Langsung hu konten

Langsung hu menu sekunder

Langsung hu daftar isi

Saksi-Saksi Jahowa

Batak (Simalungun)

Ambilan na Madear—Edisi Parlajaran  |  November 2017

Tulak ma Hapentaran ni Dunia On

Tulak ma Hapentaran ni Dunia On

‘Jaga ma nasiam, ase ulang adong halak na mangagou nasiam marhitei hapentaron dunia ampa tipuan ni dunia on.’​—KOL. 2:8.

DODING: 38, 31

1. Aha do na isuratkon apostel Paulus hubani halak Kristen i Kolosse? (Tonggor ma gambar bani alm. 21.)

SANGGAH ipenjarahon apostel Paulus i Rom bani tahun 60-61 M, ia manurat bani halak Kristen i Kolosse. Ia patorangkon maningon dong bani sidea “pangarusion partonduyon” ase boi mangihutkon pingkiran ni Jahowa. (Kol. 1:9) Ia manurat, “Huhatahon pe in, ase ulang adong na mangoto-otoi nasiam marhitei pandei ni parsahap. Jaga ma nasiam, ase ulang adong halak na mangagou nasiam marhitei hapentaron dunia ampa sipaoto-oto na lumei, na maronjolan bani tonah-tonah ni jolma, bani kuasa ni unsur-unsur dunia on, seng bani Kristus.” (Kol. 2:4, 8) Dob ai, ipatugah ia ma piga-piga pandapot na salah na iharosuhkon buei halak. Umpamani, pandapot ai mambahen ase taridah pentaran sidea humbani na legan. Jadi marhitei surat ai, apostel Paulus sihol mangurupi sanina-botou ase manulak pingkiran sisonai.​—Kol. 2:16, 17, 23.

2. Mase porlu iulas hita contoh-contoh hapentaran ni dunia on?

2 Halak na mangihutkon hapentaran ni dunia on, manulak  panogu-noguan ni Jahowa. Anggo lang jaga hita, hapentaran ni dunia on boi mambahen galek haporsayaonta. Pingkiran sisonai boi masuk hubagas pingkiranta sanggah i parhorjaan, i parsikolahan atap marhitei na ididah hita humbani TV atap i Internet. Sonaha hita manimbili pingkiran sisonai? Bani artikel on, iulas hita ma lima contoh hapentaran ni dunia on, janah sonaha hita manulak ai?

AI PORLU DO HITA PORSAYA BANI NAIBATA?

3. Aha do na ihaporsayai bahat halak? Mase?

3 “Hassi pe lang porsaya bani Naibata, ahu boi gabe halak na bujur.” Bani buei nagori, bahat do halak marpingkir sonai. Sidea na mangkatahon ai, lang parduli dong do Naibata atap lang. Na siporlunan bani sidea ai ma bebas mangkorjahon harosuhni. (Basa Psalmen 14:1.) Na legan mangahap pentar do dirini sanggah mangkatahon, “Hubotoh do mangkorjahon na dear age lang porsaya bani Naibata.”

4. Aha do na boi ihatahon hita bani halak na lang porsaya adong do Panompa?

4 Ai masuk akal do anggo hita marpingkir lang adong Panompa? Piga-piga halak na mangindahi balosni humbani ilmu pengetahuan gabe bungbang. Hape urah do manorihi balosni. Pingkirhon ma, ai boi do adong rumah anggo lang dong na pajongjongkonsi? Tontu lang boi. Janah anggo maseda, maningon adong do na padearhon. Sonaha bani manisia? Bayangkon ma angkulanta. Porini luha tanganmu, boi ai malum sandiri. Dearan do angkulanta humbani rumah. Gari rumah pe maningon adong na pajongjongkon, tarlobih ma manisia. Jadi ise na manompa manisia? Bibel mangkatahon, “Ganup rumah, adong do na paulihonsi, tapi Naibata do na mangadongkon haganup.”​—Heb. 3:4.

5. Anggo dong na mangkatahon hita boi gabe halak na bujur hassi pe lang porsaya bani Naibata, sonaha hita mambalosi ai?

5 Anggo dong na mangkatahon hita boi gabe halak na bujur hassi pe lang porsaya bani Naibata, sonaha hita mambalosi ai? Memang, Bibel mangkatahon dong biak na madear bani halak na lang mananda Naibata. (Rom 2:14, 15) Umpamani, hormat janah holong do sidea bani namatorasni. Tapi anggo lang mangihutkon titah ni Jahowa, ra do lepak haputusan ni sidea. (Jes. 33:22) Janah bahat halak na pentar porsaya porlu hita iurupi Naibata laho mangatasi parsoalan ni dunia on. (Basa Jeremia 10:23.) Jadi, ulang ma hita marpingkir anggo hita boi mangkorjahon na madear hassi pe lang porsaya bani Naibata. Maningon do hita mangihutkon titah-Ni.​—Ps. 146:3.

AI PORLU DO HITA MARUGAMA?

6. Aha do pandapot ni buei halak pasal ugama?

6 “Hita boi martuah age lang marugama.” Buei halak mangkatahon lang dong artini na marugama ai. Sobali ai, bahat ugama mangajarhon pasal apuy naraka, mangindo guguan, atap dihut bani politik. Jadi, bahat halak mangahap martuahan do sidea anggo lang marugama. Nini sidea, “Porsaya do ahu bani Naibata, tapi lang marosuh ahu gabe anggota ni sada ugama.”

7. Mase ugama na sintong boi mambahen hita martuah?

 7 Tongon do hita boi martuah anggo lang marugama? Tontu boi do halak martuah anggo lang mangihutkon ugama palsu. Tapi lang adong na tongon-tongon mambahen hita martuah sobali marhasoman pakon Jahowa, “Naibata na martuah in”. (1 Tim. 1:11) Ia sihol mangurupi ganup halak. Juakjuak-Ni pe boi martuah halani mangurupi na legan. (Lah. 20:35) Pingkirhon ma sonaha ugama na sintong boi mangurupi kaluarga ase martuah. Iajari do hita ase hormat janah setia bani pasangan goluhta, pagodangkon niombah, patuduhkon holong ibagas kaluarga. Ugama na sintong pe mangajari juakjuak ni Jahowa ase marsiurupan janah marsihaholongan ibagas kuria.​—Basa Jesaya 65:13, 14.

8. Aha do sasintongni na mambahen hita martuah?

8 Ai boi do sasahalak martuah anggo lang mangidangi Naibata? Sasintongni, aha do na mambahen hita martuah? Piga-piga halak malas uhurni halani horjani, olahraga, atap mangkorjahon harosuhni. Na legan, megah pangahapni halani boi mansarihon kaluargani. Tapi dong do na siporlunan humbani ai. Manisia lang songon binatang halani boi mananda ise Panompa janah manombah-Si. Ai do na mambahen hita martuah. (Basa Lukas 11:28.) Umpamani sanggah martumpu rap pakon sanina-botou, malas ma uhurta. (Ps. 133:1) Megah do hita halani gabe sada kaluarga pakon hasoman sahaporsayaon i sab tanoh on. Janah ibotoh hita mangkorjahon na madear. Leganni ai, dong homa pangarapan bani ari simagira.

AI PORLU DO MANGIHUTKON ATURAN NI JAHOWA?

9. (a) Anggo rap modom age lape marhajabuan, naha pandapot ni halak? (b) Mase ilarang Naibata hita mangkorjahon sisonai?

9 “Ai mahua gakni rap modom age lape marhajabuan?” Dong homa na mangkatahon, “Mase mapintortu ho? Marsonang-sonang ma.” Tapi Bibel mangkatahon maningon daoh do hita humbani parriah-riahon. * (Basa 1 Tessalonika 4:3-8.) Halani Jahowa na manompa hita, Ia do na talup mambere aturan. Ia mangkatahon pitah bani parinangonni dassa dalahi boi rap modom, sonai homa bani naboru. Ibere Jahowa aturan sisonai halani mangkaholongi hita. Janah Ia mambotoh anggo idalankon hita aturan ai, martuah ma kaluarganta. Tapi iuhum Jahowa do sidea na lang manangihon hata-Ni.​—Heb. 13:4.

10. Sonaha halak Kristen padaohkon diri humbani parriah-riahon?

10 Bibel mangajarhon ase hita daoh humbani parriah-riahon. Nini Jesus, “Barang ise na mangidah naboru anjaha oji ia, domma marbangkis ia ibagas uhurni. Anggo sangsi ho halani mata siamunmu, pulsitkon ma in anjaha ambukkon.” Jadi maningon ijaga hita ma pangidahta. (Mat. 5:28, 29) Halani ai, simbili ma gambar atap video porno janah ulang bogei doding na sambor. Apostel Paulus mangkatahon  maningon ibunuh do hisap-hisap ni daging songon parriah-riahon. (Kol. 3:5) Porlu do homa ijaga hita pingkiran ampa parsahapta.​—Ep. 5:3-5.

AI PORLU DO IPARAYAK HITA HORJA NA BETENG?

11. Aha do na mambahen hita mangindahi horja na beteng?

11 “Anggo beteng horjanta, martuah ma hita.” Iojur bahat halak do hita ase mamparayak horja na beteng. Horja sisonai boi mambahen hita gabe bayak atap sangap i lobei ni halak. Halani bahat na marpandapot sisonai, boi do homa ai masuk hubagas pingkiranta.

12. Tongon do horja na beteng boi mambahen hita martuah?

12 Ai tongon do horja na beteng boi mambahen hita martuah? Lang. Dingat ma Sibolis. Sihol do ia ase ipasangap. Boi ihatahon dapotni do ai. Tapi tong do ia marah janah lang martuah. (Mat. 4:8, 9; Pangk. 12:12) Sebalikni, martuah ma hita anggo mangurupi halak mananda Naibata ase mandapot pangarapan bani ari simagira. Ai ma horja sidearan na parohon hatuahon. Sobali ai, mangindahi horja na beteng mambahen hita mamontingkon diri janah urah simburu bani na legan. Ujungni, age pe dapot hita ai, tong do lang martuah hita. Bibel mangkatahon usih songon “manangkap logou tumang” do ai.​—Par. 4:4.

13. (a) Sonaha ma namin pangahapta pasal parhorjaan? (b) Aha do na mambahen malas uhur ni apostel Paulus?

13 Tontu porlu do horja na dear ase boi mansarihon kaluarga. Tapi ulang ma gabe ai na siporlunan ibagas goluhta. Jesus mangkatahon, ‘Seng tarbalosi sada halak dua tuan. Sai sogam do uhurni bani na sada, haholonganni na sada nari. Iharosuhkon do na sada anjaha mapas uhurni bani na sada nari. Seng tarbalosi nasiam Naibata rap pakon Mammon!’ (Mat. 6:24) Sasintongni, mangidangi Jahowa janah mangajari halak marlajar Bibel do na mambahen martuah hita. Domma iahapkon apostel Paulus ai. Sanggah poso ia, hasangapon bani diri do na ipindahi. Ujungni, na mambahen malas uhurni ai ma mangidah halak mambahen hamubahon halani manangihon Barita na Madear. (Basa 1 Tessalonika 2:13, 19, 20.) Jadi,  seng dong horja na parohon hatuahon sobali mangidangi Jahowa janah mangurupi halak ase mananda Ia!

Martuah ma hita anggo mangurupi halak mananda Naibata (Tonggor ma paragrap 12, 13)

AI BOI DO HITA MANGATASI PARSOALAN NI DUNIA ON?

14. Mase bahat halak marpandapot sidea boi mangatasi parsoalan ni dunia on?

14 “Manisia boi mangatasi parsoalan ni dunia on.” Mase bahat halak marpandapot sonai? Halani rosuhan do sidea mangkorjahon harosuh ni sandiri, lang porlu mangihutkon panogu-noguan ni Naibata. Ongga do ra itangar nasiam dong na mangkatahon domma hurang parporangan, hajahaton, panahit, pakon hasombuhon. Sada laporan pe patugahkon, “Lambin dearni do hagoluhanta sonari halani marusaha do ganup jolma padearhon dunia on.” Ai tongon do ai? Boi do gakni manisia pasaloseihon parsoalan ni dunia on?

15. Mase boi ihatahon lape salosei parsoalan i dunia on?

15 Boi do manisia parontihon porang? Sadokah Porang Dunia I ampa II, lobih humbani 60 juta halak matei. Sadokah tahun 2015, dong 12.4 juta halak na manadingkon rumahni halani porang atap pe iparburu. Halani ai tambah ma bilangan ni halak na mangungsi, gabe 65 juta halak. Sonaha pasal hajahaton? Tongon, piga-piga hajahaton domma hurang. Tapi  lambin martambah do hajahaton na legan songon panipuan marhitei internet, pangarsik-arsikon ibagas rumah, teroris, ampa korupsi. Sonaha pasal panahit? Tongon, dong panahit na boi itambari. Tapi bani tahun 2013, sada laporan patugahkon dong siah juta halak na marumur 60 tahun hutoruh matei halani stroke, kanker, jantung, ampa diabetes. Janah sonaha pasal na masombuh? Bank Dunia patugahkon lambin martambah do jumlah halak na masombuh i Afrika. Humbani 280 juta halak bani tahun 1990 gabe 330 juta halak bani tahun 2012.

16. (a) Mase pamarentahan ni manisia lang boi parontihon parsoalan i dunia on? (b) Aha do na laho bahenon ni Harajaon ni Naibata?

16 Seng pala tarsonggot hita mambotoh ai. Halak na mamontingkon diri do na mambobai organisasi ekonomi ampa politik sonari on. Halani ai ma seng boi sidea parontihon porang, hajahaton, panahit, ampa hasombuhon. Pitah Harajaon ni Naibata do na boi mangkorjahon ai. Rimangi ma aha na laho bahenon ni Harajaon ai. Iparonti Harajaon ai do ganup na mambahen halak marporang songon paruhur haut, nasionalisme, ugama palsu, ampa Sibolis. (Ps. 46:9, 10) Ipasoh do hajahaton. Gari sonari pe, domma iajari marjuta halak ase marsihaholongan janah porsaya bani na legan. Lang dong pamarentahan ni manisia na boi mambahen sisonai. (Jes. 11:9) Sasapon ni Jahowa do holi panahit janah ganup halak gabe gokan dear. (Jes. 35:5, 6) Seng dong be halak na masombuh. Ganup halak martuah janah marhasoman pakon Naibata. Arganan do ai humbani habayakon.​—Ps. 72:12, 13.

‘BOTOH MA SONAHA PATUT MARBALOS’

17. Sonaha hita boi manulak hapentaran ni dunia on?

17 Jadi, anggo dong itangar nasiam pandapot ni halak na pagalekkon haporsayaonmu, pindahi ma aha na ihatahon Bibel pasal ai. Ulas ma ai pakon sanina-botou na marpangalaman. Pingkirhon homa mase sidea mangkarosuhkon ai, mase ai salah, janah sonaha nasiam boi manulak ai. Hita boi manjaga diri humbani hapentaran ni dunia on anggo mangihutkon podah ni apostel Paulus, ‘Marpantas ni uhur ma nasiam marparlahou dompak halak na i darat. Botoh nasiam ma sonaha patut marbalos bani ganup halak.’​—Kol. 4:5, 6.

^ par. 9 Piga-piga terjemahan Bibel mangambahi ayat bani Johannes 7:53–8:11. Halani ai, dong halak na mambasa ayat ai gabe marpandapot pitah halak na so mardousa do, na boi manguhumi halak na tardapot marriah-riah. Hape Bibel mangkatahon, “Anggo tardapot sada dalahi [rap modom] pakon sada parinangon ni halak na legan, maningon matei sidea haduasi.”​—5 Mus. 22:22.