Langsung hu konten

Langsung hu menu sekunder

Langsung hu daftar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  Oktober 2017

Habujuron na Ipataridah Halak Kristen

Habujuron na Ipataridah Halak Kristen

BANI sada huta i Gujarat, India, dong sada dalahi na idilo bapa ni si John. Ia domma ididi gabe Saksi-Saksi Jahowa bani ujung ni tahun 1950-an. Tapi parinangonni pakon onom niombahni margareja i Katolik. Sogam tumang do uhur ni sidea bani Saksi-Saksi Jahowa.

Bani sada ari isuruh bapani ma si John manaruhkon suratni hu bani sanina na sakuria. Tapi bani sogodni ai sanggah si John mambuha sada tong, tarsayat ma jari tanganni. Mintor ibuat si John ma sigundal laho mambaluti jarini na luha ai. Dob ai mintor laho ma ia manaruhkon surat ni bapani ai.

Dobkonsi si John das i rumahni, hape lang dong ia i rumah pitah parinangonni do na i rumah. Janah Saksi Jahowa do homa parinangonni ai. Sanggah ibere si John surat ai hu bani, ididah inang ai ma luha ni si John. Mintor ipaborsih, itambari, janah ibaluti inang ai ma luhani ai. Ibere ma homa tes bani si John janah marsahapi ma sidea. Ipatorang inang ai ma bani si John pasal Bibel.

Halani bujur ni inang ai, gabe lang masogam be si John mangidah saksi Jahowa. Dob ai isungkun si John ma mase ajaran ni saksi Jahowa legan pakon Katolik. Umpamani mase Jesus ai lang Naibata, anjaha mase lang bani si Maria hita martonggo. Jadi ibalosi inang ai ma sungkun-sungkunni ibagas bahasa Gujarati. Janah ibere inang ai ma buku “This Good News of the Kingdom” (Ambilan na Madear pasal Harajaon).

Jadi ibasa si John ma buku ai, porsaya ma si John on do hasintongan. Ijumpahi si John ma pastorni laho manungkun pasal aha na dob isungkunni bani inang ai. Tapi mintor manggila tumang ma pastor ai janah igijigkon ma Bibel hu bani si John. Anjaha nini pastor ai ma, “Ija ayatni na mangkatahon anggo Jesus ai lang Naibata? Anggo hita lang boi manombah si Maria? Patuduh ma!” Tarsonggot tumang ma si John. Nini si John ma anggo ia lang ra be roh hu gareja.

Ujungni marlajar Bibel ma si John pakon saksi Jahowa anjaha ididi ma ia. Saninani na legan pe dihut ma gabe saksi Jahowa. Hassi pe domma 60 tahun na salpu na masa ai, tapi anggo itonggor si John bokas luha ai tardingat ma ia pasal habujuron ni inang ai ondi, na mambahen ia gabe ra mangidangi Jahowa.​—2 Kor. 6:4, 6.