom do hita, on boi pasedahon parhasomananta bani sanina-botou pakon Jahowa.​—Mat. 6:14, 15.

16. Sonaha hita boi patuduhkon holong sanggah manjalo tugas ibagas organisasi ni Jahowa?

16 Mamingkirhon haporluan ni halak na legan. Sanggah hita manjalo tugas ibagas organisasi ni Jahowa, hita boi patuduhkon holong marhitei lang “marsisarihon na bani dirini bei, tapi na bani hasoman ma”. (1 Kor. 10:24) Umpamani, siparugas i kebaktian domma boi masuk hubagas ianan kebaktian sanggah lape das panorangni labah ibuha. Sasintongni adong do panorang bani sidea laho mamilih hundulan na dear hu bani pakon kaluargani. Tapi bahatan do sidea seng ra mambahen sisonai. On patuduhkon anggo sidea lang mangindahi na porlu bani dirini sandiri. Sonaha do nasiam boi mangusihi sidea?

17. Sonaha do halak na mangkorjahon dousa boi patuduhkon holong?

17 Mangakui dousa. Dong piga-piga halak Kristen na paponopkon dousani halani maila, atap pe gobir mambahen borit uhur ni halak na legan. (Pod. 28:13) Tapi sasintongni lang parholong hita anggo lang mangakui dousanta. Halani on boi parohkon hasedaon banta pakon halak na legan. Umpamani, seng be marhorja tonduy na pansing anjaha seng dong be hadameion ibagas kuria. (Ep. 4:30) Jadi anggo hita ra mangakui dousanta bani sintua ase mandapot pangurupion, on patuduhkon halak na parholong do hita.​—Jak. 5:14, 15.

18. Mase ponting patuduhkon holong?

18 Holong do sibanggalan humbani ganup biak na ipatuduh halak Kristen. (1 Kor. 13:13) Anggo hita patuduhkon holong, ai ma tandani hita susian ni Jesus, anjaha boi ididah halak ise do sasintongni na mangusihi Jahowa, Harohan ni holong. (Ep. 5:1, 2) Ihatahon si Paulus, anggo lang dong holongta, halak na lang marguna do hita. (1 Kor. 13:2) Halani ai sai andohar ma hita patuduhkon holong, lang pitah humbani “hatanta” tapi humbani “pambahenan ma ampa hasintongan”.